ǁŌba xu sâuhe hâ khoe-i di koatsanas
1 Tita ge ǃKhūba a ǀnam,
ti ǀkhomabasensab ra ǁnâu-am xui-ao.
2 ǁÎb ge ǂgaes âba tiǀî ra ǂō
ǁnā-amaga ta ge ûi ta hâs kōse ǁîba nî ǂgaiǀî.
3 ǁŌb di ǃgae-ūdan ge ge ǃgaeǃnon te
ǃaob ǁŌhân Hâǃkhaib dib ge ge hāǂam te;
tsî ta ge ǀhūb tsî ǃoab xa ge hōhe.
4 O ta ge ǃKhūb ǀonsa ge ǂgaiǀî:
“ǃKhūtse, toxopa ti ûiba ore re!”
5 ǃKhūb ge ǀkhomxaǃnâ tsî a ǂhanu-ai
sada Elob ge a ǀkhomxaǂgao.
6 ǃKhūb ge ǀguiǃgupu khoena ra sâu;
ǂkhabu ta ge xaweb ge ǁîba ge sâu te.
7 Sâb ǃoa oa re ti ǀomse,
ǃKhūb go tita ǃgâidī xuige.
8 Ti ûibats ge ǁōba xu ge sâu;
ti mûra ǁgamroga xu tsî ti ǂaira ǃnôa ta nîsa xu.
9 Tsî ta ge ǃKhūb di ǀgūhâsib ǃnâ ra ǃgû,
ûitsaman di ǃhūb ǃnâ.
10 Tita ge ge ǂgomhâhâ, nēti ta ge mîo:
“Tita ge kaise ǁgâiǀāhe hâ.”
11 Tsî ta ge ti ǃaob ǃnâ ge mî:
“Hoaraga khoen ge a ǂhumi-ao.”
12 Tare-i ǀkha ta kha ǃKhūba nî mādawa-am
ǃgâidīgu titab ra dība gu ǂama?
13 Ores di ǀgabisa ūkhâi
tsî ta ge ǃKhūb di ǀonsa nî ǀgoreǀî.
14 Ti mîmâisa ta ge nî dīǀoaǀoa
ǃKhūb di ǁaes hoaragas aiǃâ.
15 ǁÎb di saoǃgonaon ǁōb
ge ǃKhūba kai ǂoaǃnâs ase ība.
16 ǃKhūtse amase ta ge a sa ǃgā
sa ǃgāta ge tita.
Sa ǃgās di ôata,
ǃgae-ūdana xuts ge ore ta.
17 Satsa ta ge ganganǁguibasa hā-ūba
tsî ǃKhūb ǀonsa nî ǂgaiǀî.
18-19 Ti mîmâisa ta ge nî dīǀoaǀoa,
ǃKhūb di ǁaes hoaragas aiǃâ.
ǃKhūb di ai-ommi ǃnâ,
Jerusalems ǁaegub ǃnâ.
Koa re ǃKhūba!
© Khoekhoegowab Elobmîs © Bible Society in Namibia, 2020.
