Elob Hoaǀgaixab ǃoa hâ koatsanas
1 Koa re ǃKhūba!
ǃGâi i ge a Eloba koaǁnaebasa;
ǀnamǀnamsa tsîs a anu ǁîba koasa amaga.
2 ǃKhūb ge Jerusalemsa ǁkhawa ra ǂnubikhâi
Israeli din, ǀgaruǀgaruhe hânab ge ra ǀhaoǀhao.
3 ǁÎb ge ǁnāb ǂkhū hâ ǂgaogu â-ina ǂgauǂgau
tsî ǀhapin âna ra ǃgae-aiba.
4 ǀGamiron di ǃgôaba ǁapoǁapo
tsî mâ-i hoa-e ǀonsa ra māba.
5 Sada ǃKhūb ge kai tsî ǀgaib âb ge a kai,
ǁîb ǁnâuǃāb ge a ǀnōhe ǁoa.
6 ǃKhūb ge ǁgâiǀāhe hâna ra huikhâi;
xaweb ge ǂkhaba khoena ǃhūb kōse ra ǃgamǃgam.
7 Gangantsanasa ǃKhūba ǁnaeba re
harps ai sada Eloba ǀkhōba re.
8 ǁÎb ǀhomma ǃâudi ǀkha ra ǀoa kaib,
ǀnanuba ǃhūb ǃaroma ra ǂhomib,
ǀgâna ǃhomgu a ra ǁhai kaiba.
9 Xamarina ra ǂûmāba,
ǂkham goran ǂgai rana.
10 Hā-i di ǀgaib ǃaroma tamas ge ǃgâiaǂgaob rasa,
khoeb ǀnūkha ǃnâ tamas ge ǃgâiǃgâibasensab ūhâsa.
11 ǃKhūb ge ǁnān ǁîba ra ǃaoǃgân ǃnâ ra ǃgâiaǂgao
ǁnān, ǁîb di hâhâ ra ǀnamma ra ǃâubasenna.
12 ǃKhūba koaǁnaeba re Jerusalemse!
koa re sa Eloba, Sionse!
13 Sa dao-amdi di ǂganamxūdeb ra ǁapoǁapo
tsî sa ôana ǀkhae xuige.
14 ǁÎb ge sa ǃhūǀkharigu ǃoa ǂkhîba ra sîb,
ǃgâi ǃhorob ǀkha ra ǁâǁâ tsiba.
15 Mîmās âba ǃhūb ǁga ra sîb,
mîb ra xūn ǃhaese ra ība.
16 Tsamaros, gūǀûn khami īsa ra māb,
ǀauba tsarab khami ra tsorob;
17 ǃnareb âba pereǂoman khami ra aoǁnâba.
Tari-e ǁîb di ǃkhaib aiǃâ nî mâ ǁkhā?
18 Mîs âbab ge ra sî tsî ǁîde ra tsunitsuni;
ǂoab âbab ra ǃgom kai, tsîb ǁgamma ra dâu.
19 ǁÎb ge mîdi âba Jakoba ra ǂanǂan;
ǁaposa ǂnûiǂgādi tsî ǂhanugu âba Israela.
20 ǀNî ǃhao-i ǃoagub ge nēti ge dī tama hâ i;
ǁîb ǂhanugan ge ǁîna a ǀū.
Koa re ǃKhūba!
© Khoekhoegowab Elobmîs © Bible Society in Namibia, 2020.
