Davidi ge Saula xu ra ǁhâ
1 Davidi ge Nobs ǃnâ pristeri Ahimelexi tawa ge sī. Tsî Ahimelexi ge ǃaob xa ra ǀkhūse Davida ǃgûǃoa tsî ge dî: “Tare xū-i ǃaromats kha nēpa ǀguri go hā?”
2 Ob ge Davida pristera ge ǃeream: “Gao-aob ge mîmā-e mā te tsî go mî: ‘Tā i khoe-i xare-e ǂan tare-i ǃaroma ta ra sî tsi, tsî tare-e ta go mîmā tsi ǃkhaisa. Tita ge ti khoega go mîba mâpa gu tita ǀkha nî ǀhaosa.’ 3 ǂÛxū-e nēpa ūts hâ? Koro peregu tamas ka io ǀnî ǂûxū-i ūhâts ka-i hoa-e mā te re.”
4 Ob ge pristera Davida ge ǃeream: “Tita ge ǁnaetisa pere-e ūhâ tama hâ, ǁguibapere-i ǀgui-e ta ge ūhâ. ǁÎ-e go ge a hō ǁkhā, xawe sa khoegu ga nē ǁaeb ǃnâ khoede xu ǁkhaesen hâo ǀgui.”
5 Ob ge Davida pristera ǃoa ge mî: “Ti khoegu ge amase khoede xu ǁkhaesen hâ. ǁÎgu ge a ǃanu, ǃgûǂoa ge ra ǃnās hoasa i ī khami; ǁnâi mâtikō ǃnāsase gu a ǃanu nē ǀō-aisa soab ai.”
6 Ob ge pristera ǁguibaperega ge mā bi, ǀnî pere-i ge ǁnāpa ǀkhai i xui-ao, ǁguibaperegu ǀasagu ǀkha gu nî ǃkhōǃkhunihese Tabernakela xu ge ūǂuihegu ǀguigu ge ge hâ i. Tabernakeli di ǂganagab
7 Sauli ǀgoan ǃûi-aogu di danab, Doeg ti ǀon hâ Edomǁîb ge ǁnātsē ǁnāpa Tabernakeli ǃnâ, ǃoaba nîse ge hâ i.
8 Davidi ge ǁkhāti Ahimelexa ge mîba: “Nēpa ǁhâigôab kas, ǀnî gôab kas hoasa ūhâ tamats hâ? Tita ge ti gôab kas, ǀnî ǁâtani-i kas hoasa ūsao tama go i, gao-aob mîmās go kaise ǃnoesa i amaga.”
9 Ob ge pristera ge ǃeream bi: “Goliati, Filisteǁîb, sats ge ǃGoaǃnāb Elab ǃnâ ǃgammi di gôab ge nēpa lapib ǃnâ ǃgamisase efodi ǃgâb ai hâ. ǁÎbats ga ū ǂgao-o, ǁnâi ū, ǀnî ǀā xū-i a ǀkhai, ǁîb ǀguib hâ xuige.” Ob ge Davida “ǁÎb khami īb a ǀkhai. Mā te bi” ti ge mî.
10 Davidi ge ǂhomisen tsî ǁnā tsēs ǁkhās ai Saula xu gao-aob Akisi Gats dib ǁga ge ǃhū. 11 O gu ge Akisi ǂamkhoega gao-aob ǃoa ge mî: “Nēba kha Davidi, ǃhūb âb gao-ao tamaba? ǁÎb xas kom ǁnae tsî ra ǂnāse di ge ‘Sauli ge ǁîb ǀoadisiga ge ǃgam, xawe Davidi ge ǁîb disiǀoadisiga ge ǃgam’ ti gere mîba.”
12 Tsî Davidi ge nē mîdi xa ge ǂhanihe tsî kaise Gats gao-aob, Akisi xa ge ǃao. 13 ǁNā-amagab ge Davida ǁîgu ais ai danaǀgaru hâ khami dīsen tsî ǁkhae bi ǂgao gu gere, o gere ǃkhauǃkhausen. ǁÎb ge dao-amdi ai xaro tsî tsāb âba ǀhō-ammi ai gere ǂnâ kai. 14 Ob ge Akisa ǁîb ǂamkhoega ǃoa ge mî: “Kō, nē khoeb ge sago tsîn ra mûse ǃkhau hâ. Tare xū-i ǃaroma go ǁîba tita ǃoa go ūhā? 15 ǂÂu hâ kō ǃkhau hâna ta ǀnai ūhâ tama, o go nēba tita ǃoa go hā-ū, ti ais aib hā nî ǃkhauǃkhausenga? Tā ǁîba ti oms ǃnâ ǂgâxa kai.”
© Khoekhoegowab Elobmîs © Bible Society in Namibia, 2020.
