Josuab ge gao-aob Jabinni tsî ǀapas gao-aogu tsîga ra dan
1 Israelǁîn di dandi xab ge ǁnâu, ob ge Hasors gao-aob Jabinna ǀgūseb ǃnâ hâ gao-aoga ge haisiba, î gu Israelǁîn ǃoagu hā hui bi. ǁÎgu ge Madons gao-aob Jobab, Simrons tsî Aksafs tsîra gao-aokha, 2 ǃnâuxa ǀkharib ǀapas ǃnâ ǁgoeb, Jordanǃgoaǃnāb Galileahurirob ǃkhawagas ǃnâ ǁgoeb, ǂamse ǁgoe ǀkharib tsî Dors ǀgūse ǁgoe huri-amǀkharib tsîgu di gao-aoga. 3 ǁÎb ge ǁkhāti Jordanni aiǂoas tsî huriǂoas ǃnâ hâ Kanaanǁîn, Amorǁîn, Hetǁîn, Perisǁîn tsî Jebusǁîn ǃnâuxa ǀkharib din tsî Hivǁîn Hermonǃhommi amǃgâ Mispaǀkharib ǃnâ ǁan hân tsîna ge haisiba. 4 ǁÎn hoan ge ǁîn di toroǃkhamaogu ǀkha ge hā, kaise kai toroǂnubis, hurib amǃgâb di ǃhūb kōse ǂguis ǀkha. ǁÎgu ge ǁkhāti ǂgui hān tsî torokunidi tsîna ge ūhâ i. 5 Nē gao-aogu hoagu ge toroǂnubidi âga ǀhaoǀhao tsî Meromǃārob tawa hâǃkhaiba ge ǂnaumâi, Israelǁîgu ǃoagu nî ǃkhamse.
6 ǃKhūb ge Josuab ǃoa ge mî: “Tā ǁîga ǃao. ǁAri, nē ǁaeb ǁkhāb ai ta ge ǁîgu hoaga Israela nî māǁnâ tsî gu ge nî ǃgamhe. ǁÎgu di hāna ǃkhaiǃnôa tsî du ge ǁîn di torokunide nî khauǃkhū.” 7 Josuab tsî ǁîb di toroǂnubis ge ǁîga ǃâubasen tama gu hâse Meromǃārob tawa ge ǁnāǂam. 8 ǃKhūb ge Israelǁîna ǁîgu ǂama dansa ge mā. Israelǁîgu ge ǁîga Misrefot-Maims tsî Sidons tsîra ǀapas ǃnâ ǁgoera tsî Mispaǃgoaǃnāb, aiǂoas ǃnâ ǁgoeb kōse ge ǃgôaǃgon. Toroǃkhams ge ǀgui-i khākhoen di-i tsîn ge ǃgau tama is kōse ge aiǃgû. 9 Josuab ge ǁîgu ǀkha ǃKhūb ge mîmā bi khami ge dī: ǁÎb ge ǁîgu di hāna ǃkhaiǃnôa tsî torokunidi âga ge khauǃkhū.
10 ǁNās khaoǃgâb ge Josuaba oa tsî Hasorsa dan tsî ǁîs di gao-aoba ge ǃgam. ǁNā ǁaeb ǃnâs ge Hasorsa ǁnā gaosidi hoadi ǃgâ-ai ge ǀgaisa i. 11 ǁÎgu ge ǁnāpa hoaraga khoena ǀgui-i tsîn ûiǂoa tamase ǃgam tsî ǃāsa ge khauǃkhū.
12 Josuab ge ǁkhāti nē ǃādi tsî ǁîdi gao-aogu tsîna ǃkhō tsî hoaraga khoena ge hîkākā, ǃKhūb di ǃgāb Moseb ge mîmā hâ i khami. 13 Xawen ge Israelǁîna omǂnamisa ǃādi hoade khauǃkhū tama ge i, Hasors Josuab ge khauǃkhūs ǀguis ose. 14 Israelǁîn ge hoaraga ǃgomǀgausa xūn tsî ǂgarib tsîn hoana ǁnā ǃāde xu ge ūbasen, xawe hoaraga khoena, ǀgui-i tsîn ûiǃgau tamase ge ǃgam. 15 ǃKhūb ge ǁîb di ǃgāb Moseba mîmā hâ i khamib ge Moseba Josuaba ge mîmā tsîb ge Josuaba nē mîmāsa ge ǁnâuǀnam. ǁÎb ge ǃKhūb ge Moseba mîmā hâ i xūn hoana ge dī.
Josuab ge hoaraga ǃhūba ra ū
16 Josuab ge hoaraga ǃhūba ge ū, ǃnâuxa ǃhūb tsî ǂamse ǁgoe ǀkharib ǀapas tsî ǃkhawagas, Gosenǀkharib hoab tsî ǂnâsa ǀkharib ǃkhawagas ǃnâ ǁgoeb tsî Jordanǃgoaǃnāb tsîna. 17-18 Nē ǀkharib ge Halakǃhommi Edoms ǀgūse ǃkhawagas ǃnâ ǁgoeba xu Balgads ǀapas ǃnâ Libanonǃgoaǃnāb ǃnâ Hermonǃhommi ǃkhawagas ǃnâ ǁgoes kōse gere sī. Josuab ge ǂomxa ǁaeba nē ǀkharib di gao-aogu ǃoagu gere torodī, tsîb ge ǁîgu hoaga ǃkhō tsî ge ǃgam. 19 Gibeons, ǀnî Hivǁîn ge ǁanǃnâ hâ is ǀguis ge Israelǁîn ǀkha ǂkhîbagusa ge dī. 20 ǃKhūb ge ge dī, în ǁîna Israelǁîna mâǃoa tsî ǁnās ǀkha hoaragase hîkākāhe tsî ǀkhomoǃnâse ǃgamǂuihe, ǃKhūb ge Moseba mîmā hâ i khami.
21 ǁNā ǁaeb ǃnâb ge Josuaba ǃnâuxa ǃhūb ǃnâ Hebrons, Debirs, Anabs tsî Judab tsî Israeli ǃnâuxa ǃhūb ǃnâ ge ǁan hâ i kaikara khoen, Anakǁîna ge hîkākā. Josuab ge ǁîn tsî ǁîn di ǃādi tsîna hoaragase ge hîkākā. 22 Israeli ǃnâ i ge Anakǁî-i xare-e ǃgau tama ge i, xawen ge Gasas, Gats tsî Asdods tsîdi ǃnâ ǀgui ge ǃgau.
23 Josuab ge hoaraga ǃhūba ge ū, ǃKhūb ge Moseba mîmā hâ i khami. Josuab ge ǁîba ǁîn dib nîse Israelǁîna ge mā tsî ǁîba ǃâdi ǃnâ ge ǀgoraǂgā, ǀguisa mâ ǃhaos hoas ǃaroma.
ǁNātis ge ǁaesa toroba xu ge sâ.
© Khoekhoegowab Elobmîs © Bible Society in Namibia, 2020.
