Aboxan di ǁkhāǁkhādi
(Markub 7:1-13)1 ǁNās khaoǃgâ gu ge ǀnî Farisegu* tsî Moseb ǂhanub* di ǁkhāǁkhā-aogu tsîga Jerusalemsa xu hā tsî Jesub ǃoa ge mî: 2 “Sa ǁkhāǁkhāsabegu* ge sige aboxan di ǁkhāǁkhādi tsî ǁnaetiga ra sora. Kō! ǁÎgu ge ǁānǃom tamase ra ǂû.”
3 Ob ge Jesuba ǁîgu ǃoa ge mî: “Sago ge Elob di mîmāde ǁnâuǀnam tamaǃâ sago di ǁkhāǁkhādi tsî ǁnaetiga ra sao. 4 Elob ra mîmā xui-ao: ‘Sa îb tsî sa îs tsîrats ge nî ǃgôa’ tsî ‘ǁNā-i ǁgûb tamas ka io ǁgûsa ra ǀâxarexū-i ge ǂanǂansase nî ǃgamhe.’ 5 Xawe go ge sago ra mî: ‘ǂHâbasa tama i ge hâ sa îrats nî ǃgôa ǃkhaisa, ǁîra ǂhâsib ǃnâ huis ǃaromats ūhâ xū-ets ga Eloba ǁguibao.’ 6 Tsî sadu di ǁkhāǁkhādi tsî ǁnaetigu ǀkha du ge Elob ra mîmā du xūn, dī du nîse ina ra ǁauǁau. 7 Sa ǀgamaixagoǃ ǂHanuseb ge kēbo-aob Jesajaba sago xa ge kēbo, nētib ge mîo:
8 “ ‘Nē ǁaes ge amǁgaugu ǀkha ra ǃgôa te,
xaweb ge ǁîn di ǂgaoba
tita xu a ǃnū.
9 ǁAusen ra ǀgoreǀî te;
khoen di ǁkhāǁkhāde
Elob mîmādi ase
ra ǁkhāǁkhāǃâ.’ ”
Khoe-e ra ǃanuoǃnâ kai xūn
(Markub 7:14-23)10 ǁNās khaoǃgâb ge Jesuba khoen di ǂnubisa ǂgaiǀhao tsî ǁîn ǃoa ge mî: “ǃGâise ǃgâ, î ǁnâuǃā! 11 Ams ǃnâ ra ǂgâ xū-i ge khoe-e ǃanuoǃnâ kai tama hâ, xawe amsa xu ra ǂoaxa-i ge ǃanuoǃnâ kai ra-e.”
12 O gu ge ǁkhāǁkhāsabega Jesub ǃoa hā tsî ge mî: “Kaisets ge Farisega go ǁgonǁgonǂgao, mîts gon ǀkha.”
13 Ob ge Jesuba ǁîgu ǃoa ge mî: “Mâ hais hîa ti Îb, ǀhommi ǃnâ hâb xa ǃhanahe tamas hoas ge ǃnomagu hoagu ǀkha nî ǃhomǂuihe. 14 ǁNā-amaga tā Farisegu ǀkha ǁaeǁaesen! ǁÎgu ge ǂgīn hîa nau ǂgīna ǂgaeǂgui hân khami ī tsî ǁnā-amagab ge ǂgī khoeb hîa nau ǂgība ǂgaeǂgui hâb tsîkha hoakha āb ǃnâ nî ǁnā.”
15 Xaweb ge Petruba Jesuba ge dî: “Mîba ge re tare xū-ets nē ǂkhōs* ǀkha ra ǂâibasensa?”
16 Ob ge Jesuba ge ǃeream: “Sago ti ǁkhāǁkhāsabego tsîna kha Farisegu xa ǃnāsase a ǁnâuǃāoǃnâ? 17 ǂAn tama go ǁnâi hâ khoe-i di ams ǃnâ ra ǂgâ xū-i hoa-i ǃnāb ǃnâ-u ǃkharu tsî ǁnāpa xu sorosa xu ra ǂoa ǃkhaisa. 18 Xawe ǂkhaba ǂgaoba xu ra ǂoaxadi ge ǂkhaba mîde tsî ǁîdi ge khoe-e ra ǃanuoǃnâ kaide. 19 ǁNā-amaga di ge ǂkhaba ǂgaoba xu ǂkhaba ǂâidi ǃgams, ǃgamekhôas, ǀaib, ǃnarib, ǂhumib tsî ǃkhāǃkhāgus dide ra hā. 20 Nēn ge xūn hîa khoe-e ra ǃanuoǃnâ kaina. Xawe ǁānǃom tamase ǂûs ge khoe-e ǃanuoǃnâ kai tama hâ.”
Jodeǁî tama taras di ǂgoms
(Markub 7:24-30)21 ǁNās khaoǃgâb ge Jesuba Galileab ǀkhariba xu ǃgû tsî Tirus tsî Sidons di ǀkharib ǃnâ ge sī. 22 Tsî Jodeǁî tama taras, Kanaanǁî ge is ge ǁnā ǀkhariba xu Jesub ǃoa ge hā. ǁÎs ge ǃgari dommi ǀkha ge ǂgai: “ǃKhūtse, Davidi Ôatse, ǀkhomxa te re! Ti ôas ge ǁgâuab* xa hâǃnâhe tsî kaise ǃgâi tama mâsib ǃnâ hâ.”
23 Xaweb ge Jesuba ǁîsa ǃeream tama ge i. O gu ge ǁîb ǁkhāǁkhāsabega ǁîb ǀgūse hā tsî ge ǀkhoma bi: “Toxopa nē tarasa ǃhaebē re, kaises ǁîsa āsaoma ges ǀkha ra ǂhani ge xuige!”
24 Ob ge Jesuba ǁîs ǃoa ge mî: “Tita ge Israeli di kā hâ gūn hîa ǃûi-ao-e ūhâ taman ǃoa ǀgui sîhe hâ.”
25 Os ge ǁîsa ǁîb tawa hā tsî ǁîb aiǃâ ǃhonǁgoa tsî ge ǀkhoma bi: “ǃKhūtse, toxopa hui te re!” 26 Xaweb ge Jesuba ǁîsa ge ǃeream: “ǂHanu tama i ge hâ ǀgôan di ǂû-e ū tsî arina aobasa.”
27 Os ge ge mî: “Ā, ǃKhūtse, ǁnās ge a ama, xawen kom arin tsîna ǀhonkhoeb di tāba xu ra ǁnā ǂomana ra ǂûo.”
28 Ob ge Jesuba ǁîs ǃoa ge mî: “Kaises ge buruxase kai ǂgomsa ūhâ. ǂGaos ra khami a i ība si.” Tsî ǁnā ǁaeb ǂûb ais ge ǁîs di ôasa ge ǂuru.
Jesub ge ǂgui khoena ra ǂuruǂuru
29 Tsî hâb ge ipa xub ge Jesuba Galileahurirob ǀnomammi ǁga oahā tsî ǃnâub ai ǂoa tsî sī ge ǂnû. 30 Tsî kai ǂnubis khoen ge hā tsî ǂgui ǀaesen hân, ǃhoran, ǃhom hân, ǂgīn, ǃgomen tsî ǂganaǂgae hân tsîna ǁîb ǃoa tanihā tsî ǁîb ǂaira aiǃâ ge ǁgui. Ob ge Jesuba hoana ge ǂuruǂuru. 31 Tsî ǁnāpa ge hâ i khoen hoan ge kaise ge burugâ, ǃgome ge in ra ǃhoa, ǃhom ge in ra ǃgû, ǃhora ge in hoaragase a ǂuru tsî ǂgī ge in ra mû ǃkhaisan ge mû xui-ao. Mâ-i hoa-i ge Israeli di Eloba koa tsî ge ǃkhōǀkhā.
Jesub ge ǀnî kai ǂnubis di khoena ra ǂûmā
(Markub 8:1-10)32 ǁNās khaoǃgâb ge Jesuba ǁîb di ǁkhāǁkhāsabega ǂgaiǀgū tsî ge mî: “Kaise ta ge nē khoena ra ǀkhom. ǃNona tsēden ge tita ǀkha hâ tsîn ge ǃaruǀî ǂûxū-i tsîna ūhâ tama. ǁÎna ta ge ǃâsase sîǁaru ǂgao tama hâ, în tā daob ai ǃâs xa ǂkhabu tsî ǁnā.”
33 O gu ge ǁkhāǁkhāsabega ge dî bi: “Mâpa ge kha nē ǃgarob ǃnâ ǂâusa ǂûna nî hō, nē ǂnubisa ǂûmās ǃaroma?”
34 Ob ge Jesuba ge dî gu: “Mâtikō perena go ūhâ?”
O gu ge “Hû peregu tsî ǀoro, ǂkhari ǁauron” ti ge ǃeream.
35 Ob ge Jesuba ǂnubis khoena ge mîmā, în ǃhūb ai ǂnû. 36 ǁNāpa xub ge hû peregu tsî ǁauron tsîna ū tsî ǃKhūba ge gangan. Tsîb ge ǃâdi ǃnâ khôa tsî ǁîb di ǁkhāǁkhāsabega ge mā, î gu ǃaruǀî ǂnubisa mā.
37 Mâ khoe-i hoa-i ge ǂû tsî ge ǁâ tsî gu ge ǁkhāǁkhāsabega ǃgau ge ǃâron ǀkha hû ǀharude ge ǀoaǀoa.
38 Hakaǀoadisi aorekhoegu ge ge ǂû, xawen ge taradi tsî ǀgôan tsîna nēpa ge ǃgôaǂgāsa tama hâ i.
39 ǁNās khaoǃgâb ge Jesuba ǂnubisa ǁaru kai tsî ǂgaus ai ǂoa tsî Magadanǀkharib ǁga ge ǃgâu.
© Khoekhoegowab Elobmîs © Bible Society in Namibia, 2020.
