Levitikus 4 - Khoekhoegowab New Translation 2020 (KKG20)

ǀŪǂamse ra dīhe ǁoren ǁoreǁguibadi

1 ǃKhūb ge Moseba ge mîmā, 2 îb Israelǁîna mîba: Mâ khoe-i hoa-i hîa ga ǀūǂamse ǃKhūb ge mîmā xūn, dīhe tidese ina ǃûǂam-i ge sao ra ǁgaragu ǃnaka nî ûi. 3 ǀNausa ǀgapipristeri ga ǁore tsî ǁnās ǀkha khoena ǀhapiǀhapi, ob ge ūo ǂkham ǁgōba ǁoreǁguibas ase ǃKhūba nî ǁguiba. 4 ǁÎb ge ǁgōba ǃKhūb di Tentommi ǂgâ-ams tawa ǃKhūb aiǃâ ǀkhī-ū, ǃommi âba ǁîb danas ai ǁgui tsî nî ǃgaoxadom. 5 Nē ǀnausa pristeri ge ǀnî ǀaob ǁgōb diba ū tsî ǃKhūb di Tentommi ǃnâ nî ǂgâ-ū. 6 ǁÎb ge ǀkhunub âba ǀaob ǃnâ ǀhari tsî ǀnî ǃâb ǀaob diba hû ǃnāde ǃKhūb ais ai, ǃAnun di ǃAnub aiǃâ mâ ǂgāmâisab ai nî ǀgapi. 7 ǁNās khaoǃgâb ge pristera ǀnî ǀaoba ū tsî ǃgâihamxūn ra ǀanǀanaihe altars, ǃKhūb di Tentommi ǃnâ mâs di ǃnamgu ai nî ǀgapi. ǃGau ra ǀaobab ge ǃKhūb di Tentommi ǂgâ-ams tawa mâ altars, khauǁguibas ra dī-aihes di ǃgaoǃgaob ai nî ǁhōǂui. 8 ǁÎb ge hoaraga kaub ǁgōb dib, ǀhaukaub ǃnāxūn ai hâb, 9 ǃnaidi tsî ǁîdi ai hâ kaub tsî âis di ǂoaǂamsa ǃâ-i tsîna nî ū. 10 Pristeri ge nē kauba ū tsî khauǁguibas di altars ai nî ǂhubi, ǂkhîbagus ǁguibas ǃaroma ra ǃgamhe ǁgōb di kaub ǀkha i ra dīhe khami ǀgui. 11 Xaweb ge ǁîba ǀgoa-i khōb, hoaraga ǁgan-i, danas, ǃūgu tsî hoaraga ǃnāxūn, ǀgûina ǃkhōǂgā hâse ū, 12 tsî ǁîn hoana hâǃkhaib ǃauga, ǃanu ǃkhai-i tsaob ra tsoroxūhe-i ǁga ǂoa-ū, tsî ǁnāpa sī nî ǂhubiǂui.

13 ǀŪǂamses ga hoaraga Israelǁaesa ǁore tsî ǃKhūb ge mîmā xūn dīhe tidese in ǀkha ǀhapiǀhapisen, 14 tsîs ga ǁîn di dīsāsa ǂhaisa, ob ge ǀhûhâsiba ǂkham ǁgōba ǁoreǁguibas ase ǃKhūb di Tentommi ǂgâ-ams aiǃâ nî ǀkhī-ū. 15 ǀHûhâsib ǂgaeǂgui-aogu ge ǃomgu âga ǁîb danas ai ǁgui tsî ǁgōba nî ǃgaoxadom. 16 ǀGapipristeri ge ǀnî ǀaob ǁgōb diba ū tsî ǃKhūb di Tentommi ǃnâ nî ǂgâ-ū. 17 ǁÎb ge ǀkhunub âba ǀaob ǃnâ ǀhari tsî ǀnî ǃâb ǀaob diba hû ǃnāde ǃKhūb ais ai, ǂgāmâisab aiǃâ nî ǀgapi. 18 ǁNās khaoǃgâb ge ǀnî ǀaoba ū tsî ǃgâihamxūn ra ǀanǀanaihe altars ǃKhūb di Tentommi ǃnâ mâs di ǃnamgu ai nî ǀgapi. ǃGau ra ǀaobab ge ǃKhūb di Tentommi ǂgâ-ams tawa mā altars, khauǁguibas ra dī-aihes di ǃgaoǃgaob ai nî ǁhōǂui. 19 ǁÎb ge hoaraga kaub ǁgōb diba ū tsî khauǁguibas di altars ai nî ǂhubi. 20 ǁOreǁguibasab gere dī-ū ǂkham ǁgōb ǀkhab gere dī khamib ge nē ǁgōb tsîna nî dī-ū; tsîb ge ǀgapipristera ǁîna ǂkhîbagus ǁguibasa nî dība, on ge ǁoren âna nî ǀûbahe. 21 Tsî ǂguro gomabab ge ǁîb ǂûb di ǁoren ǃaroma hâǃkhaib ǃauga ǂoa-ū tsî ǂhubi, khamib ge nē gomab tsîna nî dī-ū. Nēs ge ǀhûhâsib di ǁoreǁguibas ase nî ī.

22 ǀŪǂamse-i ga ǂgaeǂgui-ao-e ǁore tsî ǃKhūb ge mîmā xūn dīhe tidese in ǀkha ǀhapiǀhapisen, 23 tsîs ga ǁî-i di dīsāsa ǂhaisa, o-i ge ǁî-e ǁguibas ase ūo piriba nî ǀkhī-ū. 24 ǁÎ-i ge ǃommi â-e pirib danas ai ǁgui tsî altars di ǀapasǀkhāb ai nî ǃgaoxadom, khauǁguibas ǃaroman ra ǀgoan tsî goman tsîna ǃgaoxadomhe ǃkhais tawa. Nēs ge ǁoreǀûbas di ǁguibasa. 25 Pristeri ge ǀkhunub âba pirib di ǀaob ǃnâ ǀhari tsî khauǁguibas ra dī-aihe altars di ǁnâgu ai nî ǂkhau, tsî ǃgau ra ǀaobab ge altars di ǃgaoǃgaob ai nî ǁhōǂui. 26 ǁÎb ge hoaraga kaub pirib diba altars ai, ǂkhîbagus ǁguibas ǀkhas khami nî ǂhubi; ǁnā ǀgaus aib ge pristera ǂgaeǂgui-ao-i ǁoren di ǂkhîbagusa ra dī, tsî-i ge ǁoren â-e nî ǀûbahe.

27 ǀŪǂamse-i ga khoe-e ǁore tsî ǃKhūb ge mîmā xūn dīhe tidese in ǀkha ǀhapiǀhapisen, 28 tsîs ga ǁî-i di dīsāsa ǂhaisa, o-i ge ǁî-e ǁguibas ase ūo pirisa nî ǀkhī-ū. 29 ǁÎ-i ge ǃommi â-e piris danas ai ǁgui tsî altars di ǀapasǀkhāb ai nî ǃgaoxadom, khauǁguibas ǃaroman ra ǀgoan tsî goman tsîna ǃgaoxadomhe ǃkhais tawa. 30 Pristeri ge ǀkhunub âba piris di ǀaob ǃnâ ǀhari tsî khauǁguibas ra dī-aihe altars di ǁnâgu ai nî ǂkhau, tsî ǃgau ra ǀaobab ge altars di ǃgaoǃgaob ai nî ǁhōǂui. 31 ǁGuiba-ao-i ge hoaraga kaub piris diba, ǂkhîbagus ǁguibas ǃaroma ra ǁguibahe ǀgoana xu ra ǃgaoǁnâhe khami ǃgaoǁnâ, tsî altars ai nî ǂhubi, ǃgâi ǁamaba ūhâs ǃKhūba ǃgâibas ase. ǁNā ǀgaus aib ge pristera nē khoe-e ǁoren ǂkhîbagusa ra dība tsî-i ge ǁoren â-e nî ǀûbahe.

32 Khoe-i ga ǁî-i ǁoren ǃaroma gū-e ǀkhī-ū, o-i ge ūo gūsa nî ǁguiba. 33 ǁÎ-i ge ǃommi â-e gūs danas ai ǁgui tsî altars di ǀapasǀkhāb ai nî ǃgaoxadom, khauǁguibas ǃaroman ra ǀgoan tsî goman tsîna ǃgaoxadomhe ǃkhais tawa. 34 Pristeri ge ǀkhunub âba gūs di ǀaob ǃnâ ǀhari tsî khauǁguibas ra dī-aihe altars di ǁnâgu ai nî ǂkhau, tsî ǃgau ra ǀaobab ge altars di ǃgaoǃgaob ai nî ǁhōǂui 35 ǁGuiba-ao-i ge hoaraga kaub gūs diba, ǂkhîbagus ǁguibas ǃaroma ra ǁguibahe ǂkham gūba xu ra ǃgaoǁnâhe khami ǃgaoǁnâ, tsî altars ai, ǃKhūb ra ǁguibahe ǂûǁguibadi hoadi ǀkha nî ǂhubi. ǁNā ǀgaus aib ge pristera nē khoe-e ǂkhîbagus ǁguibas, ǁoreǀûbas disa ra dība, tsî i ge ǁî-e ra ǀûbahe.