Ûib di Mîs
1 Mîs ûib dis, tsoatsoasa xu ge hâ is hîa da ge ǁnâu, sida di mûdi ǀkha mû, ǃgapaǀî tsî sida ǃomgu ǀkha tsâǀkhās xa da ge ra xoaba du. 2 Ûib ge ǂhaiǂhaiheo, da ge mû tsî ǃkhō-am tsî ǀamo ûib hîa ǁGûb ǀkha ge hâ ib tsî ge ǂanǂanheba sado gere aoǁnâba. 3 Mû tsî da ge ǁnâuna da ge ǁkhāti sado ra aoǁnâba, sadu tsîn sida ǀkha ǀhûhâsib ǃnâ nî hâse. Tsî sada di ǀhûhâsib ge ǁGûb tsî ǁîb Ôab Jesub Xristub ǀkha hâ. 4 Nēsa da ge ra xoa sada di ǃgâiaǂgaob nî dīǀoaǀoahese.
Elob ge a ǃnâ
5 Nēs ge ǂhôas ǁîba xu da ge ǁnâusa tsî da ge ǁîsa sado ra aoǁnâba. ǁÎs ge: Elob ge a ǃnâ tsî ǃkhaena-i xare-i ge ǁîb ǃnâ a ǀkhai. 6 Tsî sada ga ǁîb ǀkha da ǀhûhâsib ǃnâ hâ ti mî tsî ǃkhaenab ǃnâ ǃgû, o da ge ra ǂhumi tsî amaba ûiǂui tama hâ. 7 Xawe da ga ǃnâb ǃnâ ǃgû, ǁîb ǃnâb ǃnâ hâ khami, o da ge ǀhûpe ǀhûhâsib ǃnâ hâ tsîb ge ǁîb Ôab, Jesub Xristub di ǀaoba sada hoa ǁorena xu ra ǃanuǃanu.
8 Tsî sada ga ǁore-e da ūhâ tama ti mî, o da ge ǁî-aitsama ra gāsen tsîb ge amaba sada ǃnâ a ǀkhai. 9 Xawe sada ga ǁoren âda ǁguiǁnâo, Elob ge ǂgomǂgomsa tsî a ǂhanu-ai; ǁîb ge sada ǁorena ǀûba da tsî hoa ǂhanuoǃnâsiba xu nî ǃanuǃanu da. 10 Tsî da ga ǁore tama da hâ ti mî, o da ge ǁîba ra ǂhumi-aodī tsîs ge mîs âba sada ǃnâ a ǀkhai.
© Khoekhoegowab Elobmîs © Bible Society in Namibia, 2020.
