Koraxi, Datanni tsî Abiram hâgu khâikhâisens
1-2 Isari ôab Koraxi, Kohati ǃhaoǃnās, Levib ǃhaos disa xu hâb ge Moseb di ǂgaeǂguis ǃoagu ge khâikhâisen. ǁÎb ge Rubenni ǃhaosa xu hâ ǃnona khoegu: Eliab ôakha Datanni tsî Abiram hâkha, Peleti ôab Onni tsî ǀnî ǀgamkaidisi tsî korodisi Israelǁî, ǂanǂansa ǂgaeǂgui-aogu ǀhûhâsib xa ge ǁhûihegu tsîgu xa gere ǂkhâǃnâhe. 3 ǁÎgu ge Moseb tsî Aron hâkha aiǃâ hā ǀhao tsî ge mî: “Sida ge nēsa ǃaruǀî mā-am tide! Hoaraga ǀhûhâsib ge a ǃKhūb di, tsîb ge ǁîba sada hoada ǀkha hâ. Sats Mosetsa, tare-i ǃaroma ǃKhūb di ǀhûhâsib ǂama ra ǂnûisen?”
4 Moseb ge nēsab ge ǁnâu, o ǃhūb ai aoǁguisen tsî ge ǀgore. 5 Tsîb ge Koraxi tsî ǁîb sao-aon ǃoa ge mî: “ǁArikamǁgoagab ge ǃKhūba tari-i a ǁîb di ǃkhaisa nî ǁgau da, ǁnās ge ra ǂâibasen, ǁîb ge ǁhûiǂuib ra khoeba altars tawa nî sī kai. 6-7 ǁArikamǁgoaga sats tsî sa sao-aon tsîdo ǀaepanga ū, î ûitsama ǂnomdi tsî ǃgâihamxū-i tsîna ǁîgu ai ǂnûi, î altars tawa sī-ū. O da ge nî mû tari-eb ǃKhūba sada xu nî ǁhûi ǃkhaisa. Sadu Leviǁîdu ǃaromasa i ge nēsi go ǂâu!”ǀAepanga ū…î altars tawa sī-ū
8 Moseb ge ǃaruǀî Koraxi ǃoa ge mî: “Sa Leviǁîdo ǃgâise ǃgâ te! 9 Israeli Elob ge sado nau khoen hoana xu ǀguri ǃKhūba du nî ǀgū ǁkhā, tsî ǁîb Tentommi ǃnâ ǃoaba, tsî ǀhûhâsiba ǃoabase ǁhûiǂui ǃkhaisa du kha ǁau xū-i ase ra ǃgôa? 10 ǁÎb ge sadu tsî nau Leviǁîn hoana nē ǃgôaǃgôasa ǃoabas ǃaroma ge khai, tsî du ge noxopa pristersisa ra ǂhâba! 11 Aronni ǃoagu du ga sadu ǂkhîoǃnâsiba gowaǂui, o du ge nî ǂan, sats tsî sa sao-aon tsîn ra ǃKhūb ǃoagu khâikhâisen ǃkhaisa.”
12 ǁNās khaoǃgâb ge Moseba, Datanni tsî Abiram hâkha ge ǂgai kai, xawe kha ge ǁîkha ge mî: “Sī khom tide! 13 ǂÂu tama i kha hâ, sats ge sida ǂûtanixa Egipteba xu nē ǃgaroǃhūb ǃoa, ǁō da nîse ǂgaeǂguiǂui ǃkhaisa? Sida ǂamats kha ra gaosîsen ǂgao? 14 Amasets kha sida ǂûtanixa ǃhūb kōse ǂgaeǂguisī tama i, tsî ǃhanagu tsî draibeǃhanaga sida dise mā da tama ge i, tsîts kha nēsisa sida ra ǂgaeǂhapu ǂgao. Sī khom tide!”
15 Moseb ge ǁaixa tsî ǃKhūb ǃoa ge mî: “Tā ǀguis khami ī ǁguiba-i nē khoen ra ǀkhī-ū-i tsîna ūǃoa. ǁÎn di ǀgui-i tsîna ta ge tsūse ûi-ū tama hâ; ǁîn dâukin di ǀgui-i tsîna ta ū tama.”
16 Moseb ge Koraxi ǃoa ge mî: “ǁArits ge sats tsî sa ǀgamkaidisi tsî korodisi sao-aon tsîdo ǃKhūb di Tentommi tawa nî ǀkhī; Aronni tsîn ge ǁnāpa nî hâ. 17 Mâ-i hoa-i ge ǁî-i ǀaepanna ū, ǃgâihamxū-e ǁîb ai dī tsî altars tawa nî sī-ū.” 18 ǁNā-amaga-i ge mâ khoe-i hoa-e ǁî-i ǀaepanna ū, ûitsama ǂnomdi tsî ǃgâihamxū-i tsîna ǁîb ai dī tsî Moseb tsî Aron hâkha ǀkha ǃKhūb di Tentommi ǂgâ-ams tawa sī ge mâ. 19 Ob ge Koraxa hoaraga ǀhûhâsiba ge ǀhaoǀhao tsîn ge Moseb tsî Aron hâkha ǃoagu ǃKhūb di Tentommi ǂgâ-ams tawa ge mâ. ǁNātimîsib ge ǂkhai ra ǃnâb ǃKhūb diba hoaraga ǀhûhâsiba ge ǂhai, 20 tsîb ge ǃKhūba Moseb tsî Aron hâkha ǃoa ge mî: 21 “Nē khoena xu mâ-oa, tita ge ǁîna nēsi nî hîkākā.”
22 Xawe kha ge Moseb tsî Aron hâkha ǁîkha aira ǀkha ǃhūb kōse ǃhon tsî ge mî: “Elotse, sats kom ûib di ǀautsao. ǀGui khoe-i go ǁore, ots kha hoaraga ǀhûhâsib ǀkha ra ǁaixa?”
23 Ob ge ǃKhūba Moseb ǃoa ge mî: 24 “Khoena mîba, în Koraxi, Datanni, tsî Abiram hâgu tentomde xu mâbē.”
25 ǁNās khaoǃgâb ge Moseba Israeli ǂgaeǂgui-aogu xa ǁnūhe hâse Datanni tsî Abiram hâkha tawa ge sī. 26 ǁÎb ge ǀhûhâsib ǃoa ge mî: “Nē ǂkhaba khoegu di tentomde xu mâbē, î ǁîgu di xū-i hoa-e tā tsâǀkhā. ǁNā tamas ka i, o du ge ǁîkha ǁoren ǃaroma ǁîkha ǀkha nî hîkākāhe.” 27 ǁÎn ge ǁnātimîsi Koraxi, Datanni tsî Abiram hâgu di tentomde xu ge bē. Datanni tsî Abiram hâkha ge ǁîkha taradi tsî ǀgôan tsîn ǀkha Tentommi di ǂgâ-ams tawa sī ge mâ. 28 Moseb ge khoen ǃoa ge mî: “Nēb ge ǀgaub ǁîb ai du ǃKhūb ge tita sî tsî ta nēn hoana ra dī ǃkhaisa nî ǂanna, xawe ta ge tita xu aitsama ǁîna dī tama hâ isa. 29 Nē khoegu ga Elob xa ǁkharahe tamase hoaǃnā-aixase ǁō, ob ge ǃKhūba tita sî tama hâ. 30 Xaweb ga ǃKhūba noxopa ǁnâuhe tama xū-e dī, tsîb ga ǃhūba ǁkhowa-amsen tsî ǁîga ǁîgu ū-hâxūn hoan ǀkha haraǂgā, ûitsamase gu ǁŌhân Hâǃkhaib ǃnâ nî ǁgôase, o du ge nî ǂan ǁîgu ge ǃKhūba ǂhara ǃkhaisa.”
31 ǁÎb ra ǃhoatoa hîab ge ǃhūba Datanni tsî Abiram hâkha mâpa ǁkhowa-amsen 32 tsî ǁîkha tsî ǁîkha ǀaokhoen hoan, tsî Koraxi hoaraga sao-aon tsî ǁîn di ūhâxūn tsîn hoana ge haraǂgā. 33 ǁNātin ge ǁîna ûitsamase ǁŌhân Hâǃkhaib ǃnâ ǁîn di ūhâxūn hoan ǀkha ge ǁgôa. ǃHūb ge ǁîn ǂamai ge ǂganamsen tsîn ge ǁîna ge kābē. 34 Israelǁîn ǁnāpa ge hâ in hoan ge khoen di āban ge ǁnâu, o ge ǃkhoebē. ǁÎn ge “ǃKhoe! ǃHūb ge ǀnîsi sada tsîna nî haraǂgā!” ti gere ǃau.
35 ǁNās khaoǃgâb ge ǃKhūba ǂhubi ra ǀaeb, ǀgamkaidisi tsî korodisi khoen, ǃgâihamxūna gere ǁguibana ge ǂhubiǂuiba ge sî.
ǀAepangu
36 Ob ge ǃKhūba Moseb ǃoa ge mî: 37 “Aronni ôab Eleasari, pristera mîba, îb bronsǀaepan-gu hoaga ǂhubiǁō ge khoegu di xūna xu ūbē, î ǂnomdi ǀaepangu ǃnâ hâde ǀnî ǃkhai-i ai tsoroxū, ǀaepangu a ǃanu xuige. 38 ǃKhūb di altars ai gu ra ǁguibahe ǁaeb ai gu ge ra ǃanu. ǁNā-amaga, ǁîgu ǁoren ǃaroma ge ǃgamhe khoegu ǀaepanga ū, î ǂnauǂhabaǂhaba tsî altars ǃaroma ǃgū-aiba kuru. Nēs ge Israelǁîn ǃaroma ǃkhâikhoms ase nî ī.” 39 Prister Eleasari ge ǀaepanga ū tsî ǁîga ge ǂnauǂhabaǂhaba kai, altars di ǃgū-aib nî kuruhese. 40 Nēs ge Israelǁîn ǃaroma ǃkhâikhoms ase nî ī, Aronni suriba xu hâ tama khoe-i altars tawa ǃKhūba ǃgâihamxū-e sī ǁguiba tidesa. ǁNā tamas ka i, o i ge ǁî-e Koraxi di khoegu khami nî hîkākāhe. Nēn hoan ge ǃKhūb ge Moseb ǃnâ-u Eleasara mîmā khami ǀgui ge dīhe.
Aronni ge khoena ra hui
41 Sao ra ǁgoagab ge hoaraga ǀhûhâsiba Moseb tsî Aron hâkha ǃoagu ǂkhîoǃnâ tsî ge mî: “Sakho ge ǀnî khoen ǃKhūb dina go ǃgam.” 42 ǁÎn hoan ge Moseb tsî Aron hâkha ǃoagun nî khâikhâisense ǀhao, on ge ǃKhūb di Tentommi ǀkhāb ain ge kō, o ǃâus Tentomma gere ǃgū-ais tsî ǂkhai ra ǃnâb ǃKhūb di ǀgūse hâs dib ra ǂhai ǃkhais tsîna ge mû. 43 Moseb tsî Aron hâkha ge ǃKhūb di Tentommi aiǃâ sī ge mâ, 44 tsîb ge ǃKhūba Moseb ǃoa ge mî: 45 “ǁNā khoena xu mâbē, î ta ǁîna ǁnān mâ ǃkhais ai hîkākā!”
Moseb hâkha ge ǁîkha aira ǀkha ǃhūb kōse ge ǃhon, 46 tsîb ge Moseba Aronni ǃoa ge mî: “Sa ǀaepanna ū, altars ai hâ ûitsama ǂnomde ǁîb ǃnâ ǂgā, î ǃgâihamxū-e ǂnomdi ai dī. ǁNās khaoǃgâ khoen ǁga ǃhaese ǃgû, î ǂkhîbagusa ǁîn ǀkha dī. ǃNoe re! ǃKhūb di ǁaib ge ǀnai tsoatsoa tsî ǂhīǁōb khami go ǂapaǂoa.” 47 Aronni ge nēsa ǁnâuǀnam, ǀaepanna ū tsî ǀhao hâ khoen ǁaegu ge ǃkhoeǂgâ. ǁÎb ge ǂhīǁōb ra tsoatsoa ǃkhaisab ge mûo, ǃgâihamxū-e ǂnomdi ai dī tsî khoen ǃaroma ǂkhîbagusa ge dī. 48 Nēs ge ǂhīǁōba ge ǁkhae, tsîb ge ǁîba ûitsaman tsî ǁō hân tsîn di ǁaegub mâ khami gere mûsen. 49 ǁŌ ge khoen ge disihakaǀaǀoadisi tsî hûkaidisi ge i, xawen ge Koraxi khâikhâisens ǃnâ gere ǁō khoena nēpa ǃgôasīhe tama hâ. 50 ǂHīǁōb ge ǁkhaehe, ob ge Aronna Moseb tawa, ǃKhūb di Tentommi ǂgâ-ams tawa ǁkhawa sī ge mâ.
© Khoekhoegowab Elobmîs © Bible Society in Namibia, 2020.
