1 Gā-ai ǂgaeǂgui-aob ge ǁîb khoena nî ǁgauǃnâ tsî ǁîb di ǂgaeǂguis ge nî ǃamku. 2 Hoa ǂammâisagu tsî ǁanǂgāsaben tsîn ge ǁîn di ǂgaeǂgui-aob khami nî ī. 3 ǁKhāǁkhāsen-e ūhâ tama gao-aob ge ǁîb di khoena nî hîkākā, xaweb ǁîb di ǂgaeǂgui-aogu ga gā-ai, ob ge ǂhanuba nî ǀgai. 4 ǃKhūb ge ǃhūbaib di ǂhanuba ra mû tsî ǂhanu khoe-e ǂhanu ǁaeb ai, ǂgaeǂguis ǃnâ ra ǁgaumâi. 5 ǁNā khoe-i di ǃgâiǃgâb ge ǃKhūb ǃomkha ǃnâ hâ. ǃKhūb ge a ǃgôasib di ǀau, mâ ǂammâisab hoab ra māheba.
ǀGapiǂâixasib
6 Tā khoe-i ǀkha dī-i ra ǂkhari tsūdī-i hoa-i ǃaroma ǁaixa. Hōǃâts ka khoe-i go sa ǀgapiǂâixasiba tsûtsû ǃkhaisa, o tā mādawas ǃaroma ǁî-e tsûtsû. 7 ǁÎǃgôasenxasib tsî ǂhanuoǃnâsib ge ǃKhūb tsî khoeb tsîkha hoakha xa a ǃhuisahe. 8 ǂHanuoǃnâsib, ǁîǃgôasenxasib tsî ǃkhūsib tsîn ge ǀgaisa ǁaes di ǁnāsa ra ǃaroma, tsîn ge ǀnîna nē ǃkhaiba nî ūǃkhunise ra khâi. 9 Sada ge tsara tsî tsaos ǀguisa i. Tare-i ǂnīsa ai da nî-e da ge hō? Sada sorodi ge ûitsama da a hîa ra ǁgao. 10 Gaxu ǀaeb ge ǀaedī-aoba ra ǂâiǂhansen kai. Gao-aob tsîn ge nētsē ûitsama tsî ǁari a ǁō ǁkhā. 11 Khoe-i ga ǁō, o-i hoara ra ǀumin ge ǂunin, ǀgînan tsî ǀnî khami ī xoxon tsîna.
12 ǀGapiǂâixasib ge khoe-i ga ǃKhūb, ǁî-i di Kuru-aoba ǃharaxū, o ra tsoatsoa. 13 ǀGapiǂâixasib ge ǁoreba ra ǂnâǂui ǀaus khami ī tsî mâtikōse iga mâǀgai, xawe i ge ǂkhabusasib ǀkha nî ǀoaǀoahe. ǁNā-amagas ge ǃKhūb ra ǃhuriǃhurisa ǁkharaba ǀnî khoen ai hā-ū tsî ǁîna hoaragase hîkākāsa. 14 ǃKhūb ge gao-aoga tronde xu ge ūǁnâ tsî hoaǃnā-aixa khoega ǁîgu di soadi ǃnâ ge mâi. 15 ǃKhūb ge ǁaede ǁîdi di ǃhūga xu ge ūǂui tsî ǃhūga hoaǃnā-aixa khoena ge mā. 16 ǃKhūb ge nau ǁaedi di ǀgaiba ūbē tsî ǁîdi di ǃhūga hoaragase ge hîkākā. 17 ǁÎb ge ǀnîn ǁîn dina ǃaruǀîn ǂâihōhe tidese hoaragase ge hîkākā 18 Kuru-aob ge khoen nî ǀgapiǂâixa tsî ǁîǃgôasen ǃkhaisa ǂgao tama hâ.
ǃGôasiba nî māhe khoen
19 Tarina ǃgôasiba nî māhe? ǃKhūban ra ǃaoǃgâ khoen ge ǃgôasiba nî māhe. Tarina ǃgôasiba māhe tide? ǃKhūb di mîmāden ge ǁnâuǀnamoǃnâ, xui-aon ge khoena ǃgôasiba māhe tide. 20 ǂGaeǂgui-aob ge ǁnān, ǁîba ra saoǃgonn xa ǃgôasiba nî māhe tsîb ge ǃKhūba ǁnān, ǁîba ra ǃaoǃgâna ǃgôasiba ra mā.
22 ǃKhū hâ khoen, koahegomxa khoen tsî ǀgâsa khoen hoan ge ǃKhūba ǃaoǃgâs ǃnâ a ǂnīsa. 23 ǂHanu tama i ge hâ gā-ai ǀgâsa khoe-e ǃharaxūsa tamas ka io ǁore-ao-e ǃgôasiba māsa. 24 Khoen ge hugaǀgui ǃgôaǃgôasa khoen, ǀgoraǃgâ-aon tsî ǂgaeǂgui-aon tsîna ǃgôasiba ra mā, xawe ǁnān ǃKhūba ra ǃaoǃgân ge hoan xa ǃnāsa koasa nî ǃkhōǃoa. 25 Khobo-i hîa gā-ai i ge ǃnorasa ǁanǂgāsaben xa nî ǃoabahe tsî gā-ai khoe-i ge ǁnās xa ǃgae tide.
ǃGamǃgamsens tsî ǁîǃgôasens
26 Sa sîsenats ga dīo, tā nauna mâtikōsets ǃgâise sîsen ǁkhā ǃkhaisa ǁgau tsî ǃgomsinats ga ūhâo, kai ǁgauǂuisa dī. 27 ǃGâi nî ǃkhais ge sîsen tsîts nî ǂhâbats hâs xa ǃnāsase hōǂgāsa, koasen tsîts nî ǃâs xa.
28 Ti ôatse, sa ǁîǃgôasensa ǃkhōǀgara, xawe ǃgamǃgamsensa ūhâ. Satsa anu hâ ama mûhesasiba ūhâ. 29 ǁNāpa i ge ǀhapioǃnâsi-e khoe-i ǁî-i xa ra ǂkhabase ǃhoa-i ǃaroma a ǀkhai. ǀGui-i tsîn ge ǁî-e ǃgôasen tama-e, ǃgôasiba mā tama. 30 ǀGâsa khoen ge ǁîn di ǃgâi ǂūxasib ǃaroma ǃgôasiba nî māhe tsîn ge ǃkhū hâna ǁîn di ǃkhūsib ǃaroma ǃgôasiba nî māhe. 31 Khoe-i ga ǀgâsa-i a hîa ǃgôasiba māhe, o ǂâis ǀguisa hî re mâtikōse i ǃkhū i kao, ǃgôasiba nî māhe ǃkhaisa. Khoe-i ga ǃkhū i hâ hîa ǃgôaǁnâhe, o ǂâis ǀguisa hî re mâtikōse i ǀgâsa i kao nî ǃgôaǁnâhe ǃkhaisa.
© Khoekhoegowab Elobmîs © Bible Society in Namibia, 2020.
