Natanni
1 Samueli khaoǃgâb ge Natanni, hîa ge Davidi di ǂgaeǂguis ǁaeb ǃnâ kēbo-ao iba ge hā.
David
2 Pristergu ra ǁguibas di ǃgâi ǃâ-e ǀgui ǀkhāb ai ǂnûiǂui khamib ge ǃKhūba, Davida Israelǁaes di ǃgâi khoeb ase ge ǁhûiǂui. 3 ǁÎb ge xamgu ǀkha piriron ǀkhas khami tsî bergu ǀkha ǁkhaoron ǀkhas khami gere ǀhuru. 4 Davidi ge ǂkham axab a hîa ǀuisa ǁîb di slengers ǃnâ ǂgā tsî sabu tsî ǀuisa ge ǂnoa. Nē ǀuis ge koasenxa, kaikara khoeb, Goliata ge ǃgam. Nēsa dīs ǀkhab ge ǁîb di khoena ǃgôasiba ge mā-oa. 5 ǁÎb ge ǃKhūb, Hoan xa ǀGapib ǃoa ǀgore tsî ǂanǂansa toro-aobab nî ǃgam-ū ǀgaiba ge māhe tsî ǁîb khoena ǁîn di khākhoen, Filisteǁînan nî hîkākāga ge hui. 6 Khoen ge ǂkhaisib di kronsan ge ǁîb danas ai ǂnûi, o ǁîba disidi di ǀoadisin ǁîn khākhoen dinab ge ǃgam ǃkhais ǃaroma koa tsî ǃKhūb ge mā bi ǀkhaegu ǃaroma ǃgôasiba ge mā bi. 7 ǁÎb ge ǁîb ǂnamipe hâ khākhoen hoana ge hîkākā. ǁÎb di khākhoen, Filisteǁînab ge tātsēs tsînan ǁkhawa ǁîb ǃoagu khâi tidese ge hîkākāǃari.
8 Davidi ge dīb gere xūn hoan ǃnâ ǃAnu ǃKhūb, Hoan xa ǀGapiba gangan tsî gere koa. ǁÎb ge ǁîb Kuru-aoba ge ǀnam i tsî hoaraga ǂgaob âb ǀkha ǁîba koatsanade gere ǁnaeba. 9 Davidi ge altars aiǃâ ǁnae-aoga, îsa ǁnaetsanade gu nî ǁnaega ge mâi. 10 ǁÎb ge ǁâudīb ǁaega hoaraga kurib ǃaroma ge ǂnûiǂui tsîb ge ǁîga ǂkhaisa ǁaegu ase ge dī; Tempeli ge ǃKhūb di koatsanadi xa hoaraga tsēsa gere ǀgana. 11 ǃKhūb ge Davida ǁorena ǀûba tsî ǁîb tsî ǁîb di ôananôagub nî ǂkhaisasib ǃnâ Israelǁaesa ǂgaeǂgui ǃkhaisa ge mîmâi. Nē ǀgaub aib ge ǃKhūba Davidi di ǀgaiba hānîǁaeb ǃaroma ge kaikai.
Salomob
12 Davidi ge ǁîb ôab, gā-ai khoeb, ǁîb khaoǃgâb ga gao-ao kai, o sâsa tsî ǃnorasase nî ǂgae-ǂgui ǃkhaisa ge aiǂhomi. 13 Salomob ge gao-ao i, ǁaeb ǃnâ i ge toro-e ge ǀkhai i. Elob ge hoa ǃhūǀgoradi ai ǂkhîba ge mā bi, îb ǀamose nî mâ Tempela ǃKhūba omba. 14 Salomotse, sats ge ǂkhamts asa xu kaise ge gā-ai i. Sa ǁnâuǃāb ge ǁîb ǀnomma ra dâu-īǀkhā ǃāb khami ge ī i. 15 Sats ge ǃhūbaib ǃnâ ǂanhe ǁkhā xū-i hoa-e a ǂan, tsî ǃgam ǂâibasende ūhâ ǂkhoamîdi ǀkha ǃhūbaiba ge ǀoaǀoa. 16 ǃNū ǃnāǃnuidi ais tsînan ge khoena sats xa ǂan. Sa khoen ge ǂkhîb ge ǃhūb ǃnâ hâ i, xui-ao ge ǀnam tsi i. 17 Sa ǁnaetsanadi, ǂkhoamîdi, ǂkhōdi tsî dîdi aits gere mā ǃereamdi tsîn ge ǂgui khoena ge burugâ kai. 18 Sats ge kaise ge ǃkhū tsî sa ǃkhūsiba ǃKhūb Elob, Israeli Elob ti ra ǀonǂgaiheb di ǃoaba-aots ase ge ǃkhōǃoa.
19 Xawets ge ǂgui tarekhoedi ǀkha ge ǁgoe tsîb ge sats ǁîde ūba hâ turaba, ǁîdi xats nî ǂgaeǂhapuhesa ge ǃaroma. 20 Salomotse, sats ge sa ǂanǂansasib tsî sa ôananôagub diba ge ǁgaiǁgai. ǃKhūb ge sats ge gâre, xui-ao ǁîna ge ǁkhara. ǁÎn ge sa gâ tanisens ǃaroma kaise ge tsâ. 21 Sa gâsiba xus ge ǀapasǀkhāb khoen ge khôaǁnâ tsîs ge Israelǁaesa ǀgorasa. 22 Xaweb ge ǃKhūba hugaǀgui ǀkhomxaǃnâ tsî ǁîb di mîmâidi hoade nî ǃkhōǀgara. ǁÎb ge Davidi di ôananôagub, ǁîb xa ge ǁhûiheb tsî ǁîba a ǀnamma tātsē hîkākā tide. ǁNā-amagab ge Jakob ǃaroma Davidi di ôananôaguba ûib ǃnâ ge ūhâ.
Rehabeammi tsî Jerobeammi
23 Salomob ge ǀomǀuni tsî ǁîb ôakha di ǀguiba, ǂgaeǂgui nîse ge ǁōǃgau. ǁNāb ge ge Rehabeam i, khoeb hîa ǂkhari gā-aisib tsî kai gâsib tsîna ge ūhâ ib, hîa ge khâikhâisensa ǁîb di ǀgaub ǀkha ǃaromaba.
ǁNāpab ge ǁkhāti ǁîb xa ǃhoahe ǁoa Jerobeammi hîa gere ǀapasǀkhāb Israeli diba ǁoreb ǃnâ ǂgaeǂguiba ge hâ i. 24 Jerobeammi di khoen ge ǁnātikōse ge ǁore tsî ǁîn di khākhoen xa ǃkhōsabese ǁîn di ǂhunuma ǃhūba xu ge ūbēhe. 25 ǁÎn ge ǁnātikō ǂguiǃnâgu ǀgaugu ǃnâ ge ǁore, egab ge ǃKhūba ǁîna sī ǁkharas kōse.
© Khoekhoegowab Elobmîs © Bible Society in Namibia, 2020.
