ǃAruǀî hâ ǀgoraǃgâs Babilons ǂama
1 Nētib ge ǃKhūba ra mî: “Tita ge ǁkhō ǂoa-e Babilons ǃoagu nî khâi kai, Xaldeaǃhūb ǁanǂgāsaben ǃoagu. 2 Tita ge Babilonsa nî sapiǂuiǃnâ khoena ǁîs ǃoagu nî sî. ǁÎn ge ǁîsa ǁgaraǂuiǃnâ tsî ǃhūb âsa nî ǀkhaiǀkhaiǃnâ, hoa ǀkhāga xun ga ǁîsa ǂōǂōsib tsēs ai hāǂam ǃnubai. 3 Tā khāǁkhâu-aoga khāsa gu nî ǂgaeǃnâ soa-e mā tamas ka io ǁâtanin âga gu nî ǂgaeǂgāsa. Tā ǁîs di ǂkham khoega ǀkhom, î hoaraga toroǂnubis âsa hîkākā. 4 ǁÎgu ge nî ǃgamhe Xaldeaǃhūb ǃnâ tsî ǁō hâgu di sorodi ge ǁîs ǃgangu ǃnâ nî ǁgoe. 5 Israeli tsî Judab tsîkha ge ǁîkha Elob, ǃKhūb Hoaǀgaixab xa ǁnāxūhe tama hâ, ǁîkha ǃhūb ga ǁoreb xa ǀoa, Israeli di ǃAnub aiǃâ xawe. 6 ǁHâǂoa Babilonsa xu, ǁî-aitsama huiǂuisen, î du tā ǁîs di ǁoreb ǃaroma hîkākāhe. Nēb ge ǃKhūb ǀkhaob di ǁaeba, ǃoaǂuis hâ-es ǁîsa ra ǃkhōǃoaba. 7 Babilons ge ǃhuniǀuri ǀgabi ge isa ǃKhūb ǃomǁae, hoaraga ǃhūbaiba gere ǀhoro kaisa. ǃHaodi ge ǁîs ǂauxûib xa ge ā tsî ǁnā-amaga ge ǃkhau. 8 Babilons ge ǃnapetamase ǁnā tsî ge ǂkhū. ǁÎsa āba re. Balsam-e ǁîs ǀhapide ūba re, ǀnîsis nî ǂgau xuige. 9 ‘Sida ge Babilonsa ge ǂgauǂgau, xawes ge ǂgau tama ge i. ǁÎsa xu ǂoa, a i mâ-i hoa-e ǁî-i ǃhūb ǃoa ǃgû, ǁîs di ǀgoraǃgâs ǀhommi kōse ra sī tsî ǃâudi kōse ra khâi xuige.’ ”
10 “ǃKhūb ge ǂhanu-ai da a ǃkhaisa ge ǂhai kai. ‘Hā, î da Sions ǃnâ ǃKhūb sada Elob di sîsenna ǂhôa re.’ ”
11 ǂĀga ǀāǀā, î ǁkhaukhōde ūkhâi. ǃKhūb ge Mediab gao-aoga go khâikhâiǃnâ, Babilonsa hîkākāsab ǂâibasen hâ amaga. Nēb ge ǃKhūb di ǀkhaoba, ǁîb di Tempeli ǃaroma. 12 Babilons di ǂnubiǂgoagu ai ǃkhauba ǃkhā. ǃÛisa ǀgaiǀgai, ǃûi-aoga mâi, ǂapoǃkhaide ǂhomi. ǃKhūb ge mîb ge khami Babilons ǁanǂgāsaben ǀkha nî dī. 13 Sas ǂgui ǃāgu tawa ǁan hâs, kai ǁuiba ūhâse, sa ǀams ge go hā. Sa ûib di ǁapab ge go ǃkhaiǃgaohe. 14 ǃKhūb Hoaǀgaixab ge ǁîb ǂûb tawa ge nū: Amase ta ge sasa ǂhomn kōse ǂgui ǂnubis khoegu ǀkha nî ǀoaǀoa. ǁÎgu ge sas ǂama dans di ǃauba nî ǂgaiǂui.
Koatsanas
15 ǃKhūb ge ǁîb ǀgaib ǀkha ǃhūbaiba ge ǂnubi
gā-aisib âb ǀkhab ge ǃhūbaiba ge dī
tsî ǀhomma ge ǃāǂui.
16 ǁÎb mîmās ai gu ǁgamga ǀhommi ǃnâ ra ǃguru;
ǁîb ge ǃâude ǃhūbaib ǀamsa xu ra hā-ū.
ǀNanub ǃnâb ge ra napa kai,
tsîb ge sâuǃnâ-omdi âba xu ǂoaba ra sîǂui.
17 Nēsa ra mû-i hoa-i ge gâre tsî gâse ra tsâ,
mâ ǃhuniǀurikuru-aob hoab ǁgôa-elon xa ra taotaohe,
ǁgôa-elon ǁîb ra kurun a ǂhumi tsî ǁō hâ xui-ao.
18 ǁÎn ge a ǁau, ǁîn ge a ǃhōxū,
ǁkharab ân ǁaeb ga hā, on ge kāǃari.
19 Jakob Elob ge ǁîn khami ī tama hâ;
ǁîb ge ǁnāb hoaraga xūna ge kurub
tsî Israelǁaesa ǁîb di ǂhunuma ǁaese ge ǁhûiba.
ǃKhūb Hoaǀgaixab tib ge ǀon hâ.
ǃKhūb di hamers
20 “Sas ge ti hamer tsî torob ǁâtani.
Sas ǀkha ta ge ǁaede ra ǂnauǂkhū,
sas ǀkha ta ge gaoside ra hîkākā.
21 Sas ǀkha ta ge hān tsî ǃgapi-aoga ra ǂkhūǂkhū,
sas ǀkha ta ge torokunidi tsî ǃnari-aoga ra ǂkhūǂkhū.
22 Sas ǀkha ta ge khoeb tsî khoes tsîra ra ǂnauǂkhū,
sas ǀkha ta ge kairan tsî ǂkhamn tsîna ra ǂkhūǂkhū,
sas ǀkha ta ge ǂkhamkhoeb tsî ǂkhamkhoes tsîra ra ǂkhūǂkhū.
23 Sas ǀkha ta ge ǃûi-aogu tsî gūn âga ra ǂnauǂkhū,
sas ǀkha ta ge ǃhanaǂgā-aob tsî gomagu âba ra ǂkhūǂkhū,
sas ǀkha ta ge gowoniagu tsî ǂamkhoega ra ǂkhūǂkhū.”
Babilons di ǁkharab
24 “Xawe Babilons tsî hoaraga ǁanǂgāsaben Xaldeab din tsîna ta ge ǁnā ǂkhawadīb, sadu mûǁaen ge Sionsa dī-ūb ǃaroma nî ǁkhara,”
tib ge ǃKhūba ra mî.25 “Tita ge sats ǃoagu hâ, hîkākā ra ǃhomtse, sats hoaraga ǃhūbaiba ra hîkākātsa, tib ge ǃKhūba ra mî. Ti ǃomma ta ge sats ǃoa nî ǀhōǂui, tsî ta ge ǃgareǀuiga xu gariǁnâ tsi tsî khauǃkhūsa ǃhomse nî dī tsi. 26 ǀGui ǀui-i tsîn ge satsa xu ǁhôaǀuise ūhe tide tamas ka io ǃgaoǃgaoǀuise, sats hoaragase nî ǂkhūǂkhūhe xui-ao,”
tib ge ǃKhūba ra mî.27 “ǃKhauba ǃhūb ǃnâ ǃkhā, xâiǁnâsa ǃhaodi ǃnâ ǀō kai. ǃHaode ǂhomi ǁîs ǃoagu di nî torodīse. Gaosidi Ararati, Minib tsî Askenab tsîgu dide ǁîs ǃoagu ǂgaikhâi. ǂAmkhoeba ǂgaeǂguib nîse ǁgaumâi, î ǂhoms khami ǂgui hāna ǁîs ǃoagu ǀhaoǀhao. 28 ǃHaode ǂhomi ǁîs ǃoagu di nî torodīse. Mediab gao-aogu, gowoniagu tsî hoaraga ǂamkhoegu tsî ǁîgu xa ǂgaeǂguihe ǃhūgu hoagu tsîna. 29 ǃHūb ge ǂgubi tsî nî ǀkhū, ǃKhūb ge Babilons ǂama mîǀguin ǁaposase mâ xui-ao, Babilons ǃhūbab hoaragase nî hîkākā, ǁanǂgāsabe-i xare-i ǁîb ǃnâ ǃgau tidese ǃkhaisa. 30 Babilons toroǃkhamaogu ge ǃkhamǀû hâ. ǁÎgu ge ǁkhuigu âgu ǃnâ ǂnôa, ǁîgu ǀgaib ge toa hâ, tarekhoedi khami gu ge ī. ǃĀs di omdi ge ra ǂhubi, dao-amdi ǁkhaeǃnaogu ge khôa hâ. 31 Nē sîsabeba xu naub ti gu ge Babilons gao-aob ǃoa nî ǃkhoe, ǁîba gu nî ǂhôase, ǁîb di ǃās go hoaǀkhāga xu ǂgâǃnâhesa. 32 ǃGâunadi go ūhe tsî ǂāgu go ǂhubihe tsî gu toroǃkhamaoga ǃaob xa ǃkhōhe hâ ǃkhaisa. 33 Nētib ge ǃKhūb Hoaǀgaixab, Israeli Eloba ra mî: Babilons ôas ge dāǃnâǃkhais ase ī dāǃnâhes ga ǁaeb ai. ǂKhari ǁaerob ǀguib, ob ge ǃgaoǁaeb âsa nî hā.”
34 Babilons gao-aob Nebukadnesari ge tita ge hapu,
ǁîb ge tita ge ǂkhūǂkhū.
ǁÎb ge tita ge ǀkhaiǃnâ xapa kai,
ǁîb ge draki khami ge haraǂgā te.
ǃNāb âbab ge ti ǁkhoaxasigu ǀkha ge ǀoaǀoa,
ǁîb ge tita ge ǀnapuǂuiǃnâ.
35 An Sions ǁanǂgāsabena mî re:
ǂKhawadīb tita tsî ti khoen ge dī-ūheba
ab Babilonsa hāǂam.
An Jerusalems ǁanǂgāsabena mî re:
Ab sida ǀaoba Xaldeab ǁanǂgāsaben ai hā.
ǃKhūb ge Israela nî hui
36 ǁNā-amagab ge ǃKhūba nēti ra mî: “Tita ge sado nî ǂnoaguba tsî sado nî ǀkhaoba. Tita ge Babilons ǁgam-e nî ǂnâ kai tsî ǁîs ǀausa nî ǂnâǂnâ. 37 Tsîs ge Babilonsa nî ǀuiǁkhopo kai; ǀgirin di ǁanǃkhais, khoen ǁîs xa ra burugâs, khoe-i xare-i xa ǁanǃnâhe tamasa. 38 ǁÎs di khoen ge ǀhûpe xamn khami nî ǃguru tsî ǂkham xamron khami nî ā. 39 ǁÎn di turab ga khâi, o ta ge tita ǁîna ǂûǁare-e dība tsî nî āǃgâu kai, dân nîga, tsîn ge nî ǁomǃari tsî ǁkhawa ǂkhai tide,”
tib ge ǃKhūba ra mî.40 “Tita ge ǁîna ǂāheǃgû ra ǁkhaon tsî baigu tsî pirigu khami nî ǂgaeǂguibē.”
Babilonsa nî hāǂam ǃgomsigu
41 “Mâtis Babilonsa ūhe hâ; ǁîs hoaraga ǃhūbaib xa ra koahesa ǃkhōhe hâ. Mâtis Babilonsa burugâxū kai hâ ǃhaodi ǃnâ. 42 Hurib ge Babilonsa ge dâuǂam; ǁîs ge ǁaixa ǃgabigu xa ge ǃgū-aihe. 43 ǁÎs di ǃādi ge ge ǃaoǃaosa ǃkhai kai; ǂnâsa ǃhū tsî ǃgaroǃhū kai. Khoe-i xare-i ge ǁnāpa ǁan tama hâ, khoe-i xare-i ge ǁnāpa-u ǃkharu tama hâ. 44 Tita ge Beli Babilons ǃnâ hâba nî ǁkhara, tsî ta ge harab ge hâ i xūna nî ǀkhûiǂui kai bi. ǁAedi ge ǃaruǀî ǁîb ǃoa ǃgû tide. Babilons di ǂnubiǂoab ge go ǁnā. 45 Ti ǁaese ǁîsa xu ǂoa. A i mâ-i hoa-e ǁî-i ûiba sâu, ǀaexa ǁaib ǃKhūb diba xu. 46 Tā ǂkhabuǂâi, î tā ǃao, ǃhūb ǃnâ du ra ǁnâu gommi xa. Mâ kurib hoabab ge gomma nî hâ. ǂKhawadīb ge ǃhūb ǃnâ nî hâ, nē ǂgaeǂgui-aob ge naub ǃoagu nî ǃkham. 47 ǁAeb ge go ǀoa, Babilons īga ta nî ǁkharaba. ǁÎs di hoaraga ǃhūb ge nî taotaohe tsîn ge ǁîs di ǃgamhe hâna ǁîs ǃnâ nî ǁgoe. 48 O kha ge ǀhommi tsî ǃhūbaib tsî ǁîkha ǃnâ hân tsîn hoana Babilons di ǁnās ǂama nî dâ, ǁîsa nî hîkākān ǀapasa xu nî ǀkhī xui-ao,”
tib ge ǃKhūba ra mî.49 “Babilons ge nî ǁnā, Israeli din hîas ge ǃgamn ǃaroma, tsî ǁnās ǁkhās xase ǁkhāti hoaraga ǃhūbaib din hîas ge ǃgamn ǃaroma.
Elob ǂhôas, Babilons ǃnâ hâ Israelǁîn ǃoa
50 “Sadu gôaba xu ge ûiǂoado, ūbēsen, tā mâ. ǃKhūb xa ǃnūse du hâpa xu ǂâi, î Jerusalems tsîn xa ǂâiǂâisen. 51 Sida ge tao hâ, ǃgôaǁnâhe da ge xui-ao. ǃHaraxūb ge sida aide ǃgū-ai hâ, ǃhaokhoen ge ǃKhūb ommi di ǃanu ǃkhaidi ǃnâ ǂgâ amaga. 52 ǁNā-amaga mû, tsēdi ge ǃgoaxa, tib ge ǃKhūba ra mî, o ta ge Babilons īga nî ǁkhara tsîn ge tsuihe hâna ǁîs di ǃhūb hoaragab ǃnâ nî ǃgae. 53 Babilons ga ǀhommi kōse ǃapa tsî ǁkhui-ommi âsa ǀgaiǀgai, xawe ta ge tita hîkākā-aoga ǁîsa nî sîba,”
tib ge ǃKhūba ra mî.ǃKhūb ge Babilonsa nî hîkākā
54 “ǃAub di ǀōb ge Babilonsa xu ra hā,
kai ǂkhôadīb di ǂkhupiba Xaldeaba xu.
55 ǃKhūb ge Babilonsa ra hîkākā,
tsî ǁîs di ǂkhupixasiba ra ǃnō kai.
ǀGaisa ǃgabigu khamin ge khākhoena
ǁîs ǃoagu ra hā
ǁÎn domgu di ǂkhupib ge ra ǀgai.
56 Hîkākā-aob ge Babilonsa ra hāǂam,
ǁîs di toroǃkhamaogu ge ra ǃkhōhe,
ǁîgu di khādi ge ra khôaǃāhe.
ǃKhūb, ǀkhaob di Elob ge
ǁîsa amase nî dīdawa-am.
57 Tita ge ǂamkhoegu âsa nî āǀhoro kai,
gowoniagu, ǂgaeǂgui-aogu
tsî toroǃkhamaogu tsîga.
ǁÎgu ge nî ǁomǃari tsî ǂkhai tide,
tib ge Gao-aob, ǃKhūb Hoaǀgaixab,
ti ǀon hâba ra mî.
58 Nētib ge ǃKhūb Hoaǀgaixaba ra mî:
Babilons di ǀgaisa ǂnubiǂgoab ge
ǃhūb ai nî khôaǁguihe.
ǁÎs di ǀgapi dao-amdi ge nî khauǃkhūhe.
Khoen ge ǁause ra sîsen
tsî ǀaes xa nî hîkākāhe xūn
ǃaroma ra ǀhupuǀhupusen.”
Jeremiab ǂhôas ge Babilons ǃoa ra sîhe
59 Nēs ge kēbo-aob Jeremiab ge Neriab ôa tsî Maxsejaxi ǁnurib Serajaba mā mîmāsa, Judab gao-aob Sedekiab di hakaǁî ǂgaeǂguis kurib ǃnâb ge ǁîb ǀkha Babilons ǃoa ǃgû ǃnubai. Serajab ge ge sâǃkhaib di mûǂamao i. 60 Jeremiab ge Babilonsa nî hāǂam ǂōǂōsigu hoagu tsî Babilons xa xoahe hâ xūn hoan tsîna ǂkhanis ǃnâ ge xoamâi. 61 Tsîb ge Jeremiaba Serajab ǃoa ge mî: “Babilons ǃnâts ga sī, ots ge nē mîdi hoade nî khomai. 62 Tsîts ge nî mî: ‘O ǃKhūtse, sats ge nē ǃāsats nî hîkākā tsî i khoe-i kas, ûitsama xū-i kas hoasa ǁîs ǃnâ ǁan tide, tsîs ǀamose nî ǃū-aisa ǃkhai, ti ge mî.’ 63 Nē ǂkhanisats ga khomaitoa, ots ge ǀui-e ǁîs ai ǃgae tsî ǁîsa Eufrati ǃnâ aoǂgā, 64 tsî nî mî: ‘Nētis ge Babilonsa nî dūǂgâ tsî ǁkhawa ǂoaxa tide, ǁnā ǁkharab ǁîs ǂama ta nî hā-ūb ǃaroma.’ ” Nēpa di ge Jeremiab mîde ra ǀuni.
© Khoekhoegowab Elobmîs © Bible Society in Namibia, 2020.
