ǃKhūb ge Tempeli tawa ge oahā
1 Ob ge ǁîba tita dao-ams ǃoa ge ǂgaeǂguisī, ǁnā dao-ams, aiǂoas ǃoa gau daobǀî ǃoa hâs ǁga. 2 Tsî mû, ǂkhaisib Israeli Elob dib ge aiǂoas ǃoa gau daoba xu ge hā, tsî dommi âb ge ǂgui ǁgamgu di ǀōb khami ge tsâ i, tsîb ge ǃhūbaiba ǂkhaisib âb xa ge ǃnâ. 3 Tsî īsib ǁnā ais, mû ta ges dib ge ǁnā ais, hîa ta ge ǃāsab nî hîǀhuruseb ge hāo a mûs khami ge ī i, tsî di ge aide ge hâ i ǁnā ais, Kebarǃāb amǃgâ ta ge mûs ǁkhās khami ge ī ide; o ta ge ti ais ai ge ǁnā. 4 Tsî ǂkhaisib ǃKhūb dib ge aiǂoasǀkhāb di dao-amsa-u ge ǂgâxa.
5 ǃKhūb di Gagab ge tita ūkhâi tsî ǃnāb ǃnâ hâ ai-ommi ǃnâ ge ūsī, tsî ǂkhaisib ǃKhūb dib ge omma ge ǀoaǀoa. 6 Khoeb tita xōǀkha mâ hîa ta ge ǀguib, omma xu tita ǀkha ra ǃhoaba ge ǁnâu. 7 Tsîb ge ǁîba tita ǃoa ge mî: “Khoenôa ǀgôatse, nēs ge ǃkhais ti trons disa tsî ǃkhais ti ǂaiǃnākha disa, ǁîs ǃnâ ta Israeli ôan ǁaegu nî ǁansa ǀamosib kōse. Tsî ǁnān, Israeli ommi din ge ǃaruǀî ti ǃanu ǀonsa ǀuriǀuri tide, ǁîn kas, ǁîn di gao-aogu kas hoasa ǁîn di ǀaigu ǀkha tsî ǁîn di gao-aogu di ǁō hâ sorodi ǀkha ǁîn di ǀgapigu ai. 8 ǁÎn di dā-aihaiban ge ti dā-aihaib tawa tsî ǁîn di xōǀkhāhaiba ti xōǀkhāhaib tawa mâi ǃnubai, ǀgui ǂnubiǂgoab ǀguib ge tita tsî ǁîn tsîda ǁaegu hâ is kōse, tsîn ge ti ǃanu ǀonsa ǁîn di ǁgaidīgu, hîan ra dīgu ǀkha ǀuriǀuri ǃnubai; ǁî ǃkhais ǃaroma ta ge tita ǁîna ti ǁaib ǃnâ ge hîkākā. 9 În ǁnâi nēsi ǁîn di ǀaigu tsî gao-aogu ân di sorodi tsîna ǃnūse tita xu dībē, o ta ge tita ǀamos kōse ǁîn ǁaegu nî ǁan.”
10 ǃKhūb ge ǃaruǀî ge mî: “Satsa khoenôa ǀgôatse, Israeli khoena nē omma ǁgau, în taob xa dāhe ǁîn di ǂhanuoǃnâsigu ǃaroma, în aiǁgausa kōǁnâ. 11 Tsî taob xan ga dāheo ǁîn di dīgu hoagu ǃaroma, îts ǁnâi ǁîna ǂanǂan kurub ommi dib tsî ǁîb di īb tsî ǁîb di ǂgâdaodi tsî ǂoadaodi tsî ǁîb di ǂnûiǂgādi hoadi tsî ǁîb di ǂhanugu hoagu, ā, ǁîb di kuruǀgaub hoab tsî ǁîb di ǂhanugu tsîna; îts ǁîn di mûdi aiǃâ xoa, în ǁîb di kurub hoab tsî ǁîb di ǂnûiǂgādi hoade sâu tsî ǁîna dī. 12 Nēb ge ǂhanub ommi diba: ǃHommi ǂaob tsî ǁîb ǂnamipeb hoab ge hoan xa ǃanu ǃkhaise nî ī. Mû, nēb ge ǂhanub ommi diba.”
Altars
13 Tsî nēgu ge ǀguirogu altars diga: Altars ǂnamipe hâ ǁgorob ge ǃkhare metera ǃgam tsî ǃkhare metera ge ǂhaba i. ǁGorob di amǃgâb ge ǀgamdisikoroǀa sentimeterga ge ǀgapi i. 14 ǃGaoǃgaoba xu ra sao ǃâb ge ǀgui meteri kōse ge ǀgapi i, tsî ǁîb ai ǁgoe ǃâb ge korodisi sentimeterga ǃnaka ǁgoeb xa hoa ǀkhākha ai ge ǃnubu i tsî ǀgam meterkha ge ǀgapi i. ǁÎb ǀgapiga ra ǀkhī ǃâb ge korodisi sentimeterga ǃnaka ǁgoeb xa hoaǀkhākha ai ge ǃnubu i tsî ǀgam meterkha ge ǀgapi i. 15 Nē ǃâb tsîn ge ǀgam meterkha ge ǀgapi i. ǁNāpa di ge khauǁguibade gere ǁguibahe. Hoa haka ǁhôadi ai gu ge ǁnâga ge hâ i. 16 Altars di ǀgapigab ge ge hakaǁhôaxa i, mâ ǀkhāb hoab ge ǃnani metergu gaxusiba ge ūhâ i. 17 Altars di ǁaegub ǃâb tsîn ge ge hakaǁhôaxa i, mâ ǀkhāb hoaba hû metergu di gaxusiba. ǁÎb ge ǀgamdisikoroǀa sentimeterga ǀgapi amǃgâba ge ūhâ i. Aiǂoasǀkhāb ai di ge altars di ǃapa-ūdade ge hâ i.
Altars di ǀnauhes
18 Tsîb ge tita ǃoa ge mî: “Khoenôa ǀgôatse, nētib ge ǃKhūb Eloba ra mî: Nēdi ge ǂnûiǂgādi altars dide, ǁîs ge ǂnubihe tsēs ai, khauǁguibas nî ǁîs ai ǁguibahega tsî ǀaob nî ǁîs ai ǀgapihega. 19 Tsîts ge satsa Leviǁî pristergu, Sadoki surib digu, tita gu nî ǃoabase tita ra ǀgūga, ǀgui ǁgōba nî mā, tib ra ǃKhūb Eloba mî; ǂkham gomaba ǁoreǁguibase. 20 Tsîts ge ǀaob âb xa nî ū, tsî haka ǁnâgu âb ai tsî haka ǁhôadi ǁgui-amǃgâb didi tawa tsî ǁîb ǂnamipe hâ amǃgâb tawa nî ǂkhau; nētits ge satsa ǁîba nî ǁoreo kai tsî ǁîba nî anu-anu. 21 ǁNās khaoǃgâts ge ǁoreǁguibas ǁgōba nî ū tsî ǁîb ge ǁîba mîmâihesa ǃkhais ommi dis, ǃanusib ǃauga hâs tawa nî khauǃkhūhe. 22 Tsî ǀgamǁî tsēs aits ge satsa ūo ǂkharapiriba ǁoreǁguibase nî ǁguiba, tsîn ge altarsa nî ǁoreo kai, ǁîsan ge ǁgōb ǀkha ǁoreo kais ǁkhās khami. 23 ǁOreo kai toats ka ǃnubaits ge satsa ǁgōb, ūo ǂkham gomaba nî ǁguiba tsî ūo baib gūn dib tsîna. 24 Tsîts ge ǁîkha ǃKhūb di ais aiǃâ nî ǁguiba, tsî pristergu ge ǂō-e ǁîkha ai tsoro tsî ǁîkha khauǁguibase ǃKhūba nî ǁguiba. 25 Hû tsēdi kōsets ge satsa tsēkorobe piriba ǁoreǁguibase nî ǁguiba; ǁkhātin ge ǁgōb, ǂkham gomab, tsî bairab gūn dib tsîkha ūokha nî ǂhomi. 26 Hû tsēdi kōsen ge altarsa nî khai tsî ǁîsa nî ǃanuǃanu tsî ǁîsa nî ǂhomi. 27 Tsî ǁnā tsēdi ga ǃkharu, o gu ge pristerga ǁkhaisaǁî tsēs ai sadu khauǁguibadi tsî sadu ganganǁguibadi tsîde altars ai nî ǁguiba; o ta ge tita sadu xa nî ǃgâibahe,”
tib ge ǃKhūb Eloba ra mî.© Khoekhoegowab Elobmîs © Bible Society in Namibia, 2020.
