Jodeǁîn ge ǁîn ǂgoms ǃaroma ra ǃgôaǃgonhe
1 Gaxu ǁae-i tsîn ǃkharu tamaseb ge gao-aoba, Ateneǁîn di kaiba Jodeǁînab nî ǁîn di ǂgoms tsî ǁîn di aboxagu ǁnaetigan nî ǁnāxūse ǁgariga ge sî. 2 ǁÎb ge ǁkhāti Tempela, Olimpiaǁîn elob Seub di tempeli tib ge ǂgai ǃkhais ǀkha ge ǃanuoǃnâ kai. Gerisimǃhommi ai ge mâ i Tempeli ge ǂhanusise “Seub, Khoexaǃnâsib Elob di Tempeli” ti khoen ǁnāpa ge ǁan hâ in ge ǂgan khami ge ǀonǂgaihe.
3 ǁGâiǀāb ge taniheǁoasase, kaise ge ǁkhō i. 4 Jodeǁî taman ge Tempeli ǃnâ ǀhao tsî ā tsî ǂguiǃnâgu ǂkhabadīga gere dī. ǁÎgu ge ǁkhāti ǀai-aodi ǀkhas tsîna ǁnāpa gere ǁgoe. ǂKhāhesa xūn tsîn ge Tempeli ǃnâ gere hā-ūhe 5 tsîs ge altarsa ǂhanub ǂkhā hâ ǀurixa ǁguibaxūn xa ge ǀoa hâ i. 6 Khoen ge Sabbattsēsa tsēdi ǁoa, ǁîn aboxagu di kaitsēde ǁâudī ǁoa tamas ka io Jodeǁîn a ti ge ǂgaisen ǁoa i. 7 Mâ ǁkhâb hîas gere gao-aob di ǃnaetsēsa tsēdīheb ain ge ǁguibaǂûǁares ǃoa ǁgarihe. Tsîn ge ǂauxûib di elob, Dionisub ǁâudīb tawan ǁnâun ǀkha kurusa ǂgabu-aina ǁîn di danadi ai ǂnûi tsîn ǁâudīb ǃnâ nî ǁhao ǃkhaisa gere ǂgaoǀkhāhe. 8 Ptolemib ǀapemās ai di ge ǂnamipeb ǃnâ hâ Grike ǃāde ǁkhāti ge mîmāhe, î di ǁnāpa hâ Jodeǁîna ǁguibaden nî ǂû ǃkhaisa ǂgaoǀkhā, 9 î i ǁkhāti Grike ûiǀgauba ga ūǃoa ǂgao tama Jodeǁî-i hoa-i nî ǃgamhe ǃkhais tsîna mîbahe. ǃGomsigu ǁîna ra hāǂam ǃkhais ge ge mûmûsa i. 10 Aiǁgaus ase ra ge ǀgam khoera ǁîra di ôakha ra ge ǃgao kai xui-ao, ǃkhōsis ǃnâ ge ūhe. ǁÎra ge ǁîra ôarokha samra âra ai ǂgāmâihe hâse ǃās ǃnâ gere ǃgûma-ūhe tsî ega ǃās di ǂnubiǂgoaba xu ge aoǁnâhe. 11 ǀNî ǃnā-eb ge Filipuba, Jodeǁîn ge ǀgūse hâ ǁhoa-i ǃnâ, ǂganǃgâsib ǃnân nî Sabbattsēsa ǁnâuǀnamga ǀhao ti ge mîbahe. Filipub ge ǁîna ǁnāǂam tsî hoana ge ǂhubiǂui. ǁÎn ge ǁnātikō ǃgôasiba Sabbattsēsa ge ūba hâ i tsîn ge ǁkhaubasenn nîgas tsîna ǃkhamǃoa tama ge hâ i.
ǃKhūb ge ǁkhara tsî ra ǀkhomxa
12 ǃHuriǃhurisa xūn hîa ge īn xa du ga khomai, o du ǂkhabuǂâi tide ǃkhaisa ta ge ra ǀkhoma du. Nēb ge ǃKhūb di ǀgaub hîkākās ose, khoena ǁkharas dib ti ǂâi re. 13 ǃGâisib di saos ge khoe-e gaxuse ǃâu kais xa, ǁnātimîsi ǁî-i di ǁoren ǃaroma ǁkharasa. 14 ǃKhūb ge sada ǀkha nau ǁaedeb ra sîsenū khami sîsen tama hâ. ǁÎb ge ǁîn nî ǃgamse ǁoreb ǃnâ ǁnās kōse, ǁkharab nîs aiǃâ ǃnūǃnâxase ra ǃâu, 15 xaweb ge sada kaise da nî ǁores aiǃâ ge ǁkhara. 16 ǃKhūb ge hugaǀgui, sada ǁîb di ǂhunuma khoeda ra ǀkhomxa. Tsūǀkhāgu ǀkhab ra ǁkhara da, xaweb ge tātsē ǁnāxū da tama hâ. 17 Nē xūna da ge ǂâihō da nîga ra dībahe. Nēsi da ge ǂhôas ǀkha nî aiǃgû.
Eleasari ge ǂgoms âb ǃaroma ra ǁō
18 Kai tsî ǀgapiǃgôahesa ǂhanub di ǁgauǃnâ-aob, Eleasar ti ge ǀon hâ ib, hîa ge ams âba hāguǁgan-eb nî ǂûga ǁgari ǁkhowa-amheba ge hâ i. 19-20 Xaweb ge ǁîba taotaosa ûib xa ǂhanu-ai ǁōba ge ǁhûi. ǁÎb ge ǁgan-e ǂaraǂui tsî ǁkhoaǂgaoxase tsûtsûheb nî ǃkhaib ǃoa ge ǃgû. ǁÎb ge mâtin khoena nî ǁîn ûigan ga ǂoaǃnâ xawe, ǁkhoaǂgaoxa tsî ǃanuoǃnâ ǂûna ǂûsa ǂkhā ǃkhaisa ge ǁgau. 21-22 Nē khoegu, ǁguibadi di ǃereamsa ge ūhâ igu ge gaxu ǁae-e ge Eleasari di ǀhōsa i tsî ǁnā-amaga ǁîba ge mîba, îb ǀguri hâse ǁîba ǂhanu-aiba ǁgan-e ǂû nîse hā-ū. ǁÎb ge hāguǁgan-e ra ǂû khami ǀgui nî dī tsîb ge ǁnā ǀgaus ai ǃgamhe tide, ti gu ge ge mî.
23 Xaweb ge Eleasara ǃgâi ǀapeǁguib ǁîb di ûib, ǁîb di kairasib tsî ǀhai ǀûn tsî ǁîb di ǃgâi ûiǀgaub ǂkhamsisa xūb ge ūhâ ib ǀkha ǀgopeǀnōhe ǁkhāba ge dī. ǁÎb ge ǁîb di ûiǁaeb hoaragab ǃnâ Elob di ǃanu ǂhanuba ge ǀnam i tsî ge ǃeream: “Nēsi nēpa ǃgam te. 24 Nēti ī ǀhôagaosib ge ti kurigu khami kō kuriga ūhâ khoeba anu tama hâ. ǂGui ǂkham khoen ge tita ge ti ǂgomsa khoesedisi kurixa ta ge, o ǀūxū ti ǂâi hâ. 25 Tita ga nē ǁgan-e ra ǂû khami, gaxu ǁaero-i ǀgui-e ta nî ûiga dīo, os ge ǁnā ǃkhaisa taosib tsî ǃgôaoǃnâsib tsîna ti ǂama hā kai tsî ǂgui ǂkham khoena nî ǂgaeǂhapu. 26 Nēsisa ta ge sago nî dība te xūna xu a ǃnora ǁkhā, xawe ûi ta kas, ǁō ta kas hoasa ta ge Hoaǀgaixa Eloba xu ǃnora tide. 27 ǁKhoaǂgaoxase ta ga ǁō, o i ge ti gaxu ûiba ta anu ǃkhaisa nî ǁgau. 28 ǁKhātis ge nē ǃgâi aiǁgausa, mâ ǀgaub ain ǂkham khoena ǂgaon rase tsî ǃgâiaǂgaoxase ǁō ǁkhā, sada di ǃanu tsî ǃgôahesa ǂhanub ǃaroma ǃkhaisa nî ǁgau.”
Nēnab ge mîtoa, ob ge tsûtsûhe nîse ge ǃgû, 29 tsî ǁîba gere ǃgâise ǃkhōǂhomi khoen ge ǁîb ge ǃkhau hâ khoe-i khami ǃhoa tin ge ǂâi hâ i, xui-ao ǁîb ǃoagu ge dabasen. 30 ǁÎn ǁîba ǁō ǁgab ras kōse ǂnaus ǀkha ǀhabe, hîab ge ǃgae tsî ge mî: “ǃKhūb ge hoa ǃanu ǂansa ūhâ. ǁÎb ge nē tsâgu tsî ǁōba xu ta go ǃnora ǁkhā i ǃkhaisa a ǂan. ǁKhātib ge ǃgâiaǂgaoxase ta ra tsâ, ǃao tama ta hâ xui-ao ǃkhaisa a ǂan.”
31 ǁNātib ge Eleasara ge ǁō. Xawe ǁîb di ǁkhoaǂgaoxa ǁōb ge ǂkhaisa aiǁgaus ase ǂkham khoen ǀguin xas ose, xawe hoaraga ǁaes xa ǂâis ǃnâ ge ūhâhe.
© Khoekhoegowab Elobmîs © Bible Society in Namibia, 2020.
