Levitikus 6 - Khoekhoegowab New Translation 2020 (KKG20)

1 ǃKhūb ge sao ra ǁgaraga Moseba ge mā: 2 Khoe-i ga ǁore tsî ǃKhūb ǃoagu ǂgomoǃnâse ī, horesa Israelǁî-i di ǁguibasa i ga mā-oa ǂgao tama i tamas ka io ǁî-i di xū-e ǃnaris tamas ka io ǀhôagaoǃnâs ǀkha ǀhanas, 3 tamas ka io kā tsî ge hōhe xū-e hō tama ta hâ ti nūs ǀkha ǂhumi; 4-5 o-i ge ǁnāti ra ǁore khoe-e ǀhôagaob ǀkha i ge hō hâ i xūn hoana nî matare-oa. ǀHapixase i ra hōhe tsēs ai i ge ǁnā xū-i di ǀhonkhoe-e ǀoasase nî matare-oa tsî ǁnās xōǀkhā ǀgamdisi persentga nî māǀaro. 6 ǁÎ-i ge matare-oas di ǁguibas ase ǃKhūb ǃgôasib ǃaroma, ūo baib tamas ka io ǂkharapiriba pristera nî ǀkhī-ūba. Nē baib tamas ka io ǂkharapirib di ǁkhāsib ge xoaǁguisa ǁgaragu ǃoa nî ǀnōhe. 7 Pristeri ge ǁî-e ǂkhîbagus ǁguibasa nî dība, o-i ge ǁoren â-e nî ǀûbahe.

Khauǁguibadi

8 ǃKhūb ge Moseba ge mîba, 9 îb Aronni tsî ǁîb ôagu tsîga sao ra ǁgaragu, mâ ǀgaugu ai di khauǁguibade nî dīhes diga mā: Hoaraga tsuxubas ge khauǁguibasa altars ai nî ǁnāxūhe tsîs ge ǀaesa nî khauhâhâ. 10 Ob ge pristeri tsaura, ǃuri, ǃnubu purukhoesa ǃnaka tsî tsaura ǃuri saraba ǀgapise ana hâba ǁnuixa tsaob altars ai hâba ǃanuǃanu tsî altars xōǀkhā nî tsoroǂnûi. 11 ǁNās khaoǃgâb ge pristera ǁnā sarana ǂgaeǂui tsî tsaoba hâǃkhaib ǃaugaba xu ǃanu ǃkhais tawa nî sī-ū. 12 Altars ai ra khau ǀaes ge tātsēs tsîna ǀarihe tide, xawe nî khauhâhâ. Pristeri ge mâ ǁgoas hoasa ǁîs ai ǀaena ǁgui, khauǁguibasa ǂhomi tsî ǂkhîbagus ǁguibas di kauba ǁîs ai nî ǂhubi. 13 ǀAes ge tātsēs tsîna ǀarihe tide, xawe nî khauhâhâ.

ǃHoroǁguibadi

14 Sao ragu ge ǁgaragu ǃhoroǁguibas diga: Aronni ôagu di ǀguib ge ǃhoroǁguibasa altars di aisǀkhāb ai ǃKhūba sī nî ǁguiba. 15 ǁNās khaoǃgâb ge ǃomsǀoa mel-i tsî ǀkhera-oli-i tsîna ū, ǁî-i ai hâ ǃgâihamxūn hoan ǀkha tsî altars ai ǁgauǁgaus ase nî ǂhubi, hoaraga xūn ge ǃKhūb di ǃgôasib ǁguibahes ǁgauǁgaus ase nî ǂhubihe. Nē ǁguibas ge ǃKhūba ǃgâi ǁamaba ūba hâs ase ī. 16-17 ǃGau ra ǃâb ge pristergu xa nî ǂûhe. ǁÎ-i ge khūkhū-e ūhâ tamase nî amhe tsî ǃanu ǃkhaib, aisǀkhāb ǃKhūb di Tentommi ǁgâuǂnamib dib ǃnâ nî ǂûhe. ǃKhūb ge ǁî-e pristerga ǂûǁguibas di ǃâ-i, ǁîgu di-i ase ge mā. ǁÎ-i ge ǁoreǁguibas tsî matare-oas ǁguibadi khami ǀgui a ǃanu. 18 ǃGoaxaǁaeb hoab ǃnâb ge Aronni surib di aorekhoega mel-e nî ǂû ǁîgu di ǃâs, ǃKhūba ra ǁguibahe ǂûn dis ase. ǀKhara khoe-i hîa nē ǂûǁguibasa ga tsâǀkhā-i hoa-i ge ǁîs di ǃanusib di ǀgaib xa nî tsūǃō kaihe.

19 ǃKhūb ge sao ra ǁgaraga Moseba ge mîmā: 20 Aronni tsî ǁîb ôagu tsîn ge ǁîgu di pristerse ǀnauǂgās tsēs ai sao ra ǁguibasa ǃKhūba nî ǁguiba: ǀGui kiloxrammi mel-i (tsēkorobe ǃhoroǁguibas di ǀnōba ūhâ-i), ǃkhareǃâba ǁgoas ai tsî nau ǃkhareǃâba ǃoes ǃnâ. 21 ǁÎ-e ǀkhera-oli-i ǀkha habaǀhao, î panni ǃnâ am; ǃârodi ǃnâ ǃhoroǁguibas ǃKhūba ǃgâi ǁamaba ūba hâsa ǀkhī-ūba. 22 ǃGoaxaǁaeb hoab ǃnâb ge Aronni surib di aorekhoeb hoab ǀGapipristerse ra ǃoababa nē ǁguibasa nî ǁguiba. Hoaraga ǁguibas ge ǁguibas ase ǃKhūb di ǃgôasib ǃoa nîra ǂhubiǂuihe. 23 ǀGui ǃâ-i ǃhoroǁguibas di-i xare-i pristeri ra ǁguiba-i ge ǂûhe tide tsî hoaraga-e nî ǂhubiǂuihe.

ǀŪǂamse ra ǁorehe ǁoreǁguibadi

24 ǃKhūb ge Moseba ge mîba, 25 îb Aronni tsî ǁîb ôagu tsîga sao ra ǁgaragu ǀūǂamse ra dīhe ǁoren di ǁoreǁguibadi ǃaroma mā: ǁOreǁguibas ǃaroma ra ǁguibahe ǀgoa-i ge ǃKhūb aiǃâ altars di ǀapasǀkhāb ai nî ǃgaoxadomhe, khauǁguibas ǃaroma ra ǃgaoxadomhe ǀgoan ra ǃgamhe ǃkhais tawa. ǁOreǁguibas ge kaise a ǃanu. 26 ǁNā pristeri hîa ra ǀgoa-e ǁguibab ge ǁî-e ǃanu ǃkhaib, ǃKhūb di Tentommi ǁgâuǂnamib dib ǃnâ nî ǂû. 27 Nē ǀgoa-i di ǁgan-e ga tsâǀkhā-i hoa-i ge nî ǃanu. Anahe hâ sara-i tamas ka io xū-i ga ǁguibahe ra ǀgoa-i di ǀaob xa a ǀaisenaihe, o-i ge ǃanu ǃkhais tawa nî ǁāhe. 28 ǂGoasūs ǃnâ iga ǁgan-e sâihe, os ge nî khôahe tsî bronssūs ǃnâs ka, os ge ǁîsa ǃamkuse nî ǁāǃnâhe. 29 Pristersi omarisa xu hâ aorekhoeb hoab ge nē ǁguibasa nî ǂû; ǁîs ge a ǃanu. 30 Xawe mâ ǀao-i ǀgui-i ga ǃKhūb di Tentommi ǃnâ ǂgâxa-ūhe tsî ǁoren di ǂkhîbagus ǃaroma ǃAnu ǃKhaib ǃnâ sîsenūhe, o-i ge ǁnā ǀgoa-i di ǁgan-e ǂûhe tamase nî ǂhubiǂuihe.