1 ǁKhātib ge ǀhomǃgāba ûib ǁgam-e ūhâ ǃāb, kristal-i khami ra ǂkhaib, Elob tsî ǁKhaob di tronsa xu ra dâuǂoaxaba ge ǁgau te, 2 ǃās ǃganni di ǁaegub ǃnâ ra dâuba. Mâ ǀkhāb ǃāb dib hoab ais ge ûib di haisa ge mâ i, disiǀgamǀa ǃnāde kurib ǃnâ, ǀgui ǃnāsa mâ ǁkhâb hoaba ra ǂûtanisa, tsî ǂnaregu âs ge ǁaedi di ǂuruǂuruhes ǃaroma ge hâ i. 3 Tsî-i ge Elob xa ǀâxarexūhe hâ xū-i xare-e ǃās ǃnâ hōhe tide.
Elob tsî ǁKhaob di trons ge ǃās ǃnâ nî hâ tsîn ge ǁîb di ǃgāna nî ǀgoreǀî bi. 4 ǁÎn ge ais âba nî mû tsîs ge ǀons âba ǃūdi ân ai nî xoamâihe. 5 Tsuxu-i xare-i ge ǃaruǀî hâ tide tsîn ge ǃamǀaedi tamas ka io sores ǃnâba ǂhâba tide, ǃKhūb Elob nî ǁîn di ǃnâ amaga tsîn ge ǀamosib kōse nî gaosîsen.
Jesub di hās
6 Tsîb ge ǀhomǃgāba tita ǃoa ge mî: “Nē mîdi ge ǂgomǂgomsa tsî a ama. Tsî ǃKhūb Elob hîa ge ǁîb di Gagaba kēbo-aoga māb ge ǀhomǃgāb âba go sî, ǃgān âbab tare-i nî ǃhae ǁaeb ǃnâ ī ǃkhaisa nî ǁgause.
7 “Mû, ǃhaese ta ra hā! ǀKhaehen ge hâ, ǁnān nē kēbosi ǂkhanis di mîde ra ǃkhōǀgaipena!”
8 Tita, Johaneta ge nē xūn hoana ǁnâu tsî ge mû. Tsî nēna ta ge ǁnâu tsî mû, o ta ge nēna go ǁgau te ǀhomǃgāb ǂai-am ge ǁnāǁgoe, ǁîba ta nî ǀgoreǀîse. 9 Ob ge “Hî-î, tā dī! Sats tsî sa ǃgâsagu, kēbo-aogu tsî ǁnān nē ǂkhanisa ra ǁnâuǀnamn ǁkhān khami ta tita tsîna ǀhûǃoaba-aos ǀguisa i xuige. Eloba ǀgoreǀî!” ti ge mî. 10 Tsîb ge ǃaruǀî ge mî: “Tā mîdi nē kēboǂkhanis dide ǂganamsase ūhâ, nē xūn hoan nî ī ǁaeb a ǀgū xuige. 11 ǂHanuoǃnâ-e, a i ǃaruǀîǀgui ǂhanuoǃnâ tsî ǀurisa-e, a i ǃaruǀîǀgui ǀurisa; ǂhanu-ai-e, a i ǃaruǀîǀgui ǂhanu-aisiba dī tsî ǃanu-e, a i ǃaruǀîǀgui ǃanu.
12 “Mû, ǃhaese ta ra sī! Tsî ti mādawa-ams ge tita ǀkha hâ, mâ-i hoa-e ta ǁî-i di ǃoaǂuis ǃoa nî mādawa-amse. 13 Tita ge Alfata tsî Omegata, ǂgurota tsî ǀunita, tsoatsoata tsî ǀamta.”
14 ǀKhaehen ge hâ ǁnān ǁîn di sarana ra ǁāna, ûib di hais ǂûna ǂûs di ǂhanuba ūhâ tsîn nî dao-amdi ǃnâ-u ǃās ǃnâ ǂgâ ǁkhāse. 15 Xawe ǃās ǃaugan ge arin tsî ǃgaidī-aon, ǀai-aon tsî ǃgamaon, ǁgôa-eloǃoaba-aon tsî ǂkhaba sîsenga dīsa ǀnamn tsîna hâ.
16 “Tita, Jesuta ge ti ǀhomǃgāba nē xūn xab kerkhegu ǃnâ nî ǃkhō-amse ge sî. Tita ge Davidi ǃnomata ǁîb di ôananôaguba xu hâta; tita ge ǂkhai ra ǁgoaǀgamirota.”
17 Tsî ra ge Gagab tsî ǃgame-aos tsîra ra mî:
“Hā re!”
Tsî nēsa ga ǁnâun hoan
ge ǁkhāti “Hā re!” ti nî mî.
ǁGâ hâ-i hoa-e, a i hā
tsî ûib di ǁgamma
matareoǃnâse hā ū re.
ǀUniga ǃkhâikhoms tsî mîmâis
18 O ta ge hoan ǃoagu nē kēbosi ǂkhanis xa ra ǃkhō-am: Khoe-i ga nēn ǃnâ ǀaro, ob ge Eloba nē ǂkhanis ǃnâ a xoamâisa tsûtsû-aide ǁî-i di ǁkharab tawa nî ǀaro. 19 Tsî-i ga khoe-e nē kēbosi ǂkhanis di mîde xu xū-e ūbē, ob ge Eloba ǁî-i di amǃnâs, ûib di hais dis tsî ǃAnu ǃĀs dis nē ǂkhanis ǃnâ xoamâisasa ǁî-e xu nî ūbē.
20 ǁNāb nēna ra ǃkhō-ammi ge ra mî: “Amase, ǃhaese ta ra hā!”
Amen. Hā re, ǃKhū Jesutse.
21 Ab ǀkhommi ǃKhūb Jesub diba hoadu ǀkha hâ. Amen.*
© Khoekhoegowab Elobmîs © Bible Society in Namibia, 2020.
