2 Tesalonikaǁîn 2 - Khoekhoegowab New Translation 2020 (KKG20)

Xristub* di ǁkhawa hās

1 ǃGâsado, sada ǃKhūb Jesub Xristub di hās tsî sada di ǁîb ǀkha ǀhaos xa ta ge ra ǂgan du, 2 ǂâidi âdu ǃhaese ǁnobeǁnobehe tamas ka io ǃhuri kaihe tidesa; gaga-i xas kas, mî-i xas kas, sîǂkhani-i sige xu hâ-i xas kas hoasa, ǃKhūb di tsēs hā hâs xase. 3 Tā i khoe-i xare-e ǂgaeǂhapu du; aibes ǁnāǁgôasa hā tama tsîb khoeb ǁgauoǃnâsib dib, hîkākās ǃoa ge ǃnaeba ǂhaiǂhaihe tama hâ hîa, 4 ǁnāb mâǃoas ǃnâ aitsama ra mâisenni tsî hoan ǂamai ra ǀgapiǀgapisenni, Elob ǀkha dīxūxa xū-i hoa-i ǃoagu tamas ka io Elob Tempeli ǃnâ ǂnû tsî Elob ase ra mâi-aiǃâsenna.

5 O du kha ǂâihō tama hâ sadu ǀkha da ge hâ i ǁaeb ǃnâ da gere ǁîn xa ǃhoaba du ǃkhaisa? 6 Tsî tare-i nēsi ǁîba ra ūdawa ǃkhaisa du ge ǂan, îb ǁîb di ǁaeb ai ǂhaiǂhaihe. 7 ǁGauoǃnâsib ǂganǃgâsasib dib ge ǀnai ra sîsen; nēsi goro ūdawab nî ǁaeguba xu bēs ǀguis. 8 Tsî ǁnā ǁaeb ais ge ǂhanuob, ǃKhūb Jesub xa ams âb di ǀommi ǀkha nî dībēheb tsî ǁîb hās di ǂhais ǀkha nî hîkākāheb nî ǂhaiǂhaihesa. 9 Hās âb ge Satanni* sîsenni hîa hoa ǀgaib, saodi tsî ǂhumi buruxa dīn ǃoa hâ, 10 ǂgui ǃkharagaǃnâgu ǂgaeǂhapudi ǂhanuoǃnâsib didi ǀkha, ǁnān amab di ǀnamman ūǃoa ǂgao tama ǃkhais ǃaroma nî hîkākāhen di sâuhes ǃaroma. 11 ǁNā-amagab ge Eloba ǁîna ǀgaisa ǂgaeǂhapusa nî sîba, ǁnā ǂhumiban nî ǂgomse, 12 în ǀgoraǃgâhe ǁkhā, hoaragan hîa amaba ǂgom tama i tsî ǂhanuoǃnâsib ǃnâ gere ǃgâiǃgâisenna.

Sadu ge ǃgâiǃōsib ǃaroma ǁhûiǂuihe hâ

13 ǃGâsado, sige ge hoaǁae Eloba sadu ǃaroma nî gangan, ǃKhūb xa du ǀnamhe hâ tsî Elob xa du ǂguroǃnaesan ǃgâiǃōsib din, Gagab di ǃanuǃanusens tsî ǂgoms amab dis ǃnân ase ǃkhōǂuibasenhe hâ amaga. 14 Elob ge sado nēs ǃoa ǂgai hâ sige di ǃGâiǂhôas ǃnâ-u, sada ǃKhūb Jesub Xristub di ǂkhaisiba du nî hōse. 15 ǁNā-amaga ǃgâsado, mâǁapo î ǃkhōǀgaipe re ǁnaetigu hîa ge ge sado ǁkhāǁkhāga, mîs ǀkha tamas ka io sîǂkhani-i ǃnâ-u.

16 Ab nēsi sada ǃKhūb, Jesub Xristub tsî Elob sada di ǁgûb hîa, sada ǀnam hâ tsî ǀamo ǁkhaeǂgaob tsî ǃgâi ǃâubasensa ǀkhommi ǃnâ ge māba 17 sadu ǂgaoga ǁkhaeǂgao tsî ǀgaiǀgaiǃnâ du, mâ ǃgâi sîsenni tsî mî du ran hoan ǃnâ.