Babilons ǁnās ai-īsi-i
1 Nēs ge ǂhôas huribamǃgâ ǁgoe ǃgaroǃhūb xa hâsa.
Negeb ǃnâs ra saresa ǃgomǃkharu khamis ge ǁîsa ǃgaroǃhūba xu, ǃaorosa ǃhūba xu ra hā. 2 ǁKhōǁkhōsa ai-īsi-e ta ge ge ǁgambahe; ǀapexū-aob ra ǀapexū tsî hîkākā-aob ra hîkākā.
Elammi toroǂnubise, ǁnāǂam re! Mediab toroǂnubise, ǃnamiǂgā si; ǁgâiǀāhe hân ǀhâimâinǀomsa ta ge nî toa kai.
3 Ti ǂhobekha ge ǃaob xa ǃnamiǂgāhe hâ; ǁoratsûb ǃnâ hâ khoes khamib ge tsûba go xāǂgā te; ǃgamǃgâ ta ge ge î ta tā ǁnâu tsî ǁnātikōse ǃao tsî ta ge mû ǂgaos tsîna ge hî tama hâ i. 4 ǃAruǀî ta ge ǂhanuse ǂâi ǁoa, ǃaob xa ta ge ra ǀkhū; ǃnōsa kara ǁaeb hîa ta goro ǁkhoreb ge ǃaob ǃnâ ge ǀkhara.
5 “Tāba ǂhomi î ǂgoasa ǀgâi, î ǂû tsî ā! Mîmā-aogo khâimâ î sago ǁkhaukhōde ǂhomi!”
6 ǁNā-amagab ge ǃKhūba tita ǃoa ge mî: “ǃGû, ǃkhē-aoba mâ kai! Ab ǁîba mûb rana ǃnuri; 7 torokunideb ga mû, ǀgamǀgamme hāǃgapi-aogu, dâukiǃgapi-aogu tsî ǃnaiǃgapi-aogu tsîgab ga mû, ob ge kaise ǂōrisa tsî ǃgâise nî ǃgaoǃgâ.”
8 Ob ge ǃkhē-aoba ge ǂgaiǂui: “ǃKhē-ommi ai ta ge hoaraga tsēsa mâ ti ǃKhūtse, tsî ti ǃûiǃkhais ai ta ge hoaraga tsuxuba ge mâ.”
9 Mû, ǁnā gu ge ǃgapi-aoga ǃgoaxa, ǀgamǀgammese hâ hāǃgapi-aoga! Ob ge ge ǃeream: “Babilons ge ge ǁnā; tsî ǁîs ǁgôa-elo-īgu ge ǀgarusase ǃhūb ai ǁgoe.”
10 Ti dāǂkhūhe hâ ǁaese, ǃhorob khami du dātsautsauhe hâ, xawe ta ge ǃKhūb Hoaǀgaixab, Israeli Eloba xu ta go ǁnâu ǂhôasa ra ǂhôa du.
Edommi xa hâ ǂhôas
11 Nēs ge Edommi xa hâ ǂhôasa.
Khoe-i ge Edomma xu tita ǃoa ra ǂgai: “ǃKhē-aotse mâtikō ǃhaeseb tsuxuba nî ǃkharu? Mâ ǁaeb tsuxuba nî toa?”
12 ǃKhē-aob ge ge ǃeream: “ǁGoas ge ra hā, xaweb ge tsuxub tsîna ǁkhawa nî hā. Dî ka dîts ka, o ǁkhawa oaǀkhī.”
Arabiab xa hâ ǂhôas
13 Nēs ge Arabiab xa hâ ǂhôasa.
Arabiab ǀgommi ǃnâ du ge tsuxuba nî hâǃgao, sadu Dedanǁîn ǃgûkhoedo. 14 ǁGâsa khoena ǁgam-e hā-ūba, î ǃhū-aona ǂû-e ǀkhī-ūba, sadu Temab ǁanǂgāsabedo. 15 ǁÎn ge gôaga xu ǃkhoeni, gôagu ǃgams ǃaroma ǂhomisaga xu, ǃgams ǃaroma ǂhomisa khāde xu tsî ǁōǁōsa toroba xu.
16 ǁNā-amagab ge ǃKhūba tita ǃoa ge mî: “Kurib ǁaeb ǃnâb ge ǁkhāsib Kedari diba nî toa. 17 Kedari khāǁkhâu-aogu khādi ge nî ǀoro; ǃKhūb, Israeli di Elob go ǃhoa xui-ao.”
© Khoekhoegowab Elobmîs © Bible Society in Namibia, 2020.
