Josefi tsî ǁîb di ǃgâsagu
1 Jakob ge ǁîb îb ge ǁanǃnâ hâ i ǃhūb, Kanaani ǃnâ ge ǁan 2 tsî nēb ge Jakob surib xa hâ ǃnuriba:
Josefi ge disihûǀa kurixa ǂkham khoeb ase Bilhas tsî Silpas hâra, ǁîb ǃgâsagu, ǁgûb xōǀkhātarara ôagu ǀkha ǀgoana gere ǃûi. Tsîb ge ǁîba ǃgâsagu ra tsūse dī xūna ǁgûba hā gere mîba.
3 Jakob ge hoa ǀgôagu âb ǃgâ-ai Josefa kaise ge ǀnam i, kairasib âb ǃnâb ge ǁorabahe ǀgôab a xui-ao. ǁÎb ge gaxuǁôasaraba Josefa ge ǂomba. 4 Jakob ôagu ge Jakob Josefa ǁîgu ǃgâ-ai ǀnam ǃkhaisa mû, o gu ge ǁnātikōse ǁîba ge ǃhui, ǃgâi khoexaǃnâ ǀgaub ǃnâs tsîna gu ge ǃaruǀî ǃhoa-ū bi tama is kōse.
5 ǀGui ǃoeb ge Josefa ǁhapo-e ge ūhâ i. ǃGâsagab ge ǁhapos xa ǁgamba o gu ge îbe ge ǃhui bi. 6 Ob ge ǁîga ge mîba: “Tita go ūhâ i ǁhaposa ǃgâ re. 7 Sage ra ǃhoroǃgaeǀkhāde ǃgaeǀkhā hîas ge ti ǃgaeǀkhāsa ǂgōse go mâ. Sago di ǃgaeǀkhādi ge tisa mâǂnami tsî go ǃgamǃgâ.”
8 O gu ge ǃgâsaga ge dî bi: “Satsa kha ǂgaeǂgui-ao tsîts nî gao-ao kai ti ǂâi hâ?” Tsî gu ge îbe ǀnais ǃgâ-ai ǁhapodi tsî ǁîgu xab ge mî xūn xa ǃaromahe hâse ge ǃhui bi.
9 ǁNās khaoǃgâb ge Josefa ǁkhawa ǀnî ǁhaposa ge ūhâ i. Tsîb ge ǃgâsaga “ǀNî ǁhapos, ǁîs ǃnâ ta sores, ǁkhâb tsî disiǀguiǀa ǀgamirode tita ǃoan ǃhon hâse goro mûsa ta ge go ūhâ i” ti ge mîba.
10 ǁKhātib ge ǁîba ǁgûb tsîna nē ǁhaposa ge ǁgamba ob ge ǁgûba ǁîba nēti ge ǀau: “Tarebe ǁhapoǃnôa-e ǁnā-e? Satsa sa îs, sa ǃgâsagu tsî tita tsîn nî sa aiǃâ hā ǃhon ti ǂâi hâ?” 11 Josefi ǃgâsagu ge ǁîba gere suri, xaweb ge ǁîb îba nē hoaraga xūn xa gere ǂâi.
Josefi ge ǁamaxūhe tsî Egipteba ǃoa ra ūhe
12 ǀGuitsē gu ge Josefi ǃgâsaga Sexems ǁga ge ǃgû, ǁgûb ǀgoana sī nî ǃûise. 13 Ob ge Jakoba Josefa ge mîba: “Sa ǃgâsagu ǀgoan ǀkha hâ ǃkhaib ǁga a ta sî tsi re.”
Ob ge Josefa “Ā, ǃgâi a” ti ge ǃeream.
14 Ob ge Jakoba “ǃGû îts sa ǃgâsagu tsî ǀgoan tsîn ǃgâise hâ ǃkhaisa sī kō tsî mîba te hā” ti ra mî mîdi ǀkha Hebronsa xu ge sî bi.
Sexems tawa sī tsîb Josefa 15 ǁnāpa ra ǃgûma hîa i ge ao-e mû tsî “Tare-ets kha ra ôama?” ti ge dî bi.
16 Ob ge Josefa ge ǃeream: “Ti ǃgâsagu, nēpa ǀgoan âga ra ǃûiga ta ge ra ôa. Toxopa mâpa gu hâ ǃkhaisa mîba te re.”
17 Nē khoeb ge “ǁÎgu ge nēpa xu ge doe tsî Dotans ǁga gu ra ǃgû ti gere mî” ti ge mîba bi. Tsîb ge Josefa ǃgâsaga ǃgûǃgon tsî ǁîga Dotans tawa sī ge hō.
18 ǁÎgu ge Josefa gu ge ǃnūseba xu mûǃgoaxao, ǁîgu ǃnâ ǁîba ǃgamsa ge ǀapeǀhao. 19 Tsî gu ge “ǁNāb ge ǁhapo-aoba ǃgoaxa. 20 A ge ǃgam bi tsî soros âba ǂnâsa tsaudi di ǀguis ǃnâ aoǂgā. ǁÎb go ǁaixa ǀguru-i xa ǃgamhe ti ge ge a mî ǁkhā, tsî ge ge ǁîb ǁhapodi mâti nî hābahe ǃkhaisa nî mû” ti ge mîǀîgu.
21 Rubenni ge ǁnâub geo ǃgâsab, Josefa gere sâu ǂgao tsîb ge ge mî: “Tā ge ǃgam bi, 22 nē tsaus ǃnâ ǀgui aoǂgā bi, xawe tā tsûtsû bi.” Nēsab ge ǁîbab nî sâu tsî ǁgûb ǁga sî-oase ge mî. 23 Josefi ge ǃgâsagu tawa ǀkhī, o gu ge ǁîga gaxuǁôasarab âba ge ǂgaeǂuiǀkhā bi. 24 Tsî gu ge ǁnās khaoǃgâ ū tsî ǂnâsa tsaus ǃnâ ge aoǂgā bi.
25 ǂÛ gu ra ǂnôa hîa gu ge ǃnapetamase Gileada xu Egipteb ǁga garu Ismaelǁî ǁamaǂharugu-aoga ge mû. ǁÎgu di ǃnain ge ǃgâihamxūn tsî hairan tsîna ge ǃnao-aisa i. 26 Ob ge Judaba ǃgâsaga ge mîba: “Tare harebe-e i nî ūhâba ge sage ǃgâsaba ǃgam tsî ge ga ǁnā ǃkhaisa sâuo? 27 A ge nē Ismaelǁîgu ai ǁamaxū bi. O-i kom ǁîba ge nî tsûtsû ǃkhaisa ǂhâbasa tamao, ǁnās ǀguisa hî tama i tsîb kom ǁkhāti a sage ǃgâsa, sage di ǂhunuma ǀao tsî ǁgano.” O gu ge nau ǃgâsagu âba ǀhûǀgui 28 tsî ǀnî Midianǁî ǁamaǂharugu-aogu ge hāo Josefa tsausa xu ǂgaeǂui tsî Ismaelǁîgu ai ǀgamdisi ǀhaiǀurimaridi ai ge ǁamaxū, tsîn ge ǁîna Egipteb ǁga ge ū bi.
29 Rubenni ge oahāb ge ob ge Josefi tsaus ǃnâ ǀkhai ǃkhaisa mûo, ge kaise ǃoa tsî saran âba ge ǀkhau. 30 Ob ge ǃgâsagu tawa oahā tsî ge mî: “ǀKhai a axab ge! Tare-e ta nēsisa nî dī.”
31 O gu ge ǁîga piri-e ǂā tsî Josefi saraba ǀaob ǃnâ ge ǀhari. 32 Tsî gu ge gaxuǁôasaraba ū tsî ǁîgu îb tawa sī-ū tsî ge mî: “Nē saraba ge ge go hō; kō re sa ôab dib as tamas ka iob ǁîb di tama hâsa.”
33 Ob ge Jakoba saraba mûǃā tsî ge mî: “Ā, ǁîb di a! ǁAixa ǀguru-i ge ǁîba go ǃgam. Ti ôab, Josefi ge ǃâdi ǃnâ go ǀkhauǃāhe!” 34 Saran âba ǃoab xa ǀkhau tsîb ge Jakoba ǃoab sarana ge ǂgaeǂgā. Tsîb ge gaxu ǁaeba ôasab ǃaroma ge ǃoa. 35 Hoaraga ôasan âb ge ǁîban nî ǁkhaeǂgaose ge hā, xaweb ge ǁîba ǁkhaeǂgao kaisen ǂgao tama ge i tsîb ge “Tita ge ganupe ta ti ôab di ǁōb xa ra ǃoase ǁŌhân Hâǃkhaib ǃoa nî ǁgôa” ti mî tsî ǃaruǀî ǁîb ôab Josefi ǃaroma gere ǃoa.
36 On ge Midianǁîna Josefa gao-aob mâisagu di ǀguib, gao-ommi di ǃûi-aogu di danab, Potifari ai ge ǁamaxū.
© Khoekhoegowab Elobmîs © Bible Society in Namibia, 2020.
