ǀŌǀkhā kēbo-aob saos
1 Dana ǃkhōdana-aob, Asiriab gao-aob Sargonni xa ge sîheb ge Asdods tawa hā tsî ǁîs ǃoagu ǃkham tsî ǁîsa ǃkhōsis ǃnâ ge ū. 2 ǁNā ǁaeb aib ge ǃKhūba Amosi ôab Jesajab ǃoa ge mî: “ǃGû, î sa kamanaba xu ǀhaosaraba ūǁnâ tsî sa ǀkhapura ǂgaeǂui,” tsîb ge ǁîba ǁnāti dī tsî ǀōǀkhā tsî ǀōǂaise ge ǃgû. 3 ǁNās khaoǃgâb ge ǃKhūba ge mî: “Ti ǃgāb Jesajab ge saos ase ǃnona kurigu ǀgaiba tsî Egipteb tsî Etiopiab hâkha ǃoagu hâ ǃkhâikhoms ase ǀōǀkhā tsî ǀōǂaise ge ǃgû. 4 ǁNā ǀgaub aib ge Asiriab gao-aoba Egipteǁîna ǃkhōsis ǃnâ ū tsî Etiopiaǁîna ǃhūsaben ase nî ǂgaeǂguibē, ǂkham tsî kaise, ǀōǀkhā tsî ǀōǂaise, ǀōǂarese Egipteb taosib ǃoa. 5 ǁÎn ǃâubasensa Etiopiab ai ūhân tsî Egipteb ai ǂnīsan tsîn ge ǃao tsî nî taotaohe. 6 ǁNā tsēs ain ge huri-ammi di ǁanaona nî mî: ‘Kō re, tare-i ge ǃâubasensa da ge ūhâǃnâ hâ i tsî Asiriab Gao-aoba xu huihe tsî ǃnoraǃnorahes ǃaroma ǃkhoeniǀîn ǀkha hāsa!’ Tsî mâti da kha ûiǂoa ǁkhā?”
© Khoekhoegowab Elobmîs © Bible Society in Namibia, 2020.
