ǁAu ǃgaeǁares Egipteb ǀkha
1 ǃKhūb ge ge mî: “Sa khâikhâisenxa ǀgôado, sadu ge ǀapedi tsî ǀapeǀhaodi tita xu hâ tamade ti ǂâis ǃoagu ge dī, tsî ǁnās ǀkha nē ǁoreb ai nau ǁoreba ge dīǀaro. 2 ǁÎn ge tita ai ǀape-ôa tamase Egipteb ǃoa ge ǃgû, Faraob xan nî ǁkhaubahese tsî Egipteb sommi ǃnakan hâǃkhai-e nî hōsen ge ǁîb ǃoa ge ǁhaiǁhâ. 3 ǁNā-amagas ge Faraob ǁkhaubasa taob ase nî ība du tsî Egipteb sommi ǃnaka du nî hō hâǃkhais ge sadu khoesisa nî ǀhana du. 4 ǁÎb ǂammâisagu ga Soans ǃnâ hâ tsî ǁîb sîsabega Hanes ǃnâ sī, 5 xawen ge hoaraga khoena xū-i tsîna ǃoaǂui tama ǃhaos xa taob ǃnâ nî mâihe; ǁîna hui tamas ka io ǃoaǂui-i tsîna mā tidena, xawe taob tsî taosib ǀguiba nî ǃaromana.”
6 Nēs ge ǂhôas Negeb ǃnâ hâ ǀgurun xa hâsa: “ǃHūb ǃgomsib tsî kai ǂkhôab dib, xams tsî ǃguru ra xammi, ǃgais tsî ǁkhana ra ǀaob hâǃnâb, khoen ra ǁîn ǃkhūsiba dâukigu ǁâgu tsî ǁuib âna ǃnain ǁkharudi ai tanib, khoen hîa ǁîna ǃoaǂui-i tsîna ūhâba tiden ǃoa. 7 Egipteb huib ǁau tsî ǀkhaiǃnâ xui-ao, ǁnā-amaga ta ge ǁîsa ge ǂgai: ‘ǀGaioǃnâ Rahabse’ ti.”
ǁNâuǀnamoǃnâ khoen
8 Nēsi ǃgû, î ǀuiǂgapab ai ǁîn aiǃâ sī xoaǂgā, î ǂkhanis ǃnâ xoamâi, îs ǁîsa ǃgoaxaǁaeb ǃaroma ǀamo ǀhûǀguis ase hâ. 9 ǁÎn a khâikhâisenxa ǀgôa, ǂgomǃgâoǃnâ ǀgôa, tsî ǃKhūb ǁgauǃnâde ra ǁnâuǀnamoǃnâ xui-ao. 10 ǁÎn ge mû-aogu ǃoa ra mî: “Tā mû” tsî kēbo-aogu ǃoa: “Tā sida ǃoa tare-i ge a ǂhanu ti kēbo; ǃgâi xūn xa mîba da, ǀhôagao xūn xa ǃhoaba da. 11 Tā sida daob ǃnâ hâ, ǁgôa sida daoba xu, tā sida ǁkhawa Israeli di ǃAnub xa xū-e mîba.”
12 ǁNā-amagab ge Israeli di ǃAnuba ra mî: “Nē mîsa du go ǂhara tsî ǁgâiǀāb tsî ǀhôagaob tsîkha ǃnâ sadu ǂgomǃgâba ǁgui, tsî ǁîkha ai ǂgomaiǂnûi, 13 amagab ge nē ǁoreba sadu ǁnās ase nî ī, ǀgapi ǂnubiǂgoab, ǂari hâ tsî mâ ǁae-i hoa-i ai mûsǀapirob ǃnâ nî ǃkhommi khami. 14 ǁÎb ge ǂgoaxapa-i khami ǃârodi ǃnâ khôaǃā tsî ǁkhawab a ǀhaoǀhaohe ǁoase ge ǀgaru. ǀGui ǁkharaǃnâ ǃâ-i tsîn ge ge ǀkhai i, ǀgamsa ǂnomsa ūkhâi-ūs tamas ka io xapaba xu ǁgam-e ǃkhā-ūs ǃaroma.”
15 Nētib ge ǃKhūb Elob, Israeli di ǃAnuba mî xui-ao: “Sadu ǃhobasens tsî sâsasib tsîn ǃnâ du nî ǀkhaehe; sadu ǃnōs tsî ǂgomǃgâs tsîn ge nî sadu ǀgai.” Xawe du ge ǁnāsa ǂgao tama hâ! 16 Sadu ge “Hî-î! Sida ge hān ǀkha nî ǃkhoeni” ti ra mî, tsî amase nî ǃkhoeni! Sadu ge “sida ge ǃhae hān ǀkha nî ǃgapibē” ti ra mî; ǁnā-amaga gu ge sadu sauru-aoga sadu xa nî ǃhae! 17 ǀOadisi khoen ge ǀgui khākhoeba ǃaos xa nî ǃkhoeni, koro khākhoen ǃaoǃaos xa du nî ǃkhoe, ǃgau kan ge ǃhom-i ai mâ hai-i, ǃaub di-i khami ǀguri nî xūhe, tamas ka io ǃnâub ai mâ ǃkhau-i di ǁgauǁgau-i khami! 18 ǁNā-amagab ge ǃKhūba sadob nî ǀkhomxase nî ǃâu du; ǁîb ge sadob nî ǀkhomxaga nî khâimâ, ǃKhūb a ǂhanu-aisib Elo xui-ao; ǀkhaehen ge hâ hoan ǁîba ra ǃâuna.
Elob ge ǁaes âba nî ǀkhae
19 Amase, Sions khoedo, Jerusalems ǁanǂgāsabedo, ǃaruǀî du ge ā tide. Sadu āb di ǀōb aib ge nî ǀkhomxaǂgao du; sadob ga ǁnâu, ob ge nî ǃeream du. 20 ǃKhūb ga ǁgâiǀāb pereb tsî ǂōǂōsib ǁgam-i tsîna mā du, xaweb ge sadu ǁGauǃnâ-aoba ǃaruǀî gau tide, tsî di ge sadu mûde ǁîba nî mû. 21 Amǀkhāb ai du ga dabasen tamas ka io ǁareǀkhāb ai, o du ge sadu ǃgâb ai dom-e nî ǁnâu: “Nēb ge daoba; ǁîb ai ǃgû re,” ti nî mî-e. 22 O du ge sadu ǀhaiǀurib ǀkha ǃkhûǀkhāsa ǁgôa-elogu tsî ǃhuniǀurib ǀkha ǃkhûǀkhāsa īgu tsîga nî ǃanuoǃnâ kai. ǁÎga du ge ǃanuoǃnâ xūgu ase nî aoxū tsî ǁîgu ǃoa “Bē sida aiǃâba xu!” ti nî mî. 23 ǃHūb ǃnâ du ga ǂgā ǃkhomnab ge ǃKhūba nî ǀapi-ai kai tsîb ge ǃhoroba ǂguiǀnōb ǃnâ nî ǂûtani. ǁNā tsēs ain ge sadu gomana harase nî ǃûma. 24 Sadu ǃhūba ra ǃgao gomagu tsî dâukigu ge ferkheb tsî ǃkhā-ūxūs ǀkha ǀnupihe hâ ǂûxūna nî ǂû. 25 ǁNā tsēs kai ǃgamǂuis nî hâs tsî ǂgō-omga ǁnās ai gu ge mâ ǀgapi ǃhommi tsî mâ ǀgapi ǃnâub hoaba xu ǁgamǃāroga nî dâu. 26 ǁKhâb ge sores khami nî ǃnâ tsîs ge soresa hû ǃnāde ǃnāsase nî ǃnâ, hû tsēdi ǃnâb khami; ǁnā tsēs aib ge ǃKhūba ǁîb khoen ǀhapide ǃgae-ai tsî ǁînab ge ǂnau ǀhapide nî ǂgauǂgau.
Elob ge Asiriaba nî ǁkhara
27 Mû, ǃKhūb ǀons ge ǁaib xa ra ǂhubise tsî ǁause ra khâimâ ǀanni khami ǃnūseba xu ra hā; ǁîb amǁgaukha ge ǁaib xa ǀoa hâ tsî ǁîb nammi ge ǂhubiǂui ra ǀaeb khami ī. 28 ǁÎb ǀommi ge ǃaos kōse ra sī dâuǃkhū ra ǃāb khami ī. ǁÎb ge ǁaede ǃhoro-i ra ǀhōba xu ǀgorahe khami nî ǀgora tsî khoena ǁîna nî ǂgaeǂhapu tomde nî ǂgā-amǃnâ. 29 ǃNâu ǁâudīb gere dīhe tsuxub ǃnâ du gere ǁnae khami ǁnae. ǃKhūb Israeli ǃGareǀuib di ǃhommi ǁga garuse ra ǂnuniba ǀhuru khoe-i khami du ge nî ǃgâiaǂgao.
30 ǃKhūb ge ǁîb ǀgaisa domma ǁnâuheb nîse nî ǀō kai tsî ǁgôaxa ra napab ǁîb ǁôab dib ge nî mûhe; ǁkhō ǁaixasib tsî hapu ra ǀaes ǁhabub ǀkha, ǁkhō ǀnanub tsî ǀgaisa ǃnareb tsîn ǀkha. 31 Amase, ǃKhūb di ǃgari dommi ge Asiriaǁîna nî ǀkhū kai, ǁîb di haib ǀkhab ga ǁîna ǂnauo. 32 Mâ ǃnabab hîab ra ǃKhūba haib âb ǀkha ǁîna ǁkhara-ūb hoab ge ǃkhomǃkharurudi tsî harpdi ǀōb xa nî saohe; ǁîb ǁâtanin ǀkhab ge ǁîna nî ǁnāǂam. 33 ǂHubiǂui ra ǀaes ǃkhaib ge ǀnai ge aiǂhomihe; gao-aob ǃaromab ge ǁîba ǃgamǃgamhe tsî haraharasase ǂhomitoasa. ǀAen ge ǂgui ǃgôab ǃnâ ǀaereǁguisa. ǃKhūb ǀommi sulfurǃāro-i khami īb ge ǀaeba nî ǃkhāǃamam.
© Khoekhoegowab Elobmîs © Bible Society in Namibia, 2020.
