Ganganǀgores
Davidi dis
1 Tita ge satsa nî koa ǃKhūtse;
elogu aiǃâ ta ge satsa nî koaǁnaeba.
2 Sa ǃanusib Tempeli ǃnâ ta ge ra ǃhon ǂgao;
sa hâhâ ra ǀnammi ǃaroma ta ge sa ǀonsa ra kare ǂgao,
sa ǂgomǂgomsasib ǃaroma.
Sa ǀons tsî sa mîsats ge hoa xūn ǂamai kaikai amaga.
3 ǂGai ta ka tsēs aits ge ra ǁnâu-am te
tsîts ge ti ǀoms ǃnâ kai ǀgaiba ra mā te.
4 Hoaraga gao-aogu ǃhūbaib digu ge sats ǃKhūtsa nî koa,
sa ams di mîde gu ga ǁnâuo.
5 ǃKhūb di daogu xa gu ge nî ǁnae
ǃKhūb di ǂkhaisib a kai amaga.
6 ǃKhūb ge a ǀgapi, xaweb ge ǃgamǃgamsensana ra mû,
tsîb ge ǀgapiǂâixana ǃnūseba xu a ǂan.
7 ǂŌǂōsib ǃnâ ta ga ǃgû xawets ge ti ûiba ra sâu;
sa ǃommats ge ti khākhoen ǁaixasib ǃoagu ra ǀhōǂui
tsîb ge sa amǀkhāb ǃomma ra huiǂui te.
8 ǃKhūb ge tita ra mâǂgâba.
ǃKhūtse sa hâhâ ra ǀnammi ge ǀamose ra hâ.
Tā sa ǃomkha di sîsenna ǁnāxū re.
© Khoekhoegowab Elobmîs © Bible Society in Namibia, 2020.
