Hanas di ǀgores
1 Tsîs ge Hanasa ge ǀgore:
“Ti ǂgaob ge ǃKhūb ǃnâ ra dâ;
ǃKhūb ge ra ǀgaiǀgai te.
Ti khākhoena ta ge ra âiǂui;
sa huib ǂama ta ge ra dâ.
2 “Khoe-i xare-i ge ǃKhūb khami ǃanu tama hâ;
ǀgui-i ǁîb khami ī-i xare-i hâ tama.
ǀNîb xareb ge ǃgareǀuise ī tama, sida Elob khami.
3 Tā ǂama rase ǃhoa,
î di ǁîǃgôasens mîde tā sadu amsa xu ǂoaxa.
ǃKhūb ge a ǂans di Elo,
dīgu hoagu ge ǁîb xa ra ǃâitsâhe.
4 Khādi ǀgaisan didi ge khôaǃāhe hâ,
xawe ǁnān ǀgaio ge in ge go ǀgaiǀgaihe.
5 ǁÂsa ge in ge nēsi ra sîsenôa, ǂû ǁkhān nîse,
xawe ǃâsa ge in ge ǀoasa ǂûxūna ūhâ.
ǁNās ǀgôa-e ge ūhâ tama hâ is
ge nēsi hû ǀgôana ūhâ,
xawe ǂgui ǀgôana ge ūhâ is
ge nēsi ǀguri, ǀgôa-i ose ǁnāxūhe hâ.
6 ǃKhūb ge ra ǃgam tsî ǁîb ge ra ûi kai;
ǁîb ra ǁîna ǁŌhân Hâǃkhaib ǃoa ǁgôa kai,
tsî ǁkhawa ǁnāpa xu oahā-ū.
7 ǃKhūb ge ǀnîna ǀgâ kai tsî nauna ra ǃkhū kai;
ǁîb ge ǀnîna ǃgamǃgam tsî nauna ra ǀgapiǀgapi.
8 ǁÎb ra ǀgâsana tsaraba xu ūkhâi;
tsî ǂhâsib ǃnâ hâna ǀapoba xu ǂgaekhâi,
ǃgôahesa khoen ǀkhab ǁîna nî ǂnû kaise;
ǃgôasib ǂnûǃkhaideb ge ǁîna ra mā.
ǃHūbaib di ǃgaoǃgaogu ge a ǃKhūb di,
ǁîb ge ǃhūbaiba ǁîgu ai ge ǁapoǁapo.
9 “ǁÎb ge ǂgomǂgomsan âba ra sâu,
xawe eloxoresan ge ǁōb ǃkhaenas ǃnâ ra ǃnōǃari.
Khoe-i ge ǀgaib â-e xu dan tama hâ.
10 ǃKhūba ra mâǃoan ge nî hîkākāhe;
ǁîn ǃoagub ge ǀhomma xu nî ǃguru.
ǃKhūb ge ǃhūbaib hoaba nî ǀgoraǃgâ,
ǁîb ge gao-aob âba ǀgaiba nî mā;
ǁîb di ǀnausabebab ge ǀgaiba ra mā.”
11 ǁNās khaoǃgâb ge Elkanaba oms âb ǃoa, Ramas ǁga ge oa, xawe ǀgôab Samueli ge pristeri Elib di mûǂams ǃnaka ǃKhūba gere ǃoaba.
Elib ôakha di ǁoreb
12 Elib ôakha ge ǂūǁoa ǀgôa ge i. ǁÎkha ge ǃKhūb ǀkha ge ǁae tama hâ i 13 tsî ǁkhāti pristersi ǂhanub, khoen ǃoa hâb on ǀkha. Khoe-i ga ǁguibasa hā-ū ǃnās hoasab ge pristeri ǃgāba ǁgan-i ra sâihe hîa ǃnonaǁgûxa ferkheba ǃomǁae ūhâse gere hā 14 tsî ǁîba sūs ǃnâ gere ǃkhāǂgā. Tsî ferkheb ga ūǂui-i hoa-eb ge pristera gere ūbasen. ǁNāti i ge Israelǁîn, Silos tawa gere sī ǁguiban hoan ǀkha gere dīhe. 15 Nēs xōǀkhāb ge ǁguibas di kaub nî ǂhubihes aiǃâ pristeri ǃgāba hā tsî ǁnā khoeb, ǁguiba rab ǃoa gere mî: “ǁGan-e mā, îb pristera ambahe. Sâihe hâ ǁgan-eb ge satsa xu ū tide, ora-i ǀgui-i.”
16 Tsî ǁguiba rab ga ǁîb ǃoa mîo: “A khom ǂhanuse dī. Ab kauba aibe ǂhubihe, ots ge ǂgaots ras kōse a ūbasen ǁkhā.” Ob ge ǃgāba gere mî: “Hî-î, nēsi mā te, ǁnā tamas ka io, o ta nî ǀgai-ū.”
17 Nē ǁoreb, ǁnā ǂkham khoekha dib ge ǃKhūb mûǁae kaise ge kai i, ǁîkha ge ǃKhūb di ǁguibasa ǃharaxū amaga.
Samueli ge ǃKhūb di ǃoabas ǃnâ ra kaikhâi
18 Samueli ge ǂkham axab ase ǃKhūba efoda ana hâse gere ǃoaba. 19 ǁÎb îs ge anaǂamsararoba ǂom tsî gere sī-ūba bi, aob âs ǀkha ǃgû tsîs kurikorobe ǁguibasa sī gere ǁguibao. 20 Ob ge Eliba Elkanab tsî ǁîb taras tsîra ǀkhae tsî ge mî: “Ab ǃKhūba nē tarasa xu ǀgôana mā tsi, ǁnā ǀgôab ǃKhūbas ge māb di soas ǃnâ.”
ǁNās khaoǃgâ ra ge ge oa.
21 Tsî ǃKhūb ge Hanasa ge ǀkhomxa tsîs ge noxopa ǃnona ǀgôagu tsî ǀgam ǀgôara tsîna ge hō. Tsî ǀgôab Samueli ge ǃKhūb di ǃoabas ǃnâ ge kaikhâi.
Elib ge ǀgôakha âba ra ǀau
22 Elib ge kaise ge kaira hâ i tsî ôasakha gere Israelǁîn ǃoagu dī xūn tsî ǁkhāti Tentoms ǃKhūb dis di dao-ams tawa ra ǃoaba khoedi ǀkha kha sorosise gere ǂharugu ǃkhaisa gere ǁnâu. 23 Ob ge ǁîkha ǃoa ge mî: “Tare xū-i ǃaroma kho nēti ī xūna ra dī? Hoaraga khoena xu ta ge sakho di tsūdīgu xa ra ǁnâu. 24 ǀÛ kho re ti ôa, ǃgâi tama ǂhôan ge nē ta ra ǁnâuna xuige. 25 Khoe-i ga khoe-i ǃoagu ǁore, ob ge Eloba ǁî-e a ǃgâiǃgâiba ǁkhā, xawe khoe-i ga ǃKhūb ǃoagu ǁoreo, tari-e ǁî-e nî ǃgâiǃgâiba ǁkhā?”
Xawe kha ge ǁîkha ǁgûb di ǀausa ǃgâ ǂgao tama ge i, ǃKhūb ge ǀnai ǁîkhab nî ǃgam ǃkhaisa ǂâibasen hâ i xui-ao.
26 Tsî ǀgôab Samueli ge ǃaruǀî ge kaikhâi tsîb ge ǃKhūb tsî khoen tsîn hoan tawa ǀnamǀnamsa ge i.
Elib omaris di ǀgoraǃgâhes
27 ǀGuitsēb ge Elob di kēbo-aoba Elib tawa hā tsî ǁîb ǃoa ge mî: “Nētib ge ǃKhūba ra mî: ‘Tita ge ǃgāsase sa îgu tawa ge ǂhaiǂhaisen, sa aboxab, Aronni tsî surib âb ganupe Egipteb ǃnâ, Faraob di khobose hâ hîa. 28 Tita ge sa îba Israelǁîn di ǃhaodi hoade xu pristerse ge ǁhûiǂuibasen, ti altars tawab nî ǃoabase, ǃgâihamxūnab nî ǂhubise tsî efodab nî anase tita tawab ga ǀape-ôa ǃnubai. Tsî ta ge ǁîna Israelǁîn gere ǁguiba ǁguibadi hoade xun ǃâ-e nî ūbasensa gere mā-am. 29 Tare xū-i ǃaroma go ti ǂāǁguibadi tsî ti ǂûǁguibadi, ti ommi ǃnâ nî dīhese ta ge mîmāde ra tura? Tsî tarexats sa ôakha tita xa ǃnāsase ra ǃgôa, ǁîkhats hoan xa ǃgâin, ti ǁaes Israels ǁguibadi din ǀkha kaukausensa ra mā-ams ǀkha?’ 30 ǁNā-amagab ge ǃKhūb, Israeli di Eloba ra mî: ‘Tita ge ǀnai ǃgāsase ge mî sa surib tsî sa îgu di surib tsîn ti ǃoabas ǃnâ ǀamos kōse pristerse nî hâ ǃkhaisa.’ Xawe nēsib ge ǃKhūba ra mî: ‘ǁNās ge ī tide. Tita ge tita ra ǃgôana nî ǃgôa tsî tita ra ǃharaxūna nî ǃharaxū. 31 Mû, tsēdi ge nî hā, ǁîdi ai ta ǂkham khoegu hoaga sa ôananôagub tsî sa ǃhaosa xu nî ūbēde tsî i ge kaira ao-i xare-e sa ôananôagub ǃnâ hōhe tide. 32 Sats ge ǂōǂōsib ǃnâts hâpa xu suri rase mâ nî kō, ǁnā ǀkhaegu hoagu nau khoen Israels dina ta nî māga, xawe ǀgui-i sa ôananôagub di-i tsîn ge kaira tide. 33 Tita ge ǀguib sa ôananôagub diba ûib ǃnâ nî ūhâ tsîb ge tita pristerse nî ǃoaba, xawe ǁîb ge nî ǂgī tsî ǃâubasen-i xare-e ūhâ tide. Tsî sa ôananôagub din hoan ge ǁkhō ǁōba nî ǁō. 34 Sa ôakha, Hofnib tsî Pinehasi tsîkha ǀkha nî ī ǃkhais ge ǁgauǁgaus ase nî ība tsi, tita ge mîn hoan nî ama ǃkhaisa; ǁîkha hoakha ge ǁkhā tsēs ǁkhās ai nî ǁō. 35 O ta ge ǂgomǂgomsa pristeri, ti ǁkhoreb tsî ǂgaoǀkhās ǃoa nî sîsenna nî ǁhûiǂuibasen. Tita ge hâhâ ra ôananôaguba nî mā bi tsî gu ge ǀamose ti ǂkhauǀkhāsabeb aiǃâ nî ǃoaba. 36 Sa ôananôaguba xu ga ǃgau-i hoa-i ge ǁîb aiǃâ, mariro-i tsî perero-i ǃaroma hā ǃhonǁgoa tsî nî ǀkhoma: Toxopa pristersi ǃoabadi ǀguis ǃnâ ū te re, î ta perero-e hō ǁkhā, ǂû ta nîse.’ ”
© Khoekhoegowab Elobmîs © Bible Society in Namibia, 2020.
