Elob ge Moseba kai ǀgaiba ra mā
1 Ob ge Moseba ǃKhūba ge ǃeream: “O, Israelǁîn ga ǂgom te tama i tsî ǁîna ta ra mîba xūna ǂgom tama i tsîn ga ‘ǃKhūb ge ǂhai tsi tama hâ’ ti mîo, o tare-e ta nî dī?”
2 Ob ge ǃKhūba Moseba ge dî: “Tare-e sa ǃommi ǃnâts ūhâ-e?”
ǁÎb ge “ǀKharu-i ge” ti ge ǃeream.
3 Tsîb ge ǃKhūba ge mî: “O, ǁî-e ǃhūb ai aoǁgui.” Tsî Moseb ge ǀkharuba aoǁgui, ob ge ǁîba ǀaob ǃnâ ge ǀkharaǀkharasen tsîb ge Moseba ǁîba xu ge ǃae-oa. 4 Ob ge ǃKhūba Moseb ǃoa “ǃOmmi âtsa ǀhōǂui, îts ǂareǀammi ai ǃkhō bi” ti ge mî. Tsî Moseb ge ǃommi âba ǀhōǂui tsî ǀaoba ǂareǀammi ai a ǃkhō, ob ge ǁîba ǁkhawa ǁgâibasenhaib ǃnâ ge ǀkharaǀkharasen. 5 Tsîb ge ǃKhūba “Israelǁîn ge nētits ga dī, o nî ǂgom ǃKhūb ǁîn aboxagu, Abrahammi, Isaki tsî Jakob hâgu gere ǀgoreǀî Elob ge satsa ǂhai ǃkhaisa” ti ge mî.
6 Ob ge ǃKhūba ǁkhawa Moseba “Sa ǃomma sarab âts ǃnâ ǂgā” ti ge mîmā. Moseb ge mîmāheb ge khami dī tsî ǃommi âba ūǂui, ob ge ǃommi âb tsamaros khami ī ǃuri ǂnaodi xa ǀoahe hâ ǃkhais xa ge burugâ. 7 Ob ge ǃKhūba “Sa ǃomma ǁkhawa sarab ǃnâ ǂgā-oa” ti ge mî. Tsîb ge Moseba ǃommi âba ǂgā-oa tsî ǁkhawa ūǂui, ob ge buruxase ǃomma nau ǃân soros din khami ge ǂuru i. 8 Tsîb ge ǃKhūba ge mî: “ǁÎn ga ǂgom tsi tama i, tamas ka ion ga ǂguro buruxa dīs ǁgâibasenhaib dis xa ǃhoadanhe tama i, on ge ǀgamǁîsa nî ǂgom. 9 Nē ǀgam buruxa dīra tsînan ga ǁkhāti ǂgom tama i tsî sats ra mî xūna ǃgâ ǂgao tama i, o Nylǃāba xu ǁgam-e ū, î ǂnâsa ǃhūb ai ǁhōxū, o-i ge ǁgam-e ǀaob ǃnâ nî ǀkharaǀkharasen.”
10 Xaweb ge Moseba “ǃKhūtse, tita ge ǃgâi ǃhoa-ao tama ta. Sats nî ǃhoa-ūtes aiǃâ tsî ǁkhāti nēsis tsîna ta ge ǃgâi ǃhoa-ao tama hâ. Tita ge ǃhoas ǃnâ ǂau tsî tare-e ta nî ǃhoa ǃkhais tsîna a ǀū” ti ge ǃeream.
11 Ob ge ǃKhūba ǁîb ǃoa “Tari-e khoe-e amsa ge mā? Tari-e ǁî-e ǂganaǂgae, ǃgome, mû tamas ka io ra ǂgī kai? Tita ǃKhūta ge, ti ge mî. 12 ǁNā-amaga ǃgû! Tita nî ǃhoahui tsi tsî tare-ets nî ǃhoa ǃkhaisa mîba tsi xuige.”
13 Xaweb ge Moseba “Hî-î, ǃKhūtse, toxopa ǀnî khoe-e sî re” ti ge ǃeream.
14 Nēpab ge ǃKhūba Moseb ǀkha kaise ǁaixa tsî ǁîb ǃoa “Sa ǃgâsab Aronni, Leviǁîb ǁnāpa hâb xa mâtits ra ǂâi? Tita ge ǃgâiseb a ǃhoa ǁkhā ǃkhaisa ǂan. Mû, ǁîb ge nēsi ra hā satsab nî ǀhao-ūse tsî mû tsib ka, ob ge ǁîba kaise nî ǃgâiaǂgao. 15 Tsî sats ge ǁîb ǀkha ǃhoa tsî tare-eb nî mîsa nî mîba bi. Tita ge hoakho ǃhoahui tsî tare-e kho nî ǃhoasa nî mîba. ǁKhāti ta ge nî mîba kho tare-e kho nî dī ǃkhaisa. 16 Aronni ge nî sa mîgowaba-ao tsî sa ǀons ǃnâ khoen ǃoa nî ǃhoa. Sats ge Elob khami ī tsî Aronna nî mîba tare-eb nî ǃhoa ǃkhaisa. 17 Nē ǀkharuba ūsao; ǁîb ǀkhats buruxa dīna nî dī xuige.”
Moseb ge Egipteb ǁga ra oa
18 ǁNās khaoǃgâb ge Moseba ǁîb ǀuiǁgûb Jetrob tawa sī tsî ǁîba ge ǀkhoma: “Toxopa mā-am te re, î ta Egipteb ǁga oa tsî ti ǀaokhoen noxopa ûitsama ǃkhaisa sī mû.” Ob ge Jetroba Moseb ǃoa “O ǁnâi ǂkhîb ǃnâ ǃgû re” ti ge mî.
19 Ob ge ǃKhūba noxopab Moseba Midianǃhūb ǃnâ hâ hîa ǁîb ǃoa “Egipteb ǁga oa re, satsa gere ǃgam ǂgao khoen hoan ge ǁōtoa xuige” ti ge mî. 20 Ob ge Moseba ǁîb taras tsî ôagu tsîna dâukib ai ǃgapi kai tsî ǁîn ǀkha, Elob ge mā bi ǀkharuba ūhâse Egipteb ǁga ge dāǁnâ.
21 Tsîb ge ǃKhūba Moseb ǃoa ǁkhawa “Egipteb ǁgats nēsi ra oa ǃnubai tā buruxa dīn hoan Faraob ais aiǃâts sī nî dīse ta ge ǀgaiba mā tsina ǀūru. Xawe ta ge tita gao-aob, Israelǁîna ǃgûsa mā-am tidese ǂgaob âba nî karokaro. 22 Tsîts ge Faraob ǃoa nî mî: ‘Nētib ge ǃKhūba ra mî: Israelǁîn ge ti ǂguroǃnaesab khami ī.’ 23 ǁNā-amaga ta ge ‘Ti ôaba titab nî ǀgoreǀîse ǃnoraǃnora’ ti ge mîmā tsi, xawets ge ǂgao tama ge i. O ta ge nēsi sa ǂguroǃnaesaba nî ǃgam.”
24 Egipteb ǁgan garu hîan ge sân nîse hâ i ǃkhai-i tawab ge ǃKhūba Moseba ǂhai tsî ǁîba ǃgamsa gere dītsâ. 25-26 Os ge Siporas, ǁîb tarasa ǀā ǀui-e ū tsî ǁîs ôarob di aorekhoesoros di aikhōba ǃgaoǁnâ tsî ǁî-i ǀkha Moseb di ǂaira ge tsâǀkhā. ǃGaos di ǁnaetib ǃoas ge Moseb ǃoa ge mî: “Amab ǃnâts ge satsa ǃgameb ǃnâ a ti ǀaokhoe.” Tsîb ge ǃKhūba Moseb ûiba ge sâu.
27 ǁNā ǁaeb ǃnâb ge ǃKhūba Aronni ǃoa “ǃGaroǃhūb ǁga ǃgû, î Moseba sī ǀhao-ū” ti ge mî. Tsîb ge ǁîba Moseba Elob di ǃhommi ai ǀhao-ū tsî ǁîba ǁoas ǀkha ge tawede. 28 Ob ge Moseba hoaraga xūn ǃKhūb ge mîb nî sīse Egipteb ǁga sî bin tsî hoaraga buruxa dīn hîab nî ǁnāpa dīn tsîna Aronna ge ǂhôa. 29 Tsî Moseb tsî Aronni tsîkha ge ǃgû tsî hoaraga ǂgaeǂgui-aon Israeli dina ge ǀhaoǀhao. 30 Aronni ge hoaraga mîdi ǃKhūb ge Moseb ǃoa ǃhoade ge ǂhôa tsî Moseb ge hoaraga buruxa dīna khoen aiǃâ ge dī. 31 Khoen ge ge ǂgom tsîn ge ǁîna ǃKhūb ge Israelǁîna sari tsî ǁîn di ǁgâiǀāhesa mû, ti ǁnâu, on ge ǃhon tsî ǁîba ge ǀgoreǀî.
© Khoekhoegowab Elobmîs © Bible Society in Namibia, 2020.
