Pasxab di aiǂhomisendi
1-3 Khoen ge Pasxaǁâudība mîmâisa ǁaeb ai, ǂguro ǁkhâb ǃnâ ge tsēdī ǁoa i, ǂâusa pristergu ge ǃanuǃanusen tama hâ i tsî ǂgui khoen ge Jerusalems ǃnâ ǀhao tama hâ i xui-ao. ǁNā-amagan ge gao-aob Hiskiab, ǁîb ǂamkhoegu tsî Jerusalems ǁanǂgāsaben tsîna ge mîǀgui, ǁîsan ǀgamǁî ǁkhâb ai nî tsēdīsa. Ob ge gao-aoba hoaraga khoen Israeli tsî Judab tsîkha dina ge haisiba. ǁÎb ge ǀō-aisase Efraimmi tsî Manaseb tsîkha di ǃhaora ǂkhanide xoaba tsî ge ǁkhau, în Tempeli ǁga Jerusalems ǃoa hā tsî Pasxaba, ǃKhūb Israeli di Elob di ǃgôasib ǃaroma hā tsēdī. 4 Gao-aob tsî hoaraga khoen tsîn ge nēn xa ge ǃgâibahe. 5 Tsîn ge ǁîna Dans ǀapas ǃnâ ǁgoesa xu Bersebas ǃkhawagas ǃnâ ǁgoes kōse hâ Israelǁîn hoana ge ǁkhauǂui, în Jerusalems tawa ǂguros xa kaise ǂgui ǃgôab ǃnâ ǀhao tsî Pasxaba, ǂhanub ǃnâ i a xoamâisa khami tsēdī. 6 O gu ge sîsabega gao-aob tsî ǁîb ǂamkhoegu di mîmās ai, Judab tsî Israeli tsîkha hoakha ge ǃgûǃnâǃganu, nē ǂhôas ǀkha:
“Israelǁîdo, sadu ge Asiriaǁîn di gaoǂamsa xu ge ǃnora. Oa ǁnâi nēsi ǃKhūb, Abrahammi, Isaki tsî Jakob tsîgu di Eloba ǃoa, ob ge ǁîba sado ǃoa nî oaǀkhī. 7 Tā sadu aboxan tsî sadu ǃgâsa Israelǁîn, ǃKhūb ǁîn di Eloba ge ǁnâuǀnamoǃnâ in khami ī. Mâtikō ǃgomseb ge ǁîna ǁkhara ǃkhaisa du ge ge mû. 8 Tā ǁîn khami ǃnâudanaxa, î du ǃKhūba ǁnâuǀnam. Tempeli, ǃKhūb sadu Elob ge ǀamos kōseb ǃanuse nî hâse khaib ǃoa hā, î ǁîba ǀgoreǀî, ob ge ǃaruǀî sadu ǀkha ǁaixa tide. 9 ǃKhūb ǃoa du ga oa, on ge ǁnān, sadu ǀaokhoena ge ǃkhōsabese ǃgû-ūna, ǁîna ǀkhomxa tsî nē ǃhūb ǃoa nî oahā kai. ǃKhūb sadu Elob ge ǃgâi tsî ǀkhomxaǃnâ, tsîb ge ǁîb ǃoa du ga oao, nî ūǃoa du.”
10 Sîsabegu ge Efraimmi tsî Manaseb tsîkha ǀkharib ǃādi hoade Sebulonni kōse ge ǃgûǃnâǃganu, xawen ge khoena ǁîga âiǂui tsî gere ǃhō. 11 Xawen ge ǀnîn, Aseri, Manaseb tsî Sebulonni ǃhaodi dina Jerusalems ǃoa hāsa ge māsenxa i. 12 Elob ge ǁkhāti Judab ǃnâ ge sîsenxa i, în khoena ǀguiǃnâxase ǁîb ǂâisa ǁnâuǀnam tsî gao-aob tsî ǁîb ǂamkhoegu mîmāsa dī.
Pasxab di tsēdīhes
13 Kaisen ge ǂgui khoena ǀgamǁî ǁkhâb ǃnâ Jerusalems ǃnâ ge ǀhao, Khūkhū-e ūhâ tama Pere-i Kaitsēsan nî tsēdīga. 14 ǁÎn ge Jerusalems ǃnâ ge ǁguibadi tsî ǀanǀanǁguibadi tsîn gere dī-aihe altardi hoade khôaǁnâ tsî Kidronǃgoaǃnāb ǃnâ ge aoǂgā. 15 Disihakaǀaǁî tsēs ǁkhâb dis ain ge Pasxaǁkhaoga ge ǂā. O gu ge pristergu tsî Leviǁîgu tsîga tao tsî ǃKhūb ǃaroma khaisen tsî khauǁguibade Tempeli ǃnâ ge ǁguiba. 16 Tsî gu ge Moseb, Elob aob di ǂhanub ǃnâ i a xoamâisa khami, ǁîgu ǃkhaidi ai ge mâ. Leviǁîgu ge ǁguibas di ǀaob pristergu xa gu ge māheba, altars ai ge ǀgapi. 17 ǂGui khoen ge noxopa ǃanuǃanusen tama hâ i tsî ǁnās ǀkha Pasxaǁkhaoga ǂā ǁoa i, xui-ao gu ge Leviǁîga ǁîna ǁnāsa dība tsî ǁkhaoga ǃKhūba ge khaiba. 18 ǁÎn xōǀkhān ge ǂgui khoen, Efraimmi, Manaseb, Isaskari tsî Sebulon hâgu ǃhaodi dina ge ǃanuǃanusen tama hâ i, tsî xoaǁguib ǃoa anu tamase Pasxab ǃnâ gere amǃnâxa. Ob ge gao-aob Hiskiaba ǁîna nēti ge ǀgoreba: 19 “ǃKhū, sida aboxan di Elotse, ǁnān ǃanuǃanusen taman hâ, xawe ǁîn di ǂgaob hoab ǀkha satsa ra ǀgoreǀîna sa ǃgâisiba xu ǀûba re.” 20 Ob ge ǃKhūba Hiskiab ǀgoresa ǁnâu-am tsî khoena ge ǀûba. 21 Jerusalems ǃnâ ge ǀhao hâ i khoen ge Khūkhū-e ūhâ Pere-i Kaitsēsa, hû tsēdi kōse kai dâb ǀkha ge tsēdī. Tsî Leviǁîgu tsî pristergu tsîgu ge mâ tsēs hoasa, ǁîgu ǀgaib hoab ǀkha ǃKhūba gere koaǁnaeba. 22 Hiskiab ge ǃKhūb di ǃoabasa gu ge dī-ū ǁkhāsib ǃaroma Leviǁîga ge koa.
ǀGamǁî ǁâudīb
Hû tsēdi kōsen ge ǃKhūb, ǁîn aboxan di Eloban ge koa bi rase ǂkhîbagus ǁguibade hā-ūbadi, khaoǃgân ge 23 noxopan ǀnî hû tsēde nî tsēdīsa hoatsama ge mîǀgui. Tsîn ge kaise dâxase ge tsēdī. 24 Gao-aob Hiskiab ge ǁîna ǀguiǀoadisi gomagu tsî hûǀoadisi gūn tsîna ǂā tsîn nî ǂûse ge mā, tsî ǂamkhoegu ge ǁîna, ǀguiǀoadisi gomagu tsî disiǀoadisi gūn tsîna ge mā. ǂGui pristergu ge ge ǃanuǃanusen. 25 Hoaraga khoen ǁnāpa ge ǀhao hâ in, Judab khoen, pristergu, Leviǁîgu, Israela xu ge ǀkhī ǃhaokhoen tsî Judab ǃnâ ge ǁan hâ i ǃhaokhoen tsîn hoan ge gere ǃgâiaǂgao. 26 Kai dâb ge Jerusalems ǃnâ ge hâ i, ǁnāti i xū-i ge Davidi ôab, gao-aob Salomob tsēde xu Jerusalems ǃnâ ī tama hâ i xui-ao. 27 Tsî gu ge pristergu tsî Leviǁîgu tsîga, ǃKhūb di ǀkhaeba khoena ge ǂganba. Ob ge Eloba ǁîb di ǁanǃkhais ǀhommi ǃnâ hâsa xu ǁîgu di ǀgorede ge ǁnâu-am.
© Khoekhoegowab Elobmîs © Bible Society in Namibia, 2020.
