Dans ǁnaetsanas Davidi dis
(Psalmdi 18:2-50)1 Davidi ge ǃKhūb ge ǁîb di khākhoen hoan tsî Saula xu huiǂui bi, o nē ǁnaetsanasa ǃKhūba ge ǁnaeba.
2 ǃKhūb ge a ti ǃgareǀui, ti sâusenǃkhai
tsî a ti huiǂui-ao.
3 Ti Elob, ti ǃgareǀuib ǁîb tawa ta ra sâusenni,
ti ǁkhaukhō tsî ǀgaisa ore-aob,
ti ǁaposa hâǃkhaib
ti ǁhaiǁhâǃkhai tsî ti ǃnoraǃnora-aob,
ǂkhabadība xu ra ore teba.
4 Tita ge ǃKhūba ra ǂgaiǀî, ǁîb karehesa anuba,
o ta ge ti khākhoena xu ra orehe.
5 ǁŌb ǃgabigu ge ǃnamiǂgā te hâ,
hîkākā ra ǁgamgu ge ra dâuǂam te.
6 ǃHâugu ǁŌhân Hâǃkhaib digu ge ra ǃgaeǃnon te,
ǁōb ge ǁnoaga ra ǁguiba te.
7 ǂŌǂōsib ǃnâ ta ge ǃKhūba ge ǂgaiǀî,
ti Eloba ta ge huib ǃaroma ge ǂgaiǀî,
ob ge ǁîba ti domma ǁîb Tempeli ǃnâ ge ǁnâu.
ǁÎb ǃoa ta ge huiǂgan, ob ge ge ǃgâ te.
8 ǃHūbaib ge ǀkhū tsî ge ǂgubi;
ǀhommi di ǃgaoǃgaogu ge ǀgana tsî ge ǁnobe,
ǁîb ge ǁaixa amaga.
9 ǀAnni ge ǂguis âba xu ge ǂoaxa.
Hîkākā ra ǀaeǁhabub ge ams âba xu ge ǀkhī,
khau ra ǂnomdi ge ǁîba xu ge ǂoaxa.
10 ǁÎb ge ǀhomma ǂamǂam tsî ge ǁgôaxa,
ǃkhae ǃâus ge ǂaira âb ǃnaka ge hâ i.
11 ǁÎb ge xerub ai ǂoa tsî ge ǁkhana;
ǂoab ǁgabokha aib ge ge ǂhai.
12 ǃKhaenab ǀkhab ge ge ǃgūǀkhāsen,
ǁgamxa, ǃkhae ǃâudi ge ǁîb ǂnamipe ge hâ i.
13 Napab ǁîb aiǃâ hâb xa di ge
ǀaes ǂnomde ge ǂhubihe.
14 ǃKhūb ge ǀhomma xu ge ǃguru;
Hoan xa ǀGapib di dommi ge ge ǁnâuhe.
15 ǁÎb ge ǂāgu âba ǁkhâu
tsî khākhoen âba ge ǀgaruǀgaru;
napagu ǀkhab ge ǁîna ge ǃkhoebē kai.
16 Hurib di ǃhūb ge ge mûsen,
ǃhūbaib ǃgaoǃgaogu ge ge ǀkhaiǀkhā
ǃKhūb xa gu ge ǀauheo,
ǁîgu ǂamab ge ǁaixasib âb ǃnâ ǃgomo.
17 ǁÎb ge ǃommi âba ǀgapiseba xu ǀhōǂui
tsî ge ǃkhō te;
ǃgam ǁgamga xub ge ge ǂgaeǂui te.
18 ǁÎb ge ǀgaisaba te ge i khākhoena
xu ge huiǂui te,
ǁnān tita ǁkhan hâna xu,
kaisen ge ǀgaisaba te i xui-ao.
19 ǂŌǂōsib ǃnâ ta ge hâ i tsēs ain ge ǁnāǂam te,
xaweb ge ǃKhūba ge sâu te.
20 ǁÎb ge ǃnorasasib ǃoa ge ǂoa kai te;
ǁîb ge ge huiǂui te, ǀnam teb a amaga.
21 ǃKhūb ge ge mādawa-am te
ti ǂhanu-aisib ǃaroma;
ǁîb ge ge ǀkhae te, ǀhapio ta a amaga.
22 Tita ge ǃKhūb di ǂnûiǂgāde ge ǁnâuǀnam
tsî ta ge Elob daoba xu ǁgôa tama ge i.
23 ǁÎb di ǂhanugu hoagu ai ta ge ge ǃgaoǃgâ
tsî ta ge mîmādi âba ge ǁnâuǀnam.
24 Tita ge ǁîb aiǃâ ge ǂhauǃnâ i
tsî ta ge ǂhanuoǃnâsiba xu ge ǃûisen.
25 ǃKhūb ge ti ǂhanu-aisib ǃoa ge mādawa-am te,
ǁîb mûǁae ta a ǀhapio amaga.
26 Sats ǃoa ǂgomǂgomsan, ǃoats ge satsa a ǂgomǂgomsa,
sats ǃoa ǂhauǃnân ǃoats ge a ǃgâi.
27 ǃAnun ǃoats ge a ǃanu
xawe gāxaǃnânats ge ra ǃharaxū.
28 Sats ge ǁgâiǀāb ǃnâ hâna ra huiǂui,
tsîts ge ǀgapiǂâixana ra ǃgamǃgam.
29 Sats, ǃKhūts ge a ti ǃnâ;
sats ge ti ǃkhaenaba ra ǃnâǃnâ.
30 Sa huib ǀkha ta ge toroǂnubide ra ǃoa
tsî ti Elots huib ǀkha ǂnubiǂgoaga ra īǂam.
31 Elob ra dīn ge a dīǀoaǀoasa,
ǃKhūb ra mîn ge a ǂgomǂgomsa.
ǁÎb ǃoa ra ǁhaiǁhân hoanab ge sâusenǃkhaise ība.
32 ǃKhūb ǀguib ge a Elo,
Elob ǀguib ge a ǃgareǀui.
33 Nē Elob ge ra ǀgaiǀgai te;
ǁîb ge ti daoba ra ǃnorasa kai.
34 ǁÎb ge ti ǂaira ǁkhaman ǂaidi xase ra dī;
tsî ǃnâuxa ǃkhaidi ai ra mâǀgai kai te.
35 ǁÎb ge toroǃkhamsa ra ǁkhāǁkhā te,
ǀgaisa khāsa ta nî ǂgaeǃnâ ǁkhāse.
36 Sats ge ǁkhauba te tsî ge huiǂui te,
sa huib ge ge ǀgai kai te.
37 Sats ge hara mâǃkhaiba ge mā te,
tsî ra ge ti ǂaira ge mâǁapo.
38 Ti khākhoena ta ge ǃgôaǃgon tsî ge saoǁae,
tsî ta ge oa tama ge i,
ǁîna ta ge hîkākās kōse.
39 ǁÎna ta ge ge ǂnauǁgui tsîn ge ge khâi ǁoa.
Ti ǂaira ams ain ge ge ǁōǁgoe.
40 Sats ge ǀgaiba ge mā te torob ǃoa,
tsî dansa ti khākhoen ǂama.
41 Sats ge ti khākhoena tita xu ge ǁhâ kai;
ti ǁkhansabena ta ge ge hîkākā.
42 Huib ǃaroman gere kōma,
xawe i ge hui-ao-e ge ǀkhai i;
ǃKhūb ǃoan ge ǂgai,
xaweb ge ǃeream tama ge i.
43 ǁÎna ta ge tsarab kōse ra tsautsau,
ǃgangu ǃnâ ǁgoe ǂgoab khami ta ge ǁîna ra dāǂkhū.
44 Mâǃoaxa ǁaesa xu sâu te
tsîts ge hoa ǁaedi di ǂgaeǂgui-aose ge mâi te;
ǀū ta ge i ǁaes ge ra ǃoaba te.
45 ǃHao ǁaedi ge ti aiǃâ ra ǃhonǁgoa;
tita xan ra ǁnâu, on ge ra ǁnâuǀnam.
46 ǃHao ǁaedi ge ǂkhabuǂâi
tsî ǀkhū rase ǁkhui-omgu âna xu ra ǂoaxa.
47 ǃKhūb ge a ûitsama!
Ab koahe ti ǃgareǀuiba.
Ab kaikaihe ti Elob ǃnoraǃnora te geba.
48 ǁÎb ge ti khākhoen ǂama dansa ra mā te;
ǁîb ge ǁaede ti ǃnaka ra ǃgamǃgam
49 tsî ti khākhoena xu ra huiǂui te.
Sats ge ti khākhoena xu ūbē te
tsî ǂkhabadī-aona xu ra sâu te.
50 ǁNā-amaga ta ge ǁaedi ǃnâ nî koa tsi ǃKhūtse;
satsa ta ge nî koaǁnaeba.
51 ǁÎb ge gao-aoba kai dande ra mā,
tsî toa tama ǀnamma ǁîb ǀnausabeb,
Davidi tsî ǁîb suriba ǀamos kōse.
© Khoekhoegowab Elobmîs © Bible Society in Namibia, 2020.
