Koa tsî gangantsanas
ǁNaeǃnans ǂgaeǂgui-aob ǃoa:
Davidi Psalms
1 Dâba re Eloba ǃhūbaits hoatse!
2 ǃGôasib ǁîb ǀons diba ǁnaeba re!
Anub hâ ǃgôasiba mā bi re.
3 Eloba mîba re:
“Mâtikōse gu a ǃaoǃaosa sa sîsenga?
Sa ǀgaib di kaisib ǃaroman ge sa khākhoena sa aiǃâ nî ǃhon.
4 Hoaraga ǃhūbaib ge ǃhon
tsî satsa ra koaǁnaeba,
sa ǀonsa ra koaǁnaeba.”
5 Hā î Elob sîsenga hā kō re
ǁîb ge sîsengu âb ǃnâ a ǃaorosa, khoen ôan ǁaegu.
6 Huribab ge ǂnâsa ǃhūb ǃnâ ge ǀkharaǀkhara
tsîn ge khoena ǀnūb ǀkha ǃāba ge ǃgûǃgâu.
O da ge ǁnāpa ǁîb ǃnâ ge ǃgâiaǂgao.
7 ǁÎb ǀgaib ǀkhab ra ǀamose gaosîsen
mûra âb ge ǁaede ra ǃûi,
în mâǃoaxa khoena tā ǁî-aitsama ǀgapiǀgapisen.
8 Sada Eloba koa re ǁaeso
ab ǁîb koas di ǀganaba ǁnâuhe.
9 ǁNāb sada ûib ǃnâ ra mâib
tsî sada ǂaidi nî ǁnobesa ge mā-am tama iba.
10 Elotse sats ge sida ge ǃâitsâ
tsîts ge ǀhaiǀurib khami ge ǃanuǃanu da.
11 Sats ge ǁnoasa ge ǁguiba da
tsî ǃgomma ge ǃnao-ai da.
12 Sats ge khoena sida danadi ai ge ǃgapi kai
ǀaes tsî ǁgam-i ǃnâ da ge ge ǃkharu
tsîts ge ǃnāǂamsasib ǀkha ge ūǂui da.
13 Sa ommi ǃnâ ta ge khauǁguibadi ǀkha nî ǂgâ
tsî ti mîmâide nî matare tsi.
14 Ti amǁgaukha xu ge ǂoaxa mîdi
ti ams ge ǂōǂōsib ǃnâ ta hâ hîa ǃhoade.
15 Kaukausan di khauǁguibade ta ge nî hā-ūba tsi
baigu di ǀanǀanǁguibadi ǀkha.
Goman tsî pirina ta ge ǀguipa nî ǁguiba.
16 Hā î du ǃgâ re, Eloba ra ǃaoǃgâdu hoado,
î ta tarenab ge tita dība ǃkhaisa mîba du.
17 Ti ams ǀkha ta ge ǁîba ge ǂgaiǀî,
ǁîb di koas ge ti nams ai ge hâ i.
18 Ti ǂgaob ǃnâ ta ga ǂkhababa ǂâi hâ,
ob ge ǃKhūba ga ǃgâ te tama hâ.
19 Xaweb ge Eloba tita ge ǁnâu;
ǁîb ge ti ǀgoresa ge ǁnâu-am.
20 Ab Eloba koahe re,
ti ǀgoresa ǂkhā tama
tsî ǁîb di hâhâ ra ǀnamma tita xu ūdawa tamaba.
© Khoekhoegowab Elobmîs © Bible Society in Namibia, 2020.
