Ores di ǀgores
ǁNaeǃnans ǂgaeǂgui-aob ǃoa. Susan Eduts ǃoa. Davidi ǀgaipetsanas; Rama-naharimmi tsî Arama-sobab hâkha ǀkhab ge ǂnoagu, tsî Joab ge oahās âb ǃnâ disiǀgamǀaǀoadisina Edommi ǃnâ, ǂŌxaǃgoaǃnāb ǃnâ ǃgamo, hō ǁguiǂams.
1 Elotse sats ge sida ge ǂhara
sats ge sida ge ǀkhauǃā;
sats ge sida ǀkha ge ǁaixa
xawe nēsi ǂgauǂgau da re.
2 Sats ge ǃhūba ge ǂgubi kai
ǁîbats ge ge ǂariǃā kai.
ǁÎb di khôa hâ ǃkhaide ǂgauǂgau re
ǀkhū ra xuige.
3 Sa khoenats ge ǃgomma ge tsâ kai
tsîts ge ǁnākeǁgapi kai da ra ǂauxûi-e ge ā kai da.
4 ǁNān satsa ra ǃaoǃgânats ge ǃkhau-e ge mâiba
khāsa xun nî ǁhâse.
5 Sa ǁkhāsiba xu sâu da re, î sida ǀgoresa ǁnâu-am re.
ǁNān satsa ǀnamn nî orehese. 6 Elob ge ǃanusib âb ǃnâ ge ǃhoa:
“Tita ge nî dâ;
Sexemsa ta ge ǀgora
tsî Sukotǃgoaǃnāba nî ǀnōtoa;
7 Gileads ge a ti,
Manaseb ge a ti.
Efraimma ti danas di toroǀgapa
tsîb ge Judaba a ti gaohai.
8 Moab ge a ti ǁāǃnâǃore;
Edommi ai ta ge ti ǀkhapusa ra ao
Filistiab ǂama ta ge ra dâ.”
9 Tari-e omǂnamisa ǃās tawa nî sī-ū te?
Tari-e tita Edoms ǃoa nî ǂgaeǂgui?
10 Elotse, sa tamatsa kha sida ge ǂharatsa
tsî sida toroǂnubidi ǀkha ǃgûǂoa tamatsa?
11 Sida khākhoena da nî mâǃoa-ū ǁkhā ǀgaiba mā da re
khoesib di huib a harebeoǃnâ xuige.
12 Elob ǀgaib ǀkha da ge nî dan
tsîb ge ǁîba sada khākhoena nî hîkākā.
© Khoekhoegowab Elobmîs © Bible Society in Namibia, 2020.
