Antioxub Hûǁîb ge Simonni di mâxōǀkhāsa ra ǂgan
1 Grike ǃnāǃnuide xub ge gao-aob Demetriub ôab Antioxuba sao ra sîǂkhanisa, Jodeǁîn di ǀgapiprister tsî ǂgaeǂgui-aob Simonni tsî hoaraga ǁaes ǃoa ge xoa:
2 “Gao-aob Antioxuba xu ǀgapiprister tsî ǂgaeǂgui-aob Simonni tsî hoaraga Jodeǁîn ǃoa hâ tawedes. 3 Sago tsîn ǂanseb ge ti aboxagu di gaosiba ǀapexū-aogu xa ge ǁkhâuǁnâhe. Tita ge ǁîba ta ū-oa tsî ǀnaib ge ī i ǀgaub ai omkhâi ǃkhaisa ge mîǁgui. Tita ge ǂgui ǀkhupitoroǃkhamaogu ǀkha toroǂnubisa ǂnubikhâi tsî torodoe-omdi tsîna nî ǂhomi. 4 Tita ge ǃhūb ǃnâ ǂgâ tsî ta nî ǁnān, hîa ge ǂgui ǃādi tsî ǃhūb tsîna hîkākāna ǁnāǂam ǃkhaisa ra ǀape.
5 “ǁNā-amaga ta ge ti aiǃâ ge hâ i gao-aogu ge matare kai du ǁgui-aimarina xu ta nî ǃnoraǃnora du ǃkhaisa ra ǁapoǁapo. 6 Tsî ta ge sadu ǂhunuma marina du nî sadu ǃhūb ǃnâ kuru ǃkhaisa ra mā-am du. 7 Jerusalems tsî Tempeli tsîn ge ǁgui-aimarina xu nî ǃnoraǃnorahe. Hoaraga ǁâtanin sago ge kurun tsî ǀgaisa hâǃkhaigu sago ge om tsî nēsi ūhâgu ge sago dise nî hâ. 8 Gao-aosi ǁuiǂgaes surudehe hân hoan tsî ǃgoaxaǁaeb ǃnâ nî hâse i suruden tsîn ge hoaragase nî xoaǁnâhe. 9 Tita ga ti gaosiba hō-oa, o ta ge sadu, sadu ǁaes tsî Tempeli tsîna kai ǃgôasiba nî mā. Ob ge hoaraga ǃhūbaiba mâtikōse du sado a ǃgôaǃgôasa ǃkhaisa nî ǂan.”
10 ǀGuikaidisi tsî hûdisihakaǀaǁî kurib ǃnâb ge Antioxuba aboxan ǃhūba ge ǁnāǂam. ǂGui toroǃkhamaogu ge ǁîb ǁga ge ǃgâuxa tsî gu ge kaise ǀoroga Trifob ǀkhā ge ǃgau. 11 Trifob ge Antioxub xab ge ǃgôaǃgonhe, o huri-am ǃās Dors ǃoa ge ǃkhoeni. 12 ǁÎb di toroǃkhamaogu ge bēxū bi tsîb ǃgomsigu xa xāǂgāhe hâ ǃkhaisab ge ge ǂan. 13 Antioxub ge ǀguikaidisi tsî ǀgamdisiǀoadisi ǁkhāǁkhāǂuisa toroǃkhamaogu tsî ǁkhaisaǀoadisi hātoroǃkhamaogu ǀkha hâǃkhaiba Dors ǃoagu ge ǂnaumâi. 14 ǁÎb ge ǃāsa ǃnamiǂgā; doe-omgu ge hurib ǀkhāba xu torob ǃnâ gere ǁhao, tsîb ge ǃāsa ǃhūb tsî huriba xu ǁgâiba ge mā tsî i ǀgui khoe-i tsîna ǃāsa xu ǂoa tamas ka io ǁîs ǃnâ ge ǂgâ ǁoa i.
Romeǁîn ge Jodeǁîna ra mâxōǀkhā
15 Numeniub tsî ǁîb ǀkha ge hâ i khoen ge ǁnā ǁaeb ǃnâ Romesa xu Jerusalems ǃnâ sao ra sîǂkhanis, gao-aogu tsî ǃhūgu ǃoa xoahe hâs ǀkha ge sī:
16 “Romes di ǂnûǁkhaeba-aob Lusiuba xu gao-aob Ptolemib ǃoa hâ tawedes. 17 Jodeǁîn ge sida ǃoa sida horesa tsî ǃgaeǀhaosa dī-ūhe hâ khoen ase, ǀnai ge hâ i khoexaǃnâsib di ǃgaeǀhaosa nî ǀasaǀasase ge hā. ǁÎn ge ǀgapipristeri Simonni tsî Jodeǁîn xa ge sîhe 18 tsîn ge ǀkhaeb ase korokaidisi kiloxramga ǃgom ǃhuniǀuri ǁkhaukhōsa ge hā-ū. 19 ǁNā-amaga ge ge ǃkharaǃnâgu gao-aogu tsî ǃhūgu ǃoa ge nî xoa ǃkhaisa mîǁgui tsî ǁîga Jodeǁîn, ǁîn ǃādi tamas ka io ǁîn di ǃhūba gu ǂkhôa tide ǃkhaisa ge ǂanǂan. A gu tā Jodeǁîn ǃoagu nî torodī tamas ka io ǁnān ǁîna ra ǁnāǂamna mâxōǀkhā. 20 Sige ge ǁkhaukhōsa ge nî ūǃoa tsî ǁîna sâu ǃkhaisa ge mîǁgui. 21 Tsî gu ga ǀapexū-aoga Judeaba xu ûiǂoa tsî sadu ǃhūb ǃnâ ǁanǃkhai-e ôa, o ǁîga ǀgapipristeri Simonni ai māǁnâ, îb ǁîba Jodeǁîn di ǂhanub ǃoa ǁîga ǁkhara.”
22 Lusiub ge ǁkhā sîǂkhanisa gao-aob Demetriub, Atalub, Ariarateb, Arsakeb hâgu 23 tsî sao ra hoaraga ǃhūgu: Sampsamesi, Spartab, Delosi, Mindosi, Sikionni, Kariab, Samosi, Pamfiliab, Lisiab, Halikarnasub, Rodesi, Faselisi, Kosi, Sideb, Aradusi, Gortinab, Knidus, Siprus tsî Sireneb tsîna ǃoa ge xoa. 24 ǀGapipristeri Simonni tsîn ge ǁkhāti ǁnā sîǂkhanis di ǁgâiǁnâba ge sîbahe.
Antioxub Hûǁîb ge Simonna xu ge khôa
25 Gao-aob Antioxub ge ǀgamǁî ǃnāsab Dorsa nî ǁnāǂamse, hâǃkhaiga ge ǂnaumâi. ǁÎb ge torodī-ūb nî ǃkhamūxūna kuru tsî Trifoba ǂgâ tamas ka iob ǂoa tidese ge ǁkhaeǂgā. 26 Simonni ge ǃgâise ǁkhāǁkhākhâisa toroǃkhamaoga Antioxuba nî huise tsî ǁîba ǁkhāti ǀhaiǀurib tsî ǃhuniǀurib tsî ǂgui torob ǁâtanin tsîna nî māse ge sî. 27 Antioxub ge nē xūna ūǃoasa ge ǂkhā tsî ǀnaib ge Simonni ǀkha dī hâ i ǂnûiǂgāde mîǁnâ tsî ge Simonni di khākhoe kai. 28 Antioxub ge ǁîb di ǂgomǂgomsa ǂgaeǂgui-aob Atenobiuba, Simonni ǀkha nî ǃhoaǁarese ge sî. ǁÎb ge Simonni ǃoa “Sats ge ti gaosib di ǃādi tsî Jopas, Gesers tsî ǁkhui-ommi Jerusalems ǃnâ hâb tsîna ǂgaeǂgui hâ. 29 Sats ge ǁnā ǀkhariga hîkākā tsî kai ǂkhôaba ǃhūb ǃnâ ge hā-ū. Tsîts ge ǂgui ǃādi ti gaosib dide ge ǁkhâuǁnâ. 30 Nēsisats ge ǁkhâuǁnâts ge ǃāde nî mā-oa tsîts ge Judeab ǃhūǀgoras tawats ge ǁkhâuǁnâ hâ i ǃāde xuts ge ū ǁgui-aimarin tsîna nî mā te. 31 Nēsats ga dī ǂgao tama i, ots ge disihûǀaǀoadisi kiloxramgu ǀhaiǀurib tsî noxopa dīts ge ǂkhôagu tsî ǂoaǃnâ ta ge ǁgui-aimarin di mādawa-ams ǃaroma ǀnî disihûǀaǀoadisi kiloxramgu ǀhaiǀuriba nî matare te. ǁNā tamas ka i, o ta ge sats ǃoagu nî torodī.”
32 Atenobiub ge Jerusalems ǃnâ hā tsîb ge Simonni hâǃkhaib di ǂkhaisasib, ǃhuniǀuri tsî ǀhaiǀuri xapana, ǁâudīb ommi ǃnâ tsî kai ǃkhūsib di ǁgauǂuisa a mû, o ge burugâ. Simonnab ge gao-aob di haisi-amsa a mā, 33 ob ge Simonna ge ǃeream: “Sida ge tātsē ǀnî ǁae-i di ǃhū-i tamas ka io ǀnî khoe-i di xū-e ū tama hâ. Sida ge sida aboxaga xu da ge ǀumi hâ i xūn, ǂhanuoǃnâse ge khākhoen xa sida xu ūhe hâ i ǃhūb ǀguiba ge ū-oa. 34 Sige ge sida aboxagu di ǀumisa da nî hō-oa ga nē ǃēsa ra sîsenū. 35 Jopas tsî Gesers tsîra sago sige ra ǂgaoǀkhāra ǃaroma ge ge ǁnā ǃāra di khoen ge sida ǁaesa ǂkhôa, xawe ǃnonaǀoadisihakakaidisi kiloxramgu ǀhaiǀuriba nî mā tsi.”
Atenobiub ge ǃeream tama ge i, 36 xawe ǁaib ǃnâ gao-aob ǃoa ge oa. Tsî gao-aobab ge Simonni ge mî xūn tsî Simonni hâǃkhaib di ǂkhaisasib tsî mûb ge xūn xa mîba, ob ge gao-aoba kaise ge ǁaixa. 37 ǁNā ǁaeb ǃnâb ge Trifoba doe-om-i ai ǂoa tsî Ortosias ǃoa ge ǁhaini. 38 Gao-aob Antioxub ge Sendebeuba ǃkhōdana-aose huri-amǀkharib ǃaroma ǁgaumâi tsî ǁîba ǀnūtoroǃkhamaogu tsî hātoroǃkhamaogu tsîna mā 39 tsî Judeab ǃoab nî torodīǃgû ǃkhaisa ge mîmā. ǁKhātib ge ǁîba Kedronsab nî ǁkhawa ǂnubikhâi tsî dao-amdi âsa Jodeǁîn ǃoagub nî ǃkhamga ǀgaiǀgai ǃkhaisa ge mîmā. Gao-aob ge Trifoba ge ǃgôaǃgontsoatsoa.
40 Sendebeub ge Jamnias ǃnâ hā tsî Jodeǁîna ǁgaritsoatsoa tsî Judeaba ǁnāǂam, khoena ǃkhōsis ǃnâ ū tsî ǁîna ge ǃgam. 41 ǁÎb ge Kedronsa ǁkhawa ǂnubikhâi tsî hātoroǃkhamaogu tsî ǀnūtoroǃkhamaogu tsîna ǁnāpa xu gu nî ǁnāǂamde dī tsî Judeab daoga, gao-aob ge mîmā khami ǃûi ga ge hâ kai.
© Khoekhoegowab Elobmîs © Bible Society in Namibia, 2020.
