1 ǁAe-i khaoǃgâb ge Simsonna ǃhoroǃgaos di ǁaeb ǃnâ ǁîb tarasa ge sari tsî ǁîsa piriro-e ge ūsaoba. Tsîb ge ǁîs îba ǃoa ge mî: “Ti taras tawa ta ge ǃnā-oms âs ǃnâ ra ǂgâ ǂgao.”
Xaweb ge ǁgûba mā-am bi tama ge i. 2 ǁÎb ge Simsonna ǃoa ge mî: “Tita ge ǁîsats hoaragase ǁkhan hâ ti ǂâi tsî ǁîsa sa ǀhōsaba ge mā. Xawe ǁîs di ǃgâsas ǂkhams ge ǁîs ǃgâ-ai a îxa; ǁîsats ge sa taras soas ǃnâ a hō ǁkhā.”
3 Ob ge Simsonna ge mî: “Tita ge nē ǃnāsa Filisteǁîn ǀkha ta nî dī ǂkhawasib ǂama ǀhapixa tide.” 4 Tsîb ge ǃnonakaidisi ǀgiriga sī ge ǃkhō. ǁÎb ge mâ ǀgam ǀgirikha hoakha di ǂarekha ǃgaeǀhao tsî ǃamamǀaeba mâ ǀgamkha hoakha di ǂarekha ǁaegu ge ǃgaemâi. 5 Tsîb ge ǃamamǀaega ǃamam tsî ǀgiriga Filisteǁîn di ǃhoroǃhanagu ǃnâ ge ǁnāxū. ǁNā dīb ǀkhab ge ǀnai ge ǃgaosa i ǃhorob ǀguiba tama i, tsî ǁkhāti noxopa ge ǃhanagu ai mâ i ǃhorob tsî ǀkherahaiǃhanagu tsîna ge khauǃkhū. 6 Filisteǁîn ge dîn geo, ge mîbahe Timnaǁîb di ǀuiǀgôab Simsonni ge nē ǃkhaisa dīsa, ǁîb di ǀuiǁgûb ge Simsonni di tarasa ǁîb di ǀhōsaba a mā ǃkhais ǃaroma. ǁNā-amagan ge Filisteǁîna ǃgû tsî ǁîs tsî ǁîs îb tsîra ge ǂhubiǂui.
7 Ob ge Simsonna ǁîn ǃoa ge mî: “Nē ǀgaus ai du kha ra dī. Mîba du ta ra, sado ta ǀkhao tamas kōse ta ǀû tidesa.” 8 Tsîb ge ǁîna ǁkhōǁkhōsase ǁnāǂam tsî ǂguin âna ge ǃgam. ǁNās khaoǃgâb ge ǃgû tsî Etams tawa ǃhaob ai ǁhoab ǃnâ sī ge ǁan.
Simsonni ge Filisteǁîna ra dan
9 Filisteǁîgu ge Judab ǃnâ hâǃkhaiba hā ǂnaumâi tsî Lehisa ge ǁnāǂam. 10 Judab aogu ge ǁîga “Tare xū-i ǃaroma go sida ra ǁnāǂam?” ti a dî, o gu ge ǁîga ge ǃeream: “Simsonna ǃkhō tsî ge ǁîb ge dī-ū da khami nî dī-ū bise ge ge go hā.” 11 O gu ge ǃnonaǀoadisi aogu Judab diga Etams ǃhaob ǃnâ hâ ǁhoab ǁga ǃgû tsî Simsonna ǃoa ge mî: “Filisteǁîn xa da gaoǂamhe hâ ǃkhaisats kha ge ǀuru? Tare-i ǃaromats kha nēti sida ǀkha go dī?”
Ob ge Simsonna ge ǃeream: “ǁÎn ge tita ǀkha dīs ǁkhās khami ta ge tita tsîna ǁîn ǀkha ge dī.”
12 O gu ge ǁîga ge mî: “Satsa ge ǃgae tsî Filisteǁîna nî māǁnâse ge ge go hā.”
Ob ge Simsonna “ǃGam te go tide ǃkhaisa nūba te re” ti ge mî.
13 O gu ge ǁîga ge mî: “ǂHanu a, ǃgam tsi ge ge tide. Sige ge ǃgae tsis ǀguisa hî tsî Filisteǁîn ai nî māǁnâ tsi.” Tsî gu ge ǁîba ǀasa tsurikha ǀkha ǃgae tsî ǃhaoba xu ge ǂgaeǂguibē.
14 Lehis tawab ge sī, on ge Filisteǁîna ǃau bi rase ǁîb tawa ge ǃkhoesī. Xaweb ge ǃKhūb di gagaba ge ǀgaiǀgai bi tsîb ge ǁîb ǁôakha tsî ǃomkha ge ǃgae-ūhe hâ i tsurikha ge ǂgaeǃgao, ǂhubi ra ǁapa-i khami. 15 Tsîb ge ǀase ǁō hâ dâuki-i di ǃnâniǂkhōba ge hō. Ob ge ǁîba ūkhâi tsî ǀguiǀoadisi Filisteǁîga ǁîb ǀkha ge ǂnauǃan. 16 Tsî ge Simsonna ge mî:
“Dâuki-i di ǃnâniǂkhōb ǀkha ta ge ǂguiga go ǃgam;
dâuki-i di ǃnaniǂkhōb ǀkha ta ge ǀguiǀoadisiga go ǃgam.”
17 ǁNās khaoǃgâb ge ǃnâniǂkhōba ge aoxū. Tsîs ge ǁnā ǃkhaisa Ramat Lehi ti ge ǀonǂgaihe.
18 Simsonni ge kaise ǁgâ tsî ǃKhūb ǃoa ge ǂgai: “Sats ge nē kai dansa go mā te; o ta kha nēsi ǁgâs xa ǁō tsî nē ǀūben xa nî ǃomǁae nî ǁnā?” 19 Ob ge Eloba ǃgam ǃkhaisa ǃhūb ǃnâ Lehis tawa ge ǁkhowa-am tsî-i ge ǁgam-e ǁnāpa xu ge ǂoaxa. Tsîb ge Simsonna ǁî-e ā tsî ǃgâi tsâsiba ge hō. Os ge ǀausa Hakore ti ge ǀonǂgaihe tsî nētsēs kōse Lehis tawa hâ.
20 Simsonni ge Filisteǁîn di ǁaeb ǃnâ Israelǁîna ǀgamdisi kuriga ge ǂgaeǂgui.
© Khoekhoegowab Elobmîs © Bible Society in Namibia, 2020.
