Koresi mîmās ge ra hōhe
1 Ob ge gao-aob Dariusa ge mîmā, îs gao-aogu ǃnaeǃkhaidi xoaǁguigu, Babilons ǃnâ hâgu ǃnâ ôaǃnâsa dīhe. 2 Tsîs ge Mediaǀkharib ǃnâ ǂnôa ǃās, Ekbatanas ǃnâ xamisa ǂkhanisa ge hōhe, sao ra xoaǁguiba ūhâsa:
3 “ǂGuro kurib ǁîb ǂgaeǂguis dib ǃnâ ge gao-aob Koresa ge mîmā, Tempeli Jerusalems ǃnâ ǁkhawa nî ǂnubikhâihesa, ǁguibadi nî dīǃnâhe ǃkhaib ase. ǁÎb ge ǃnonadisi meterga ǀgapi tsî ǃnonadisi meterga nî ǂhaba. 4 ǂNubiǂgoagu ge ǀgui raib ǃnaoga, mâ ǃnona raigu ǁhāsa ǀuidi hoadi ǀgapiga nî ūhâ. Nē xūn hoan ge gao-aob mariǂgaesa xu nî matarehe. 5 An ǁkhāti ǃhuniǀuri tsî ǀhaiǀuri xapan, gao-aob Nebukadnesari ge Jerusalems ǃnâ mâ Tempela xu ū tsî Babiloniab tawa sī-ū hâ ina, Jerusalems ǃnâ mâ Tempela ǃoa oasī-ūhe.”
Dariusi ge sîsenni nî aiǃgûsa ra mîmā
6 Dariusi ge sao ra ǃereamsa ge sî:
“Eufrati huriǂoasǀkhāb di gowoniab Tatenaib, Setar-Bosnaib tsî sakho sîsenǁare-aogu tsîgo ǃoa.
“Tempela xu ǃnūse hâ, 7 î tā ǁîb di ǂnubihesa ǂhani. A gu Judab di gowoniab tsî Jodeǁîn ǂgaeǂgui-aogu tsîga, Elob di Tempela ǀnaib ge mâ i ǃkhaib ai ǁkhawa ǂnubikhâi. 8 Tsî ta ge ǁkhāti Jodeǁîga du nē omma ǂnubikhâis ǃnâ nî hui ǃkhaisa ra mîmā du. Eufrati huriǂoasǀkhāb tawa ra ǀhaoǀhaohe ǁgui-aimaris, gao-aob ra māhesa xu ǁîga ǁaeb ai matareǂui, îb sîsenna mâ tamase aiǃgû. 9 Mâ tsēs hoasa Jerusalems ǃnâ hâ pristerga ǂhâba gu hâ xūn hoana, ǀûs ose mā: ǂKham ǁgōgu, gūn tsî ǁkhaon, ǀhommi di Elob khauǁguibase nî ǁguibahen, ǃhoro-i, ǂō-i, ǂauxûi-i tsî ǀkhera-oli-i tsîna. 10 ǁNās ge nî dīhe, î gu ǁîga ǀhommi di Eloba ǃgâiba ǁguibade ǁguiba ǁkhā tsî tita tsî ti ôagu tsîge ǁîb di ǀkhaeba ǂganba. 11 ǃAruǀî ta ge ra mîmā, nē mîsa ga ǁnâuǀnamoǃnâ khoe-i omsa xub ge ǃnaoba ǃhomǂuihe, ǀāǀāhe tsî ǁî-i ǃnâ-u nî ǃkhāǃkharuhe tsîs ge ǁî-i omsa nî khôaǂkhūhe. 12 Ab ǁnā Elob, Jerusalemsa ge ǁîb nî ǀgoreǀîǃnâhe ǃkhais ase ǁhûiǂuiba, nē mîmāsa ǃûǂam tsî ga nē Tempela hîkākā ǂgao gao-aob kas, ǁaes kas hoasa ǁnā kai. Tita Dariusta ge nē mîmāsa go mā; ǁîs ge ǀoasase nî ǁnâuǀnamhe.”
Tempeli di doeǂgâhes
13 O gu ge gowoniab Tatenaib, Setar-Bosnaib tsî ǁîkha sîsenǁare-aogu tsîga, gao-aob Dariusi ge mîmā khami ǀgui ge dī. 14 Jodeǁî ǂgaeǂgui-aogu ge Tempela ǂnubikhâis ǀkha kēbo-aokha Hagaib tsî Saxariab hâkha xa gu ge māhe ǁkhoaǂgaosib ǀkha ǃgâise ge aiǃgû. ǁÎgu ge Israeli di Elob tsî Persiab gao-aogu Koresi, Dariusi tsî Artaxerxesi tsîgu xa gu ge mîmāhe khami Tempela ge dītoa. 15 ǁÎgu ge Tempela ǃnonaǁî tsēs Adarǁkhâb dis ai, ǃnaniǁî kurib gao-aob Dariusi ǂgaeǂguis dib ǃnâ ge dītoa. 16 On ge Israelǁîn, pristergu, Leviǁîgu tsî oaǀkhī ge ǃkhōsaben tsîn hoana, dâb ǀkha Tempeli doeǂgâsa ge tsēdī. 17 Tempeli di doeǂgâhes tawan ge ǁîna ǀguikaidisi ǁgōgu, ǀgamkaidisi baigu, hakakaidisi ǁkhaogu tsîga ge ǁguiba, tsî disiǀgamǀa piriga ǁoreǁguibase, ǀguiba mâ ǃhaos Israelǁaes dis hoas ǃaroma. 18 Tsîn ge pristergu tsî Leviǁîgu tsîga Tempelǃoabas ǃaroma Jerusalems ǃnâ ge mâi, Moseb ǂkhanis ǃnâ i a xoaǁguisa khami.
Pasxab
19 ǃHūsisa xu ge oaǀkhī khoen ge Pasxaba, sao ra kurib ǃnâ disihakaǀaǁî tsēs ǂguro ǁkhâb dis ai ge tsēdī. 20 Hoaraga pristergu tsî Leviǁîgu tsîgu ge ge ǃanuǃanusen tsî hoatsama ge ǃanu i. Tsî gu ge Leviǁîga oaǀkhī ge khoen hoan, pristergu tsî ǁîgu ǂûgu tsîn ǃaroma Pasxaǁkhaoga ge ǂā. 21 ǁNātin ge ǃhūsisa xu ge oaǀkhī Israelǁîn tsî nau khoen, ǃhūb ǃnâ hâ ǀūben di ǁnaetiga ge ǃKhūb, Israeli Eloban nî ǃoabaga ǁnāxūn tsîna Pasxaǁkhaoga ge ǂû. 22 Tsîn ge Khūkhū-e ūhâ tama Pere-i Kaitsēsa hû tsēde dâb ǀkha ge tsēdī. ǁÎn ge kai ǃgâiaǂgaoba ge ūhâ i, ǃKhūb ge Asiriab gao-aoba ǁîn ǃoa ǃgâi kai xui-ao, îb ǁîna Israeli di Elob di Tempela ǂnubikhâis ǃnâ mâxōǀkhā.
© Khoekhoegowab Elobmîs © Bible Society in Namibia, 2020.
