Esrab ǀkha ge oaǀkhī khoen
1 Nē ra saogu ge ǃhaoǃnādi danakhoegu, Babiloniab di ǃkhōsisa xu ge Esrab ǀkha Jerusalems ǁga a oaǀkhīga, Artaxerxesi ǂgaeǂguis ǁaeb ǃnâ:
2-14 Pinehasi ǃhaoǃnāsa xu Gersommi,
Itamari ǃhaoǃnāsa xu Danieli,
Davidi ǃhaoǃnāsa xu Sekanjab ôab Hatusi,
Parosi ǃhaoǃnāsa xu Saxariab, ǀguikaidisikorodisi aogu ǀkha (ǁîgu ge ǁgûxan âgu ǃhaoǃnās ǃgôakhâib ǃnâ ge xoamâisa i),
Pahat-Moab ǃhaoǃnāsa xu Saxariab ôab Eljoenaib, ǀgamkaidisi aogu ǀkha,
Satub ǃhaoǃnāsa xu Jahasieli ôab Sekanjab, ǃnonakaidisi aogu ǀkha,
Adinni ǃhaoǃnāsa xu Jonatanni ôab Ebedi, korodisi aogu ǀkha,
Elammi ǃhaoǃnāsa xu Ataliab ôab Jesajab, hûdisi aogu ǀkha,
Sefatjab ǃhaoǃnāsa xu Mixaeli ôab Sebadjab, ǁkhaisadisi aogu ǀkha,
Joab ǃhaoǃnāsa xu Jehieli ôab Obadjab, ǀgamkaidisi tsî disiǁkhaisaǀa aogu ǀkha,
Banib ǃhaoǃnāsa xu Josifjab ôab Selomiti, ǀguikaidisiǃnanidisi aogu ǀkha,
Bebaib ǃhaoǃnāsa xu Bebaib ôab Saxariab, ǀgamdisiǁkhaisaǀa aogu ǀkha,
Asgadi ǃhaoǃnāsa xu Hakatanni ôab Johananni, ǀguikaidisi tsî disi aogu ǀkha,
Adonikammi ǃhaoǃnāsa xu Elifeleti, Jeieli tsî Semajab hâga, ǃnanidisi aogu ǀkha,
Bigvaib ǃhaoǃnāsa xu Utaib tsî Sakuri tsîkha, hûdisi aogu ǀkha.
Esrab ge Leviǁîga Tempeli ǃaroma ra hō
15 Tita ge ǁîn hoana Ahavas ǁga ra dâu ǃāb tawa ge ǀhaoǀhao, tsî da ge ǁnāpa ǃnona tsēde tentomdi ǃnâ ge hâ. ǁNāpa ta ge pristergu ǁîn ǃnâ hâ, xawe i Leviǁî-i xare-e a ǀkhai ǃkhaisa ge ǂanǂui. 16 O ta ge khoese ǂgaeǂgui-aogu Elieseri, Arieli, Semajab, Elnatanni, Jarib, Elnatanni, Natanni, Saxariab tsî Mesulammi, tsî ǀgam ǁnâuǃāxa aokha Jojarib tsî Elnatanni tsîga ge ǂgai kai. 17 Tsî ta ge ǁîga Kasifjas di ǂgaeǂgui-aob Idob ǁga ge sî, ǁîb tsî ǁîb sîsenǁare-aogu, Tempelǃgāga gu nî ǂganse, î gu Elob Tempeli ǃnâ nî ǃoaba khoega sîba da. 18 O gu ge Elob di ǀkhomxaǂgaosiba xu ǁnâuǃāxa aob Serebjab, Malib ǃhaoǃnāsa xu hâ Leviǁîb tsî disiǁkhaisaǀa ǀgôagu tsî ǃgâsagu, ǁîb digu tsîga ge sîba da. 19 ǁÎgu ge ǁkhāti Hasabjab tsî Jesajab tsîkha, Merarib ǃhaoǃnās dikha tsîna, ǀgamdisi khoegu ǁîkha surib digu ǀkha ge sî. 20 ǁÎgu xōǀkhā gu ge ǀgamkaidisi tsî ǀgamdisi Tempelǃgāga ge hâ i, ǁîgu aboxagu ge Leviǁîga gu nî huise, gao-aob Davidi tsî ǁîb ǂamkhoegu xa ǁgaumâihe hâ iga. ǁÎgu hoagu di ǀondi ge ge xoamâisa i.
Esrab ge khoena ǂûtama hâs tsî ǀgores ǃnâ ra ǂgaeǂgui
21 Ahavaǃāb tawa ta ge ge mîmā, sada hoada ǂûtama hâ tsî sada Elob aiǃâ ǃgamǃgamsen tsî ǁîba nî ǂgansa, îb ǃgûdaob âda ai ǂgaeǂgui da tsî sada, sada ôan tsî sada xūn hoana sâu. 22 Tita ge gao-aob ai toroǃkhamaogu tsî hāǃgapi-aogu tsîga, daob ai gu khākhoen ǃoagu nî ǁkhauba dase ǂgansa gere tao. Tita ge ǁîba, sada Elob ǁîb ai ra ǂgomaiǂnûin hoana ra ǀkhae, xaweb ǁîba ra ǁnāxūn hoana ra ǁkhara ǃkhaisa mîba hâ i xui-ao. 23 ǁNāti da ge ǂûtama* hâ tsî Eloba ge ǂgan, îb sâu da, tsîb ge ǁîba ge ǁnâu-am da.
Tempeli di ǀkhaexūn
24 ǂGaeǂguis ǃnâ mâ pristerga xu ta ge Serebjab, Hasabjab tsî ǀnî disigu tsîga ge ǁhûiǂui. 25 ǁNās khaoǃgâ ta ge gao-aob, ǁîb ǀapemā-aogu tsî ǂamkhoegu tsî Israelǁîn tsîn ge Elob di Tempeli ǃaroma ǁguiba ǀhaiǀurib, ǃhuniǀurib tsî xapan tsîn di ǃgomma ǀnō tsî ǁîna pristerga ge mā. 26-27 Sao ra xūna ta ge ge mā:
ǀHaiǀuriba: ǀGamdisiǀgamǀa tongu;
ǀguikaidisi ǀhaiǀuri xapana: Hûdisi kiloxramgu;
ǃhuniǀuriba: ǃNona tsî ǃkhare tongu;
ǀgamdisi ǃhuniǀuri xapana: ǁKhaisa tsî ǃkhare kiloxramgu;
ǀgam ǃūmû brons xapara, ǃhuniǀuri xapan ǁkhān khami ama-aira.
28 Tsî ta ge ǁîga ǃoa ge mî: “Sago ge ǃKhūb, sadu aboxagu Eloba khaibahe hâ; ǁnās ǁkhās xasen ge nē xapan, ǀhaiǀurib tsî ǃhuniǀurib tsîn hîa māsenxase ra ǁguibahena, ǁîba khaibahe hâ. 29 ǁÎna Tempeli tawa du nî sīs kōse ǃgâise ǃûiǃgâ, î ǁîn di ǃgomma pristeri di ǃnā-oms ǃnâ ǀnō tsî pristergu tsî Leviǁîgu tsî Jerusalems ǃnâ hâ Israelǁîn tsîn di ǂgaeǂgui-aoga māǁnâ.” 30 O gu ge pristergu tsî Leviǁîgu tsîga ǀhaiǀurib, ǃhuniǀurib tsî xapan tsîna ge ū, ǁîna gu Jerusalems ǃnâ mâ Tempela ǃoa nî ǃgû-ūse.
Jerusalems ǃoa ǁarus
31 Disiǀgamǀaǁî tsēs ǂguro ǁkhâb dis ai da ge Ahavaǃāba xu Jerusalems ǁga ge dāǁnâ. Sida Elob ge sida ǀkha ge hâ i tsî sida ǃgûdaob ai khākhoen ǃoagu ǁkhauba tsî sida ge ǁgoeǃâu hâ ina xu ge sâuǂui da. 32 Jerusalems ǃnâ da ge sī, o da ge ǃnona tsēde ge sâ. 33 Tsî da ge hakaǁî tsēs ai Tempeli tawa sī tsî ǀhaiǀurib, ǃhuniǀurib tsî xapan tsîn di ǃgomma ǀnō tsî ǁîna Uriab ôab, prister Meremota ge mā. ǁÎb ǀkha gu ge Pinehasi ôab Eleasari tsî ǀgam Leviǁîkha, Jesuab ôab Josabadi tsî Binuib ôab Noadjab tsîga ge hâ i. 34 Mâ xū-i hoa-i ge ǃgôahe, ǃgommi â-e ǀnōhe tsî ǁnā ǁaeb ǁkhāb ai gere xoamâihe.
35 ǃKhōsisa xu ge oaǀkhī khoen ge Israeli di Eloba khauǁguibade ge ǁguiba. ǁÎn ge disiǀgamǀa ǁgōga Israeli hoab ǃaroma ge ǁguiba; ǁnās xōǀkhā khoesedisiǃnaniǀa baigu tsî hûdisihûǀa ǁkhaogu tsî ǁoreǁguibas ase disiǀgamǀa pirigu tsîga. Nē xūn hoan ge ǃKhūba khauǁguibase ge ǁguibahe. 36 ǁNās khaoǃgâ gu ge gao-aob di ǁguiǂamdi hâǃnâ sîǂkhanisa, Eufrati huriǂoasǀkhāb di gowoniagu tsî ǂamkhoegu tsîgu ai ge ǁkhaeǁnâ, tsî gu ge ǁîga ǁnā ǁaeba xu, ǁaes tsî Tempelǃoabas tsîna gere ǂkhâǃnâ.
© Khoekhoegowab Elobmîs © Bible Society in Namibia, 2020.
