Rubenni di ôananôagub
1 Jakob di ǂguro ǀgôab Rubenni di ôananôagub ge nēba. (ǁGûb taradi di ǀguis ǀkhab ge ǁgoe, xui-aob ge ǁîb ǂguroǃnaesis di ǂhanuba ge ǂoaǃnâ, tsîb ge Josefa ǁnā ǂhanuba ge māhe. 2 Judab ǃhaos ge kaise ge ǀgai tsîb ge ǃhaodi hoadi di ǂgaeǂgui-aoba ǁîsa xu ge ǀkhī, xawe ǂguroǃnaesis ge Josefi dise ge hâ.) 3 Jakob di ǂguro ǀgôab Rubenni ge haka ǀgôaga ge ūhâ i: Hanoxi, Palub, Hesronni tsî Karmib tsîga.
4-6 Nēb ge Joeli di ôananôaguba: Semajab, Gogi, Simeib, Mikab, Reajab, Baali tsî Beerab tsîga. Asiriab gao-aob Tiglat-Pileseri ge Rubenǁîn di ǂgaeǂgui-aob Beeraba ǃkhōsabese ge ǃgû-ū.
7 ǀAokhoen xoakhâib ǃnâ gu ge sao ra ǃhaodi ǂgaeǂgui-aogu, Rubenni ǃhaos diga hâ: Jeieli, Saxariab 8 tsî Belab, Asasi ôa tsî Semab ǁnurib, Joeli ǃhaos dib tsîga. Nē ǃhaos di khoen ge Aroers ǃnâ tsî ǁkhāti aiǃâ, ǀapasǀkhāb ai ǁgoe ǀkharib ǃnâ, Nebos tsî Baal-Meons tsîra kōse ge ǁan hâ i. 9 Gileadi ǃnân ge ūhâ i ǂgarib ge kaise ge ǂgui, tsîn ge ǁnās ǃaroma aiǂoas ǃnâ ǁgoe ǃhūb hoaragab, Eufratǃāb xōǀkhā ǁgoe ǃgaroǃhūb kōse ra sīb ǃnâ ge ǁan.
10 Gao-aob Sauli di ǁaeb ǃnâs ge Rubenni ǃhaosa Hagarǁîn ǃoagu torodī, ǁîna ǃgam tsî ǁîn di ǃhūb, Gileadi aiǂoas ǃnâ ǁgoeba ge ū.
Gadi di ôananôagub
11 Gadi ôananôagub ge Rubenǁîna xu ǀapasǀkhāb ai ǁgoe ǃhūb Basanni ǃnâ, aiǂoasǀkhāb ai Salekas kōse ge ǁan hâ i. 12 Joeli ge ge ǃhaos di dana i tsî Safamma ǁîb di ǃnaka; Janaib tsî Safat hâkha nau ǃhaodi Basanni didi ǃnâ. 13 Nau ǁanin, ǀaokhoen din ge ge sao ra hû ǁgûsi surigu di i: Mixaeli, Mesulammi, Sebab, Joraib, Jakanni, Siab tsî Eberi tsîga. 14 Nēb ge Huri ôab Abihaili di ôananôaguba; ǁîn di aboxagu ge nēti ra saogu: Abihaili, Huri, Jaroaxi, Gileadi, Mixaeli, Jesisaib, Jadob tsî Busi tsîga. 15 Abdieli ôa tsî Guni ǁnurib, Ahib ge ge nē ǁgûsi surib di dana i. 16 ǁÎn ge Basanni tsî Gileadi tsîkha ǀkharib di ǃādi ǃnâ tsî Saronni di ǃû-aidi hoadi ǃnâ ge ǁan. 17 (Nē xoakhâigu hoagu ge Judab gao-aob Jotammi tsî Israeli gao-aob Jerobeammi tsîkha di ǁaeb ǃnâ ge dīhe.)
Aiǂoas ǃhaodi di toroǂnubidi
18 Rubenni, Gadi tsî ǃkhare ǃhaos Manaseb dis tsîdi ǃnâ gu ge hakadisihakaǀaǀoadisi tsî hûkaidisi tsî ǃnanidisi toroǃkhamaoga ge hâ i; toroǃkhamaogu ǁkhaukhōdi, gôagu tsî khādi tsîna sîsenūs ǃnâ ǃgâise ǁkhāǁkhāǂuisaga. 19 ǁÎgu ge Hagarǁîn di ǃhaodi Jeturǁîn, Nafisǁîn tsî Nodabǁîn tsîn ǃoagu sī ge torodī. 20 ǁÎgu ge Elob ai ǂgomǃgâ tsî ǁîb ǃoa huib ǃaroma ge ǀgore, tsîb ge Eloba ǁîgu ǀgorede ǁnâu-am tsî ǁîga Hagarǁîn tsî ǁîn ǀkha hâ ǂnubidi tsîn ǂama dansa ge mā. 21 ǁÎgu ge khākhoena xu korodisiǀoadisi ǃnain, ǀgamkaidisi tsî korodisiǀoadisi gūn tsî ǀgamǀoadisi dâukin tsîna ū, tsî ǁkhāti ǀguikaidisiǀoadisi ǃkhōsaben tsîna ge ǃgû-ū. 22 ǁÎgu ge ǂguin khākhoen ân dina torob ǃnâ ge ǃgam, torob ge Elob ǂâisa xu hâ xui-ao. ǁÎn ge egan ge ǃkhōsis ǃnâ ǃgû-ūhes kōse, ǁnā ǀkharib ǃnâ sī ge ǁan.
ǃKhare ǃhaos Manaseb dis
23 ǃKhare ǃhaos Manaseb dis ge Basanni ǀkhariba xu tsoatsoa tsî ǀapas ǃnâ Baal-Hermonni, Seniri tsî Hermonǃhommi kōse ge ǁan, tsîn ge ǁîna kaise ge ǂgui. 24 Nē ra saogu ge ge ǁîn di ǁgûsi ǀaokhoen dana i: Eferi, Jisib, Elieli, Asrieli, Jeremiab, Hodaviab tsî Jaxdieli tsîga. ǁÎgu hoagu ge ǂoaǂamsa toro-ao tsî kaise ǂansa ǂgaeǂgui-aogu ǁîgu ǁgûsi omgu di ge iga.
Aiǂoas ǃhaodi di ǃgû-ūhes
25 Xawen ge ǁîna ǁîn aboxagu Eloba, ǂgomǂgomsase hâba tama i, ǁîba ǁnāxū tsî nau ǃhaodi, Elob ge ǃhūba xu a ǃhaeǂuidi di eloga gere ǀgoreǀî. 26 ǁNā-amagab ge Israeli di Eloba Siriab gao-aob Pula (Tiglat-Pileseri ge ǁnāba) ǁîn di ǃhūba ge ǁnāǂam kai. Tsîb ge ǁîba Rubenni ǃhaos, Gadi ǃhaos tsî ǃkhare ǃhaos Manaseb dis tsîde Halaxs, Habors, Haras tsî Gosanǃāb tsîn tawa ge ǁan kai, ǁnāpan nî hâhâse.
© Khoekhoegowab Elobmîs © Bible Society in Namibia, 2020.
