1 Paulub, Silvanub tsî Timoteub hâga xu.
Tesalonikaǁî kerkheb, Elob sada ǁGûb tsî ǃKhūb Jesub Xristub diba ǃoa:
2 Ab Elob sada ǁGûb tsî ǃKhūb Jesub Xristuba ǀkhommi tsî ǂkhîba mā du.
Elob ge khoena ǂhanu-aise nî ǀgoraǃgâ
3 Ti ǃgâsado, Eloba ge ge sadu ǃaroma nî gangan, anu i a khami, sadu di ǂgoms ra ǃnāǂamsase ǀomkhâi tsîb ǀnammi mâ-i hoa-i nau-e ūba hâba ra ǀarosen xui-ao. 4 Sige nî Elob di kerkhegu ǃnâ koasense, sadu di mâǃkharus tsî ǂgoms sadu di ǃgôaǃgondi tsî ǁgâiǀāgu ǃnâ du ge tanis xa.
5 Nēs ge ǂhanu-ai ǀgoraǃgâs Elob dis di ǁgauǁgau, sadu tsîn nî anuǃgôahe ǃkhaisa, Elob Gaosib sadu tsîn ge tsâbab ǃaroma. 6 Elob ge a ǂhanu-ai tsî ǁnān hîa gere sado ǁgâiǀāna ǃgôaǃgondi ǀkha nî mādawa-am, 7 î da sadu tsî sige hâda hîa ra ǁgâiǀāheda sâba hō. Nēs ge nî ī ǃKhūb Jesub ga ǀhomma xu ǁîb ǀgaisa ǀhomǃgāgu ǀkha ǂhaiǂhaiheo, 8 ǁhabu ra ǀaeb ǃnâ, ǁnān Eloba ǂan taman tsî ǁnān hîa sada ǃKhūb Jesub di ǃGâiǂhôasa ǁnâuǀnam taman ǃoagu. 9 ǁÎn ge ǁkharab ase ǀamo hîkākāsa nî tsâ, ǃKhūb di aisa xu tsî ǁîb ǀgaib di ǂkhaisiba xu, 10 hāb kao, ǁîb di ǃanun ǃnâ-u nî ǂkhaiǂkhaihese tsî ǂgom hân hoan ǃnâb nî buruhese, ǁnā tsēs ai nî ǃgāsa xui-ao, sige di aoǁnâde du ge ǂgom ǃkhaisa. 11 ǁNā-amaga ge ge sado hoaǁae ra ǀgoreba, sada di Elob nî ǂgaisa anuǃgôaba du tsî mâ turab ǃgâisib hoab tsî ǂgoms di sîsenni diba ǀgaib ǃnâ dīǀoaǀoa ǃkhaisa. 12 As sada ǃKhūb Jesub di ǀonsa sadu ǃnâ ǂkhaiǂkhaihe tsî sado ǁîs ǃnâ, ǀkhommi sada Elob tsî ǃKhūb Jesub Xristub dib ǃoa.
© Khoekhoegowab Elobmîs © Bible Society in Namibia, 2020.
