Jerusalems di ǁnās
1 Khoeseǁî kurib Judab gao-aob Sedekiab ǂgaeǂguis dib di disiǁî ǁkhâb ǃnâb ge Babilons gao-aob Nebukadnesara ǁîb di toroǂnubis hoaragas ǀkha Jerusalems ǃoa hā tsî ǁîsa ge ǃnamiǂgā. 2 Disiǀguiǀaǁî kurib Sedekiab gaosis dib ǃnâ, hakaǁî ǁkhâb di khoeseǁî tsēs aib ge ǃās di ǂnubiǂgoaba ge khôaǃkhopahe.
3 O gu ge Babilons gao-aob di ǂamkhoegu hoaga ǁAegub Dao-ams tawa sī ge ǂnû: Nergal-Sareseri, Samgar-Nebob, Sarsexim hâgu hoaga.
4 Judab gao-aob Sedekiab tsî ǁîb di toroǃkhamaogu hoagu ge ǁîga gu ge mûo ge ǁhâ. ǁÎgu ge tsuxuba gao-aob ǃhanaba-ū ra ī daob ǀkha, ǀgam ǂnubiǂgoakha ǁaegu hâ dao-ams ǃnâ-u ǃāsa xu ǂoa tsî Jordanǃgoaǃnāb ǁga ge ǃgûǂoa. 5 Xawes ge Xaldeaǁîn di toroǂnubisa ǁîga ǃgôaǃgon tsî Sedekiaba Jerixos ǂgāgu ǃnâ saoǁae tsî ge ǃkhō. Tsî gu ge ǁîba Babilons gao-aob Nebukadnesari tawa Riblas Hamatǀkharib ǃnâ ǂnôas ǃnâ ge hā-ū, tsîb ge ǁîba ǁnāpa ge ǁkhara bi. 6 Babilons gao-aob ge ǁnāpa Riblas ǃnâ Sedekiab mûǁae Sedekiab ôaga ge ǃgam tsî ǁkhāti Judab ǂamkhoegu hoagu tsîna. 7 Tsîb ge Sedekiaba ǁhoroǂuimû tsî ǁîba khedegu ǀkha ge ǃgae, Babilons ǃoab nî ǃgû-ūhese. 8 Xaldeaǁîn ge gao-ommi tsî khoen di omdi tsîna khauǃkhū tsî Jerusalems di ǂnubiǂgoaga ge khôaǁnâ. 9 ǃÛi-aogu di danab Nebusaradanni ge ǃās ǃnâ ge ǃgau khoen tsî ǁîb ǃoa ge ǃgûǃgâu hâ in tsîn hoana Babilons ǁga ǃkhōsabese ge ǃgû-ū. 10 Xaweb ge Nebusaradanna ǀgâsa khoen, xū-i xare-e ge ūhâ tama hâ ina Judab ǃnâ ǁnāxū tsî ǁîna draibeǃhanagu tsî ǃhanaǃhūgu tsîna ge mā.
Jeremiab di ǁnāxūhes
11 Babilons gao-aob Nebukadnesari ge ǃûi-aogu di danab Nebusaradanna Jeremiab ǂama ge mîmā: 12 “Jeremiaba sī ū, î ǁîba kōǃgâ, î ǁîba tā tsūdī, xawe mîba tsib ra khami dī-ū bi.” 13 ǁNāti gu ge ǃûi-aogu di danab Nebusaradanni tsî dana ǂamkhoekha Nebusasbanni tsî Nergal-Sareseri tsî nau ǂamkhoegu Babilons gao-aob digu hoagu tsîga 14 Jeremiaba ǃûi-aogu di ai-omma xu sī ū tsî ǁîba Ahikammi ôa tsî Safanni ǁnurib Gedaljab ai ge māǁnâ, ǁîb oms ǃnâb nî hâse. ǁNātib ge Jeremiaba ǁaes ǁaegu ge hâ.
ǃKhūb ge Ebed-Melekab nî huisa ra mîmâi
15 ǃKhūb di mîs ge Jeremiaba noxopab ǃûi-aogu di ai-ommi ǃnâ ǂganamǂgāhe hâ hîa ge hāba: 16 “ǃGû, î Etiopiaǁîb Ebed-Meleka sī mîba: Nētib ge ǃKhūb Hoaǀgaixab Israeli di Eloba ra mî: Tita ge ti mîdi nē ǃās ǃoagu ta ge mîde nî dīǀoaǀoa, ǂkhawab ǃoa tsî ǃgâib ǃoa tama. Sats ge nēn ra īsa nî mû. 17 Xawe tita ge satsa ǁnātsē nî huiǂui tsîts ge ǁnā khoegu, ǁîgats ra ǃaogu ǃomǁae māǁnâhe tide”
tib ge ǃKhūba ra mî.18 “Tita ge amase nî sâu tsi tsîts ge ǃgamhe tide. Sats ge ûib âts ǀkha nî ûiǂoa, tita aits ge ǂgomaiǂnûi amaga,”
tib ge ǃKhūba ra mî.© Khoekhoegowab Elobmîs © Bible Society in Namibia, 2020.
