Danieli di ais baib tsî pirib tsîkha dis
1 ǃNonaǁî ǂgaeǂguis kurib gao-aob Belsasari dib ǃnâ ta ge tita Danielta ǁkhawa ai-e ge mû. 2 Nē ai-i ǃnâ ta ge Elamǀkharib ǃnâ ta omǂnamisa ǃās Susas ǃnâ hâ ǃkhaisa ge mû. ǁKhāti ta ge Ulaiǃāb amǃgâ ta hâsa ge mû, 3 tsîb ge ǃāb amǃgâ ǀgam, gaxu ǁnâkha ūhâ baiba ge mâ i. ǁÎkha di ǀguib, ǀunis ai ge ǂoaxab ge naub xa ge gaxu i. 4 Tita ge ǁnâkha âb ǀkhab baiba huriǂoas, ǀapas tsî ǃkhawagasǀî ra ǃkhā ǃkhaisa ge mû, tsî i ge ǀgui ǀguru-i tamas ka io xamari-i tsîna ǁîba ge mâǃoa ǁoa i tsî khoe-i xare-i ge ǁîna ǁîb ǀgaiba xu ge huiǂui ǁoa i. ǁÎb ge ǂgaob ra khami gere dī tsî aiǃâb ǃoa ǀgui ge ǀgai.
5 Kō ta ra hîab ge piriba huriǂoasa xu, ǂaidi âb tsîn ǃhūba tsâǀkhā tama kō ǃhaese ge ǃkhoeǀkhī. ǁÎb ge ǀgui mûmûsa ǁnâba ǁîb mûra ǁaegu ge ūhâ i. 6 ǁÎb ge ǃāb amǃgâb mâse ta ge mû baib, ǀgam ǁnâkha ūhâb ǃoa hā tsî ǁîba kai ǀgaib ǀkha ge ǃkhoeǂnôa. 7 Kō ta ra hîab ge kai ǁaib ǀkha baiba ǂgâu tsî ǁîb di ǁnâkha ge khôa. Baib ge mâǃoa-ūb nî ǀgai-i xare-e ge ūhâ tama hâ i, tsîb ge piriba ǁîba ǃgau tsî ge dâǃgâ tsî i ge ǁîb ǀgaiba xu baiba nî huiǂui khoe-i xare-e ge ǀkhai i.
8 Pirib ge ǃaruǀîǀgui ge ǀgai, xawe kai ǀgaibab ge sīǃnâ, ob ge kai ǁnâb âba ge khôaǁnâhe. Tsî gu ge ǁîb soas ǃnâ mûmûsa, haka ǁnâga ge ǂoaxa, haka ǂoade ǃoa ra ǁgauga. 9 Nē haka ǁnâgu di ǀguiba xub ge ǂkhari ǁnâroba ge ǂoaxa, ǀgaib âba ge ǃkhawagas, aiǂoas tsî mîmâis ǃhūb ǃoa ǂoa kaiba. 10 ǁÎb ge ǁnātikōse ge ǀgai tsî ǀhomsi toroǂnubis, ǁnādi ge ǀgamirode, ǃhūb ai aoǁnâ tsî ge dāǂkhū. 11 ǁÎb ge ǁkhāti ǀhomsi toroǂnubis di ǂgaeǂgui-aoba ǃharaxū, tsēkorobe ǁguibadi ǁîb gere ǁguibahede ǀû kai tsî ǁîb di Tempela ge hîkākā. 12 ǀHomsi ǂnubis ge ǁîb di ǀgaib ǃnâ ge māǁnâhe tsîs ge tsēkorobe ǁguibas ǃās ǃnâ ǁgauoǃnâ ǃoabasa gere dīhe, tsî ama eloǃoabasa ge hîkākāhe. Nē ǁnâb ge dīb ra xūn hoan ǃnâ ge ǃgâiǃgâxa i.
13 ǁNās khaoǃgâ ta ge ǀgui ǀhomǃgāb nauba ra dîsa ge ǁnâu: “Mâtikōsen kha nē xūn, ai-i ǃnâ ge mûhena nî aiǃgû? Mâtikō ǁaebab nē ǁgaisi ǁoreba, tsēkorobe ǁguibadi ǃās ǃnâ nî hâ? Mâs kōse ra ǀhomsi toroǂnubis tsî Tempeli tsîra nî dāǂkhūǂkhūhe?”
14 Ob ge tita ǃoa ge mî: “ǀGamǀoadisi tsî ǃnonakaidisi ǃuidi tsî ǁgoadi kōses ge nēsa nî aiǃgû. ǁNās khaoǃgâb ge Tempela ǁkhawa nî ǀasaǀasahe.”
ǀHomǃgāb Gabrieli ge aisa ra ǁguiǃā
15 Ais hîa ta ge mûsa ta ra ǁnâuǃā ǂgao, hîab ge ǀguib, aorekhoe-i khami ra mûsenna ti ais ai hā ge mâ. 16 Tsî ta ge dom-i, Ulaiǃāba xu ra ǂgai-e ge ǁnâu: “Gabrieltse, nē khoeba ais hîab go mûsa ǁguiǃāba re.” 17 ǁÎb ge tita mâ ǃkhais ǁga ge hā, tsî ǀgūseb ge hā, o ta ge ǃaob xa ǃhūb ai ge ǁnā.
Ob ge ǁîba ge mî: “Khoetse, ǁnâuǃā re. Nē ais ge ǃhūbaib di ǀams xa ra ǂâibasen.” 18 Tita ǀkhab ra ǃhoa, hîa ta ge ǃgam ǂoms xa hāǂamhe tsî ais ai ǃhūb ai ge ǁnāǁgoe. Xaweb ge ǁîba ǃkhō te tsî ǂaira ai mâi te 19 tsî ge mî: “Tita ge Elob di ǁaib ǀams ain tarena nî ī kai ǃkhaisa nî ǁgau tsi. Nē ais ge ǀams di ǁaeba ǃoa ra ǁnaeǁgau.
20 “ǀGam ǁnâkha ūhâ baib hîats go mûb ge Mediab tsî Persiab tsîkha di gaosikha. 21 Pirib ge Grikeǃhūb di gaosiba tsî mûmûsa ǁnâb, ǁîb mûra ǁaegu mâb ge ǂguro gao-aoba. 22 Haka ǁnâgu, ǂguro ǁnâb ge khôaǁnâhe, o ge ǂoaxa gu ge ra ǂâibasen, haka gaosigu ǁnā ǃhaosa xu nî ǂoaxasa, xawe gu ǂguro gaosib khami ǀgaisa tidesa.
23 “ǁÎgu gaosis di ǀams ra ǀgū tsî ǁoreb ge ǃnā, ob ge ǁē tsî ǀhôagao gao-aoba nî hā. 24 ǁÎb ge nî ǀgai, xawe ǁîb di ǁkhāsib ǂûba xus ose. ǁÎb ge ǁgaisi hîkākāsa nî ǃaroma tsî ǀgaisa khoen tsî ǁkhāti Elob di khoen ǂûn tsîna nî hîkākā. 25 ǁÎb di ǀhôagaosib ǀkhab ge ǁîb gāxaǃnâ ǀgaugu ǃnâ nî ǃgâiǃgâ. Tsîb ge ǁîb di ǂnīsasib ǃnâ ǂgui khoena ǀūǂamsen hâ hîa nî hîkākā. ǁÎb ge ǁkhāti hoagu xa kai Gao-aob tsîna ge ǃharaxū, xaweb ge ǁîba nî hîkākāhe, tsî ǁnāsa khoe-i di ǀgaiba xu tama. 26 Nē ais, ǁgoas tsî ǃuis tsîra dis xats ge ǁguiǃābahen ge nî ama ī. Xawe ǁîsa aibe ǂganǃgâsase ūhâ, ǂomxa ǁae-i khaoǃgâ ǀguis nî ama ī xuige.”
27 Tita ge ǂkhabu tsî ǀoro tsēde ge ǀaeǁgoe. ǁNās khaoǃgâ ta ge khâimâ tsî gao-aob ge dī ta nîse ǁgui-ai te hâ i sîsenna ge dī, xawe ta ge nē ais xa ge burugâ hâ i tsî ǁîsa ge ǁnâuǃā ǁoa i.
© Khoekhoegowab Elobmîs © Bible Society in Namibia, 2020.
