ǃKhūb ge Habakuka ra ǃeream
1 Ti ǃûiǂgō-ommi ai ta ge sī nî mâ, ǀgaisa ǂnubiǂgoab ai ta ge ti mâǃkhaisa nî ū. ǁNāpa ta ge nî ǃâu, tare-eb ǃKhūba nî mîba tesa tsî tare-eb ti ǃgaesens ai nî ǃeream tesa.
2 Ob ge ǃKhūba ge ǃeream te: “Tita nî ǂhaiǂhaiba tsina ǀuiǂgapagu ai ǃgāsase xoamâi, î-i ǃkhoeǃkharu ka khoe-i hoa-e ǁîna khomai ǁkhā. 3 ǂHaiǂhais ge mîmâisa ǁaeba nî ǃâu, xawes ge ǃhaese nî hā tsîs ge nî ǂgomǂgomsa. Tsîs ga ǀhabe, xawe ǃnūǃnâxasib ǀkha ǃâu, amases nî hā tsîs ǃonkhao tide xuige. 4 Nēs ge ǂhôasa: ‘ǂHanu ǂâibasensa ūhâ taman ge ûi tide, xawe ǂhanu-ain ge nî ûi, ǂgomǂgomsan a amaga. ’ ”
ǂHanuoǃnân ge nî ǁkharahe
5 ǃKhūsib ge ra ǂgaeǂhapu tsîb ge xūǃgunuxa khoeba ǀgapiǂâixa tsî a sâoǃnâ. ǁÎb ge ams âba ǁŌhân Hâǃkhaib khami harase ra khowa tsî ǁōb ǁkhāb khami tātse ǂâu tama hâ. ǁÎb ge ǃhaode ǁîb tawa ra ǀhaoǀhao tsî ǁaede ǃkhōsis ǃnâ ra ū. 6 ǁNā ǁaedi ǂûdi ge ǁîba âiǂui tsî ǃhō tsî nî mî: “Tsūba bi ǁnāb, ǁîb di tama xūna ǀhaoǀhaobasen tsî ǁgūǀhanasa xu ra ǃkhūba. Mâtikōses kha nēsa nî aiǃgû?”
7 ǃNapetamasen ge ǁnān, surudets hâna nî hāǂam tsi; ǁîn ge khâiǀkhā tsi tsî nî ǀkhū kai tsi. ǁÎn ge satsa xu nî ǁkhâuǁnâ. 8 Sats ge ǂgui ǃhaode xu gere ǁkhâuǁnâ, xawe nēsin ge ûiǃgau gena satsa nî ǁkhâuǁnâǀkhā, kaisets ge ǀaoǂnâxū tsî ǂgui ǃhūgu, ǃādi tsî ǁîdi ǁanǂgāsaben ǃoagu gere ǂkhabadī amaga. 9 Tsūba bi ǁnāb ǁîb omarisa ǂhanuoǃnâ hōǂgās ǀkha ra ǃkhūǃkhūba; oms âba ǀgapi ǃkhaib ai ra omma, ǂkhôa-i hāǂam bi tidega. 10 Sa ǀhôagao ǀapedi ǀkhats ge sa omaris dina taosib ǃnâ ge mâi; ǂgui ǁaedets ge ge hîkākā tsîts ge ǁnās ǀkha sa ûiba ge ǀamǀam. 11 ǂNubiǂgoagu ǃnâ ǂnôa ǀuidi ge nî ǃau tsî gu ge omǂamǃnâb di ǃnaoga nî ǃeream.
12 Tsūba bi ǁnāb ǃāsa ǀaoǂnâxūs ǀkha ra ǂnubib, ǁnāb ǁîsa ǂkhabadīb ǀkha ra ǂnubikhâiba. 13 ǃKhūb Hoaǀgaixaba xu ge ī ǃkhais ge ǁaedi di sîsenni ge ǀaes xa ǂhubiǂuihesa, ǃhaodi ge ǁause ra sîsenǃansen. 14 ǃHūbaib ǃKhūb ǂkhaisib di ǂans xa nî ǀoa xui-ao, hurib ǁgammi xa ǀoa hâs ǁkhās khami.
15 Tsūba bi ǁnāb, ǁîb di ǁanǁare-aona ra āsib, ǁîna ǀgaisa āxūba ǂnâba tsî ra ǀhoro kaiba, ǁîn di ǀōǀkhāsibab nî kōse. 16 Sats ǂûts ge taosib ǃnâ nî mâ, ǃgôasib ǃās ǃnâ. Sats ge āǀhoro tsî nî ǀōǀkhā kaisen. ǃKhūb di amǀkhāb ǃommi ǃnâ hâ ǀgabis ge sats ǃoa ra hā, tsîb ge sa ǃgôasiba taosib ǃnâ nî ǀkharaǀkharahe. 17 Libanonni ǃoaguts ge dī ǂkhabadīb ge nî hāǂam tsi; ǀgurun tsî xamarinats ge hîkākā hîkākās ge nî ǃhuriǃhuri tsi, kaisets ge ǀaoǂnâxū tsî ǂgui ǃhūgu, ǃādi tsî ǁîdi ǁanǂgāsaben ǃoagu gere ǂkhabadī amaga.
18 ǃGaoǂuisa ība kha tare-eb harebe hâ? ǁÎb kom khoe-i xa kuruhe hâ xūb, ǂhumib ǀguiba ra ǁkhāǁkhābao. Tare-i ǃaromab kuru-aoba ǁîb aitsama kuru hâ xū-i ai nî ǂgomaiǂnûi; ǃhoa ǁoas tsîna i ǁgôa-elo-i ai. 19 Tsūba bi ǁnāb, haib ǃoa “ǃNoaǂkhai” tsî ǀuib ǃoa “Khâimâ” ti ra mîba. ǁGôa-eloba xū-e ǁkhāǁkhā tsi ǁkhāb a? ǁÎb ge ǃhuniǀurib tsî ǀhaiǀurib tsîkha ǀkha a ǃkhûǀkhāsa; ûi-i xare-i ge ǁîb ǃnâ a ǀkhai.
20 ǃKhūb ge ǁîb di ǃanu Tempeli ǃnâ hâ; ab hoaraga ǃhūbaiba ǁîb di ais aiǃâ ǃnō re.
© Khoekhoegowab Elobmîs © Bible Society in Namibia, 2020.
