Esrab di hās Jerusalems ǃnâ
1 ǂGui kurigu khaoǃgâ, Artaxerxesi ge Persiab di gao-ao i ǁaeb ǃnâb ge Esra ti ǀon hâ aoba ge hâ i. ǁÎb di aboxagu ge Serajab, Asariab, Hilkiab, 2 Salummi, Sadoki, Ahitub, 3 Amariab, Asariab, Merajoti, 4 Serajab, Usib, Bukib, 5 Abisuab, Pinehasi, Eleasari tsî ǀgapipristeri Aronni tsîga.
6-7 Esrab ge ǁkhāǁkhāsa aob, ǀoasa ǂansa ge ǃKhūb, Israeli di Elob ge Moseba mā ǂhanub xa ūhâ iba. ǃKhūb, ǁîb Elob di ǀkhaeb ge ǁîb ai hâ i, xui-aob ge gao-aoba ǂganni ga xū-i hoa-e gere mā bi. Hûǁî kurib Artaxerxesi ǂgaeǂguis dib ǃnâb ge Esraba, ǀnî Israelǁîgu, ǁîgu ǃnâ gu pristergu, Leviǁîgu, Tempelǁnae-aogu, Tempelǃûi-aogu tsî Tempelǃgāgu tsîga hâ igu ǀkha Babiloniaba xu Jerusalems ǁga ge ǃgû. 8-9 ǁÎgu ge ǂguro tsēs ǂguro ǁkhâb dis ai Babiloniaba xu ǃgû tsî Elob di huib ǀkha ǂguro tsēs koroǁî ǁkhâb dis ai Jerusalems ǃnâ ge sī. 10 Esrab ge ǁîb di ûiǁaeb ǃnâ ge ǁgui-aisen, ǃKhūb di ǂhanuba ǁkhāǁkhāsen, ǁîba dī tsî ǁîb di ǂhanugu tsî mîmādi tsîna Israelǁîna ǁkhāǁkhāsa.
Artaxerxesi ge ǂkhâǃnâs di sîǂkhanisa Esraba ra mā
11 Gao-aob Artaxerxesi ge sao ra sîǂkhanisa prister Esrab, ǁkhāǁkhās tsî ǀoasa ǂans tsîna ge ǃKhūb ge Israela mā ǂhanugu tsî mîmādi ǃnâ ūhâ iba ge mā:
12 “Gao-ao Artaxerxesta xu, prister Esrab, ǀhommi Elob di ǂhanub ǃnâ ǁkhāǁkhāsab ǃoa.
13 “Tita ge ra mîmā, hoaraga Israelǁîn, pristergu tsî Leviǁîgu tsîn hîa ra oa ǂgaon, sats ǀkha Jerusalems ǁga a ǃgû ǁkhāsa. 14 Tita tsî ti hû ǀapemā-aogu tsîge ge ra sî tsi, îts Jerusalems tsî Judab tsîra ǃnâ hâ mâsiga ôaǃnâ tsî Elob di ǂhanub, sats ge ǂgomǃgâbaheb ra ǁnâuǀnamhesa ǂanǂui. 15 Îts ǁkhāti tita tsî ti ǀapemā-aogu tsîge ge māsenxase Israeli di Elob, ǁîb di Tempeli Jerusalems ǃnâ hâba a mā ǀhaiǀurib tsî ǃhuniǀurib tsîna ūsao. 16 ǁKhātits ge Babiloniab hoab ǃnâts nî ǀhaoǀhao ǀhaiǀurib tsî ǃhuniǀurib, tsî Israelǁîn tsî ǁîn pristergu, ǁîn Elob di Tempeli, Jerusalems ǃnâ mâb ǃaroma ra ǁguiba mādi tsîn hoana nî ūsao.
17 “Nē marina ǃgâise sîsenū, î ǁgōgu, baigu, ǁkhaogu, ǃhoro-i tsî ǂauxûi-i tsîna ǁama, î ǁîna sadu Tempeli, Jerusalems ǃnâ mâb di altars ai ǁguiba. 18 ǃGau ka ǀhaiǀurib tsî ǃhuniǀurib tsîn ǀkha sats tsî sa sîsenǁare-aogu tsîgo ǃgâiba go nî khami dī, sadu Elob di ǂâisa ǃoa. 19 Îts Tempelǃoabas ǃnâ nî sîsenūhesets ge māhe xūn hoana Jerusalems Eloba ǁkhaeǁnâba. 20 Tempeli ǃaroma nî ǂhâbasa xū-i hoa-ets ge gao-aob di ǁuiǂgaesa xu a ū ǁkhā.
21 “Eufrati huriǂoasǀkhāb di ǁuiǃkhōmâi-aogo hoago ta ge ra mîmā, î go prister Esrab, ǀhommi Elob di ǂhanub ǃnâ ǁkhāǁkhāsaba ǂganni ka xū-i hoa-e ǃhaese mā, 22 sao ra ǃgôab tawa i a sī ǁkhās kōse: ǃNonaǀoadisi tsî hakakaidisi kiloxramgu ǀhaiǀurib, disiǀoadisi kiloxramgu ǃhoro-i, ǀgamǀoadisi litergu ǂauxûi-i, ǀgamǀoadisi litergu ǀkhera-oli-i tsî ǂō-e ǂhâbasa as kōse. 23 ǃÛiǃgâ, î ǀhommi Elob ǁîb di Tempeli ǃaroma ra ǂgaoǀkhā xū-i hoa-e mā, îb ǁîb di ǁaiba tā tita tsî ti ôagu ai hā. 24 Pristergu, Leviǁîgu, Tempelǁnae-aogu, Tempelǃûi-aogu, Tempelǃgāgu tamas ka io Tempeli ǃnâ ra ǃoaba khoe-e xu ǁgui-aimarisa ūsa go ge ra ǂkhāhe.
25 “Sats Esratsa, Elob xats māhe hâ gā-aisib ǀkha ǂgaeǂgui-aogu tsî ǀgoraǃgâ-aogu tsîga mâi, î gu Eufrati huriǂoasǀkhāb ai ǁan hâ khoen, Elob ǂhanuba ǂanna mûǂam. Elob ǂhanuba ǂan tama khoe-i hoa-e go ge ǁîba nî ǁkhāǁkhā. 26 Elob di ǂhanub kas, gao-aob di ǂhanub kas hoasa ga ǁnâuǀnam tama i khoe-i hoa-i ge ǁkhō ǁkharaba nî ǁgui-aihe: ǁŌb ǁkharab kas, ǃhūba xu ǃhaeǂuis kas, xūn â-e ǁkhâuǁnâs kas, ǃkhō-oms ǁkharab kas hoasa.”
Esrab ge Eloba ra koa
27 Ob ge Esraba ge mî: “Ab koahe re, ǃKhūb, sida aboxan di Eloba. ǁÎb ge gao-aoba go māsenxa kai, ǃKhūb di Tempeli Jerusalems ǃnâ mâbab, nē ǀgaus ai ǃgôasiba nî māse. 28 Elob di ǀkhomxaǂgaosiba xu ta ge gao-aob tsî ǁîb ǀapemā-aogu tsî ǁîb ǀgaisa ǂamkhoegu tsîgu tawa ǀkhomma ge hō. ǃKhūb, ti Elob ge ǁkhoaǂgaoxasiba ge mā te tsî ta ge ǂgui ǂgaeǂgui-aogu Israeli diga ge gowadan, î gu tita ǀkha doe-oa.”
© Khoekhoegowab Elobmîs © Bible Society in Namibia, 2020.
