Petrub ge ǃereamsa ra ǂgaoǀkhāhe
1 Tsîn ge apostelgu* tsî nau ǂgomsaben Judeab ǃnâ hân tsîna Jodeǁî taman* ge Elob di mîsa ǃkhōǃoa ǃkhaisa ge ǁnâu. 2 Tsî Petrub ge Jerusalems tawa oaǀkhī on ge Jodeǁîn hîa Jodeǁî taman di ǃgaohes* ǃnâ ǂgom hâna ǁîba ge mâǃoa. Tsîn ge 3 “Sats kom Jodeǁî taman ǃgaosa taman di oms ǃnâ ǂgâ tsî ǁîn ǀkha goro ǂûǀhao-o” ti ge mî.
4 Ob ge Petruba ǁîna tare-i ge ī ǃkhais di ǀoasa ǃnuriba ge mā: 5 “Jopas ǃnâ ta ra ǀgore hîa ta ge ǃgam ǂoms ǃnâ ǁnā tsî ǁhapos ǃnâ ai-e ge mû. Kai ǃkhai-i khami ī xū-i hîa haka ǀamdi ai ǃgaesa-i ge ǀhomma xu ǁgôaxa tsî ti ǀgūse ge mâ. 6 Tsî ǁnā ǃkhaib ǃnâ ta ge kō, o ta ge ǂgui ǃkharagaǃnâgu ǀgurun, xamarin, ǂhanaben tsî ǃkharagaǃnâgu ǀhomaniǃnôan tsîna ge mû. 7 Tsî ta ge dom-i ‘Petrutse, khâimâ îts ǂā tsî ǂû’ ti ra mî-e ge ǁnâu. 8 O ta ge ‘Tātsē, ǃKhūtse, tita ge ǃanuoǃnâ xū-e ti ams ǃnâ ǂgātsâs tsîna hî tama hâ’ ti ge ǃeream. 9 Xaweb ge nē domma ǁkhawa ǀhomma xu tita ǁga ‘Tā Elob ga ǃanu a ti mî xū-e satsa ǃanuoǃnâ a ti mî’ ti ge mî. 10 Nēs ge ǃnona ǃnādi kōse ge ī tsîb ge ǁnās khaoǃgâ nē ǃkhaiba ǀhommi ǁga ge ǂgaeǃapahe. 11 Tsî ǁnā ǁaeb ǂûb ai gu ge ǃnona khoegu hîa Kaesareasa xu sîhe hâga tita ra hâ oms tawa ge sī. 12 ǃAnu Gagab ge ǁîgu ǀkha ta nî ǃgû tsî ta ǁîgu Jodeǁî tama ǃkhais xa kaise ǂâiǂhansen tide ǃkhaisa ge mîba te. Tsî gu ge nē ǃnani ǃgâsaga tita ǀkha ge ǃgû tsî ge ge ǁnāb hîa ge tita sîb di oms tawa ge sī. 13 Tsîb ge ǁîba mâti i ǀhomǃgā-e oms âb ǃnâ ǁîba ǂhai tsî ǁîba ‘Khoega Jopas ǁga sî re, î gu Simon Petruba sī ôa. 14 ǁÎb ge mâtis sats tsî sa omaris tsîna orehe ǁkhā ǃkhaisa nî mîba tsi!’ ti ge mîba bi ǃkhaisa sige ge mîba. 15 Tsî ǃhoatsoatsoa ta ra hîab ge ǃAnu Gagaba ǁîna sadab ge tsoatsoas ǃnâ hāǂams ǁkhās khami ge hāǂam. 16 Tsî ta ge ǁnā ǁaeb ai ǃKhūb di mîdi hîa nēti ra mîde ge ǂâihō: ‘Johaneb ge ǁgam-i ǀkha gere ǁāǁnâ, xawe du ge sado ǃAnu Gagab ǀkha nî ǁāǁnâhe.’ 17 Tsî Elob ga nē Jodeǁî tamana ǁkhā mās, ǃKhūb Jesub Xristub* ǃnâ da ge ǂgom tsēs aib ge sada tsîna māsa a māo, tita ǁnâi tarita, o ta Eloba nî mâǃoa?”
18 Tsî nēsan ge ǁnâu on ge hoaragana ǃnō tsî Eloba ge karetsoatsoa. Tsîn ge “Elob kom Jodeǁî taman tsîna ǀamo ûib ǃoa hâ ǃhobasensa ge māo” ti gere mî.
Antioxias di kerkheb
19 ǀNî ǂgomsaben ǀgaruǀgaruhe gen, ǃgôaǃgons hîa Stefanub ge ǃgamhe ǁaeb ǃnâ ge hâ is ǃnân ge Fonisiab, Siprus tsî ǁkhāti Antioxias kōse ge sī, Jodeǁîn ǀguina nî mîsa aoǁnâbase. 20 Xawe gu ge ǀnî ǂgomsabegu Siprus tsî Sireneb diga Antioxias ǁga ge ǃgû tsî ǃGâiǂhôas ǃKhūb Jesub disa Grikeǁîna ge aoǁnâbatsoatsoa. 21 Tsî Elob di ǀgaib ge ǁîn ǀkha ge hâ i tsîn ge kai ǃgôab di khoena ǂgom tsî ǁîn di ûiga ǃKhūb ǃoa ge dawa.
22 Tsî Jerusalems di kerkheb ge nē go ī xūnan ge ǁnâu, o Barnababa Antioxias ǁga ge sî. 23 Sī tsîb ge Elob ǀkhommi di ǁgauǁgaude mû, ob ge kaise ǃgâiaǂgao tsî ǁîna ǃaruǀîǀgui ǃKhūba ǂgomǂgomsase ǂgaogu ân hoan ǀkha ûibasa gere ôa-ôaǃnâ. 24 Barnabab ge ǃgâi, ǀgaisa ǂgomsa ūhâ tsî ǁkhāti ǃAnu Gagab xa ge ǀoa hâ i khoeba. Tsîn ge kai ǃgôab di khoena ǃKhūb ǃoa ge ūhāhe.
25 ǁNāpa xub ge Barnababa Tarsus ǁga ge ǃgû, Saulubab sī nî ôase. 26 Tsî ǁîbab ge hō, ob ge Antioxias ǁga ge oaǀkhī-ū bi. Kurib ǁaeba kha ge ǁîkha ǁnāpa kai ǃgôab di khoen kerkheb dina ra ǁkhāǁkhāse ge hâ tsî Antioxias ǃnâs ge ǁkhāǁkhāsaben* ge ǂguro ǃnās ase Xristeǁîn ti ǂgaihesa.
27 Tsî ǁnā tsēdi ǃnâ gu ge ǀnî kēbo-aoga Jerusalemsa xu Antioxias tawa ge sī. 28 Tsîb ge ǁîgu ǀkha ge hâ i ǀguib, Agabub ti ge ǀon hâ iba Gagab xa ǂgaeǂguihe hâse, ǃgoaxaǁaeb ǃnâ nî hoaraga ǃhūbaib ǃnâ hâ kai ǃâtsūǀkhā-e ge aimûǀgaru. Tsîs ge nēsa Kaesari Klaudiub ǁaeb ǃnâ ge ī. 29 On ge Antioxias ǃnâ ge ǁan hâ i ǁkhāǁkhāsabena ge mîǁgui tsî i ge mâ-i hoa-e ǁî-i di ǁkhāsib ǃoa ū-i hâ xū-e ge mā, ǁîn di ǃgâsa ǂgomsaben hîa Judeab ǃnâ hâna nî huise. 30 Tsîn ge Saulub tsî Barnabab tsîkha nē māsa xūn hoana Jerusalems ǃnâ hâ kerkheb di ǂnomdomna* nî sī māse ge ǂgomǃgâ.
© Khoekhoegowab Elobmîs © Bible Society in Namibia, 2020.
