1 ǀNaib ge Bileamma ǃKhūb nî Israelǁaesa ǀkhae ǃkhaisa ge ǂan i, xaweb ge aiǃâb ge dī hâ i khami ǃgaidīsao-e ge ôa tama hâ i. ǁÎb ge ǃgaroǃhūbǀî dabasen 2 tsî Israelǁîn di ǃhaodi ī khami hâǃkhaide ǂnaumâi hâ ǀgausa ge mû. Elob di Gagab ge ǁîb ûiba ge gaoǂam 3 tsîb ge ǁîb di kēbosa sao rase ge gowaǂui:
“Beori ôab, Bileammi di ǂhôas;
ǃgāsase ra mû khoeb di mîdi.
4 ǁNāb Elob di mîde ra ǁnâub;
ǁkhowa-amsa mûdi ǀkha ǃhūb ai ǁgoeǃâ,
Hoaǀgaixa Elob di ība ra mûb di ǂhôasa.
5 Jakob di tentomdi ge a îsa,
6 gaxu raigu palmhaidi digu khami,
tamas ka io ǃāb xōǀkhā ǁgoe ǃhanagu,
ǃKhūb xa ǃhanahe hâ aukorehaidi khami,
tamas ka io ǁgam-i xōǀkhā mā sederhaidi khami.
7 ǁÎdi ge ǂâusa ǀnanuba nî ǃkhōǃoa
tsî ǁîdi ǃkhomna ǃgâise ǀâǂgâ hâ ǃhanagu ǃnâ nî ǂgā.
ǁÎdi gao-aob ge Agagi xa nî kai,
tsîs ge ǁîb di gaosisa ǃnūse tsî harase nî ǂapaǂoa.
8 Elob ge ǁîna Egipteba xu ge ǂgaeǂguiǂui;
ǁîb ge ǁîna ǃgarogomab khami ra ǃkhamba.
ǁÎn ge ǁîn khākhoena hîkākā,
ǁîn di ǂkhōga dāǂkhū
tsî ǁîn di ǁhâigôaga nî khôaǃā.
9 ǁAes ge ǀgaisa xammi khami ī;
ǁommi kao, tari-e ǁîba ǂkhaiǂkhaisa nî dītsâ?
Israelsa ra ǀkhae-i hoa-i ge nî ǀkhaehe,
tsî Israelsa ga ǀâxare-i hoa-i ge nî ǀâxarehe.”
10 Balaki ge ǁaib xa ǁîb ǃomra ami tsî Bileammi ǃoa ge mî: “Tita ge ti khākhoenats nî ǀâxarega ge ǂgai tsi, xawets ge ǁnās ǃās ǃnâ nēsi ǃnona ǃnāde ǁîna go ǀkhae. 11 Xawe nēsi dī, îts ǃhaese nēpa xu ǁaru; tita ge mādawa-am tsi ta nî ti ge mî hâ i, xaweb ge sa ǃKhūba go ǃaroma sa mādawa-amsats hō tide ǃkhaisa.”
12 Ob ge Bileamma ge ǃeream: “Sats ge sî sîsabegu hoaga ta ge ge mîba, 13 nēsits ga sa gao-ommi ǃnâ hâ hoaraga ǀhaiǀurib tamas ka io ǃhuniǀuriba mā te, xawe ta ge ǁnāti ī xū-i ǃaromas tsîna ǃKhūb mîmāsa ǁnâuǀnamoǃnâ tide. Tita ge ǃKhūb go mîba te xūn ǀguina nî mî.”
Bileammi ǀuni kēbodi
14 Bileammi ge Balaki ǃoa ge mî: “Nēsi ta ge ti khoen ǁga ra ǁaru, xawe ta ge ǃgû ta nîs aiǃâ ra ǃkhâikhom tsi, Israelǁîn nî ǃgoaxaǁaeb ǃnâ sa khoena dī-ū ǀgaub xa.” 15 ǁNās khaoǃgâb ge ǁîb di kēbosa sao rase ge gowaǂui:
“Beori ôab, Bileammi di kēbos,
ǁnāb ǃgāsase ra mûb di kēbos di mîdi,
16 ǁnāb Elob di mîde ra ǁnâub di kēbos,
Hoaǀgaixaba xu hâ ǂansa ūhâb disa;
ī-e Hoaǀgaixaba xu mû,
tsî ra ǁnāǁgoeb, mûra âb a ǁkhowa-amsaba:
17 Tita ge ǁîba ra, xawe nēsi tama;
ǃgawa bi ta ge ra, xawe ǀgūse tama.
Jakoba xu i ge ǀgamiro-e nî ǂoaxa,
gao-ao-i ge Israela xu nî khâi.
ǁÎb ge Moab di ǃūde nî ǂkhūǂkhū;
danaǂkhōdi hoaraga khoen Seti din dide.
18 Edommi ge nî danhe,
Seiri, ǁîb khākhoeb ge nî danhe,
xaweb ge Israela danaose nî aiǃgû.
19 Israelǁaesa xub ge ǂgaeǂgui-aoba hā
tsî ûiǃgau hâ khoen ǃās dina nî hîkākā.”
20 ǁNās khaoǃgâb ge Bileamma ǁhapos ǃnâ Amalekǁîna mû tsî sao ra kēbosa ge gowaǂui:
“Hoaraga ǃhaodi xan ge Amalekǁîna ge ǂguro i,
xawen ge ǀams ai ǁîn tsîna ǀamos kōse nî ǁō.”
21 Bileammi ge ǁhapos ǃnâ Kenǁîna mû tsî sao ra kēbosa ge gowaǂui:
“Sadu ǁanǃkhais ge a ǁaposa,
ǃgareǀuib ǃnâ ǂnôa ani-oms khami a ǃnorasa,
22 xawe sadu, Keniǁîdu ge nî hîkākāhe
Asiriab ga ǃkhōsis ǃnâ ū du ǃnubai.”
23 Bileammi ge sao ra kēbosa ge gowaǂui:
“Mâ khoena ǀapasǀkhāb ai ra ǀhaona?
24 Siprusa xu gu ge ǁnāǂgâ-aoga nî hā;
ǁîgu ge Asiriab tsî Eber hâkha nî ǃkhamdan,
xawe gu ge ǁîgu ǂûga nî ǁōǃari.”
25 ǁNās khaoǃgâb ge Bileamma oas ǃaroma ǂhomisen tsî ge ǁaru, tsîb ge Balaka ǁîb daoba ge ǃgû.
© Khoekhoegowab Elobmîs © Bible Society in Namibia, 2020.
