Isobeti ǃgamhes
1 Sauli ôab Isboseti ge Abneri ge Hebrons tawa ǁō ǃkhaisab ge ǁnâu, o kaise ge ǂkhabuǂâi tsî Israelǁîn hoan ge ǃaob xa ge ǃkhōhe. 2 Isboseti ge ǀgam ǁkhâuǁnâ-aokha ge ūhâ i, ǁkhâuǁnâǂnubidi ǂgaeǂgui-ao ge i kha. ǀGuib ge Baana ti ge ǀon hâ i tsî nauba Rekab ti. ǁÎkha ge Rimonni Beerotǁîb, Benjaminni ǃhaos dib ôa ge i. Beerots ge Benjaminni ǃâs ase gere ǃgôahe 3 xawen ge Beerotǁîna Gitaims ǁga ge ǁhâ, tsî nētsēs kōse ǁnāpa ǃhaokhoese hâ.
4 Sauli ôab Jonatanni ge ǃhoraǂai ǀgôab Mefiboset ti ǀon hâba ge ūhâ i. ǁÎb a koro kurixa hîas ge Sauli tsî Jonatanni tsîkha ǁōǂhôas ge Jesreelsa xu hāsa, os ge ǃûi bi gere tarasa ǁîba ūkhâi tsî ge ǃhū, xaweb ge ǃnoesasib âs ǃnâ ǁîba ǁnā tsî hoa ǂaira ge ǃhora.
5 Rimonni ôakha, Rekab tsî Baanab tsîkha ge Isboseti tsēǃgâǁaeb ai ǁgoe hîa oms âb tawa ge sī. 6 ǁÎkha ge ǃhoroba ra ǂgâ-ū khami dīsen tsî oms ǃnâ ǂgâ tsî ǁîba ǃnāb ǃnâ ǃkhā tsî ge ǃkhoeni. 7 ǁÎkha ge oms ǃnâ ǂgâ tsî ǁomǃnâ-oms ǃnâb kharob âb ai ǁomǁgoe hîa ǃgam bi tsî danas âba ǁhāǁnâ tsî ge ūsao. Tsîkha ge hoaraga tsuxuba Jordanni ǃgoaǃnāb ǃnâ-u ǃgû 8 tsî Isboseti danasa Hebrons ǃnâ gao-aob Davidi tawa sī-ū tsî ǁîb ǃoa ge mî: “Nēs ge danas Isboseti, sa khākhoeb Sauli, satsa gere ǃgam ǂgaob ôab disa. Nētsēb ge ǃKhūba gao-aotsa, Sauli tsî ǁîb surib tawa go ǀkhaoba.”
9 Ob ge Davida Rimonni ôakha Rekab tsî Baanab tsîkha ǃoa ge mî: “ǃKhūb, tita ge ǂōǂōsigu hoaga xu huiǂuib a ûitsama ǃkhais ao ta ra mîba kho. 10 ǁNā khoeb tita ge ǃgâi ǂhôa-eb ra hā-ū ti ǂâi tsî Siklags tawa Sauli ǁōba hā ǂhôaba ta ge ǁnāb ge hā-ū ǂhôas di madawas ase ǃkhō tsî ge ǃgam kai. 11 Mâtikōse ta ǁnās ǃgâ-ai ǁnāti eloxoresa khoekha, ǀhapio khoeba go oms âb ǃnâ kharob âb ai ǃgamkha ǀkha nî dī. Tita ge ǁōb âba amase sakho ai ǀkhao tsî sakho ǃhūbaiba xu nî hîkākā.” 12 Ob ge Davida toroǃkhamaogu âba ge mîmā tsî gu ge Rekab tsî Baanab tsîkha ǃgam tsî ǃomgu tsî ǂaidi âkha ǁhāǁnâ tsî ǁîkha sorora Hebrons di ǃkhubis xōǀkhā ge ǂgāmâi. Xawe Isboseti danasa gu ge ū tsî Hebrons tawa Abneri ǀhobas ǃnâ ge ǁkhō.
© Khoekhoegowab Elobmîs © Bible Society in Namibia, 2020.
