Romeǁîn 4 - Khoekhoegowab New Translation 2020 (KKG20)

Abrahammi di aiǁgaus

1 Tare-e da ǁnâi Abrahammi sada aboxab ge khoeb ase hōǃân xa a mî ǁkhā? 2 Abrahammi ga ǁîb sîsengu ǃnâ-u ǂhanu-ai kaihe hâ, ob ge koasenūb nî xū-e ūhâ, xawe Elob aiǃâs ose. 3 Tare-es ra Xoasa mî? “Abrahammi ge Elob ǃnâ ge ǂgom tsî ǁîb di ǂgoms ǃaroma ge ǂhanu-ai kaihe.” 4 Khoe-i ga sîsen, os ge ǁî-i di mataresa mās ǁgui-ais ase mûhe tama hâ, xawes ge a ǁî-i di ǃoaǂui. 5 Xawe ǁnā-i sîsen tama, xawe ǁnāb eloxoresana ra ǂhanu-ai kaib ai ra ǂgomǃgâ-eb ge ǁî-i di ǂgoms ǃaroma ra ǂhanu-ai kai. 6 ǁNā-amagab ge Davida ǁnā khoe-i ǁî-i di sîsenga xus ose, xawe Elob xa ǂhanu-aise ra ǀkhaehe-i di ǃgâiaǂgaob xa nēti ra mî:

7 “ǀKhaehen ge hâ ǁnān ǃûǂamde ǀûbahe tsî ǁoren âna ǃgū-aibahe hâna;

8 ǀKhaeheb ge hâ ǁnā khoeb, Elob xa ǁîb di ǁore-i xare-e ǃgôabahe tamaba.”

9 Nēsisa nē ǀkhaeba ǃgaosa khoen ǃaroma ǀguib hâ tamas ka io ǃgaosa tama khoen tsîna a ǃkhōǂgāsa? Elob ge Abrahamma ǁîb di ǂgoms ǃaroma ǂhanu-ai kai, ti da ra mî xui-ao. 10 Mâǁaes nēsa ge ī? ǃGaohes* aiǃâsa tamas ka io ǃgaohes khaoǃgâ ge isa? ǃGaoheb nîs aiǃâ ge is ge, ǃgaohes khaoǃgâs ose. 11 Ega ǀguib ge ge ǃgaohe tsî nē ǃgaohes ǁîb dis ge Elob ge ǁîba ǂgoms âb ǃaroma ǃgaoheb nîs aiǃâ ǃkhōǃoa ǃkhais di ǁgauǁgaus ase ī. ǁNā-amagab ge Abrahamma hoan Elob ǃnâ ra ǂgom tsî ǂhanu-ai kaihen di ǁgû, nēsin ga ǃgaohe tama i xawe. 12 ǁÎb ge ǁkhāti ǁnān hîa ǃgaohes ǀguisa hî tama i tsî xawe Abrahammi ǃgaohe tamab hâ hîa gere ǂgom khami ra ǂgomn di ǁgû.

Elob mîmâis ge ǂgoms ǃnâ-u ge ǃkhōǃoahe

13 ǂHanub ǃnâ-u tamas ge Abrahammi tamas ka io ǁîb di surib ge ǃhūbaiba ǀumis di mîmâisa māsa, xawe ǂgoms ǃnâ-u Elob ǀkha ǂhanu-ai kaihesa xu. 14 ǀUmi-aosis ga ǂHanuba xu hâ io, os ge ǂgomsa a ǁau tsîs ge mîmâisa harebeoǃnâ. 15 ǂHanub ge Elob ǁaiba ra hā-ū, xawe ǂhanu-i a ǀkhaipa, i ge ǂhanu-i nî ǃûǂamhe ǀgau-e a ǀkhai.

16 ǁNā-amagas ge mîmâisa ǂgoms ai a ǃgaoǃgaosa Elob di ǀkhommi ǃoas nî hâse tsîs ge Abrahammi surib hoaba ǁaposase nî hâba. ǁNān hîa ǂhanub din ǀguin ose, xawe ǁkhāti Abrahammi ge ǂgom hâ i khami ǂgom hâna, ǁîb a sada hoada gagasi ǁgû xui-ao. 17 Xoas ra mî khami: “Tita ge satsa ǂgui ǁaedi di îse ge mâi.” ǁÎb ge Elob, ǁîbab ra ǂgomǃgâb, ǁō hâna ûi-ûi tsî ǀkhai ge ī xūna hâ an ase ra dīb aiǃâ mîmâisa ge ǃkhōǃoa. 18 Abrahammi ge ǃâubasens tsî ǂgoms ǃnâ ǁîb ǃâubasensa mâtib ga mâsiba ǃâubasen-e ūhâ tama khami ī, xawe ge ǁgui. ǁNā-amagab ge ǂgui ǁaede ǁgûse ge ība. Xoas ra mî xui-ao: “Nētib ge sa suriba ǀgamiron khami nî ǂgui.” 19 Abrahammi ǂgoms ge ǁaubexab ge ǀguikaidisi kurixa i tsîb soros âba ǁōs hâse gere ǃgapaǀî, tsîs ge Sarasa ǀgôa-e ge hō ǁoa i, xawe tātsēs tsîna ǂkhabu tama ge i. 20 ǁÎb ge tātsēs tsîna Elob mîmâisa îganǀgē tamas ka io ǂgomoǃnâ tama ge i, xaweb ge ǂgoms di ǀgaiba xu Eloba ǂkhaisiba gere mā. 21 ǁÎb ge ǀoasase a ǂan, Elob mîmâib gena dīsa a ǁkhā ǃkhaisa. 22 ǁNā-amagas ge “Elob ge Abrahamma ǂhanu-ai kaisa.” 23 Tsî di ge mîdi “Elob ge Abrahamma ǂhanu-ai kai” ti ra mîde ǁîb ǃaroma ǀgui ge xoahe tama hâ i, 24 xawe sada hîa nî ǂhanu-ai kaihe da ǃaromas tsîna. Sada hîa ǁnāb, Jesub sada ǃKhūba ǁō hâna xu ge ǂkhaiǂkhaib ǃnâ ra ǂgomda. 25 ǁÎb ge sada dīsādi ǃaroma ge māǁnâhe tsîb ge sada ǂhanu-ai kaihes ǃaroma ge ǂkhaiǂkhaihe.