ǂHanuǂhanu-aogu 12 - Khoekhoegowab New Translation 2020 (KKG20)

Jeftab tsî Efraimǁîn

1 Efraimǁîgu ge torob ǃaroma ǂhomisen; ǁîgu ge Jordanǃāba ǃgâu tsî Safons tawa sī tsî Jeftaba ǃoa ge mî: “Tare xū-i ǃaromats kha sige sao tsi ge nîga ǂgai tamase Amonǁîn ǃoagu ge ǃkhamǃgû? Sige ge oms âtsa sats ai nî ǂhubiǁnâ.”

2 Xaweb ge Jeftaba ge ǃeream: “Tita tsî ti khoen tsîda ge kai ǂnoaguba Amonǁîn ǀkha ge ūhâ i. ǂGai ta ge xawe du ge ǁîna xu huiǂui da tama ge i. 3 Tsî hui te du tide ǃkhaisa ta ge mû, o ta ge ti ûiba ǃaorosasib ǃnâ mâi tsî ǁîn ǃoagu ge ǃkhamǃgû, tsîb ge ǃKhūba ǁîn ǂama dansa ge mā te. Tare-i ǃaroma go nēsi tita ǃoagu hā ra ǃkham?” 4 Tsîb ge Jeftaba hoaraga aogu Gileadi diga ǀhaoǀhao, Efraimǁîgu ǃoagu torodī tsî ǁîga ge dan. (Efraimǁîn ge ge mî: “Sa Gileadǁîdu Efraimmi tsî Manaseb ǃnâ hâdu ge Efraimma xu hâ duni-aodo.”) 5 Efraimǁîn nî duni ǃkhaisa ǁkhaes ǃaroma gu ge Gileadǁîga Jordanni di ǃgâuǃkhaidi hoade ge ū. Tsî duni ǂgao ra Efraimǁî-i ga ǃgâu i nîga ǂgansen, o gu ge Gileadǁîga ǁî-e “Satsa Efraimǁîtsa?” ti gere dî. Tsî-i ga “Hî-î” ti a mî, 6 o gu ge “Tsibolet” ti ǁî-e gere mî kai. Xawe i ge ǁî-e “Sibolet” ti gere mî, ǁnā mîsa i ǃgâise a mî ǁoa xui-ao. O gu ge ǁî-e ǃkhō tsî ǁnāpa Jordanni ǃgâu-amdi di ǀguis tawa gere ǃgam. ǁNā ǁaeb ǃnân ge hakadisiǀgamǀaǀoadisi Efraimǁîna ge ǃgamhe.

7 Jeftab ge Israela ǃnani kuriga ge ǂgaeǂgui. ǁNās khaoǃgâb ge ǁō tsî ǁîb ǃādi di ǀguis tawa Gileadi ǃnâ ge ǁkhōhe.

Ibsanni, Elonni tsî Abdonni

8 Jeftab khaoǃgâb ge Ibsanni Betlehems diba Israelǁîna gere ǂgaeǂgui. 9 ǁÎb ǃnonadisi ǀgôagu tsî ǃnonadisi ǀgôadi tsîna ge ūhâ i. Tsîb ge ǁîb ôade ǁîb ǃhaos di tama khoegu ǀkha ge ǃgame kai tsî ǁîb ôaga ǁîb di tama ǃhaosa xu ǃgame gu nîse khoede ge hā-ūba. Ibsanni ge Israelǁîna hû kuriga ge ǂgaeǂgui. 10 ǁNās khaoǃgâb ge ǁō tsî Betlehems tawa ge ǁkhōhe.

11 Ibsanni khaoǃgâb ge Elonni Sebulonna xu hâba Israelǁîna disi kuriga ge ǂgaeǂgui. 12 ǁNās khaoǃgâb ge ǁō tsî Ajalons tawa Sebulonni di ǀkharib ǃnâ ge ǁkhōhe.

13 Elonni khaoǃgâb ge Hileli Piratonsa xu hâb di ôab Abdonna Israelǁîna gere ǂgaeǂgui. 14 ǁÎb ge hakadisi ǀgôagu tsî ǃnonadisi ǁnurisagu tsîna ge ūhâ i; ǁîgu ge hûdisi dâukigu ai gere ǃgapi. Abdonni ge Israelǁîna ǁkhaisa kuriga ge ǂgaeǂgui. 15 ǁÎb ge ǁō tsî Piratons tawa Efraimmi di ǀkharib ǃnâ, Amalekǁîn di ǃnâuxa ǃhūb ǃnâ ge ǁkhōhe.