Elob di ǂkhaisib, kurus ǃnâ
ǁNaeǃnans ǂgaeǂgui-aob ǃoa
Davidi Psalms
1 ǀHomgu ge Elob di ǂkhaisib
tsî sîsengu ǁîb ǃomkha digu tsîna ra ǂanǂan.
2 Tsēsa xu tsēs kōse gowaǂui
tsîb tsuxuba xu tsuxub kōse ǁîb di ǂansa ra ǁgauǂui.
3 ǁNāpa i ge ǃhoa-i tamas ka io mî-i,
tamas ka io ǀō-i xare-e ǁnâuhe tama hâ.
4 Xawes tsînas ge ǁîn di ǂhôasa hoaraga ǃhūbaibǀî ra ǂoa
tsî ǃhūbaib di ǀkhâuǀamdi kōse ra ǁnâuhe.
Tsîb ge Eloba soresa ǀhomgu ǃnâ tentomsa ge mâiba.
5 Tsîs ge ǁîsa ǁgoaga ǃgame-aob,
ǁîb ǃnā-omsa xu ra ǂoaxab,
ǃkhoe-aob ǃkhoes ǃoa ǂhomisen hâb khami ra ǂoaxa.
6 ǀGui ǀams ǀhommi disa xus
nau ǀams kōse ra sī
tsî i xū-i xare-e ǀgammi âsa xu a sâusen ǁoa.
ǃKhūb di ǂhanub
7 ǃKhūb di ǂhanub ge a dīǀoaǀoasa
tsî ǀomsa ra khoakhoa.
ǃKhūb di mîmādi ge a ǂgomǂgomsa
tsî ǁau khoe-i tsîna ra gā-ai kai.
8 ǃKhūb di ǂnûiǂgādi ge a ǂhanu
tsî ǂgaoba ra dâ kai.
ǃKhūb di mîmādi ge a ǃgāsa
tsî mûde ra ǃgā kai.
9 ǃKhūba ǃaoǃgâs ge a ǃanu
tsî ǀamosib kōse ra hâ.
ǃKhūb di ǀgoraǃgâdi ge a ǂhanu-ai
tsî hoaǁae hoatsama a ǂhanu.
10 ǁÎdi ge ǃūmû ǃhuniǀurib ǃgâ-ai a ǃgomǀgausa;
ǁîdi ge ǃūmû dani-i ǃgâ-ai a ǂkhon.
11 ǁKhāti di ge sa ǃgāta ona ra ǁkhāǁkhā
tsî ta ge ǁîde ǁnâuǀnams di mādawa-amsa ra hō.
12 Tari-e tsūdīn â-e aitsama nî ǂan?
ǃKhūtse ore te re nē sâusa tsūdīna xu.
13 ǂAnapega ǁoren tsîna xu sâu te re,
în ǁîna tā tita gaoǂam.
O ta ge dīǀoaǀoasa
tsî ǁoreb di ǂkhababa xu nî ǃnorasa.
14 A di ūǃoasa re ti mîdi tsî ǂâide sats tawa
Ti ǃKhū, ti ǁhaiǁhâǃkhai tsî ore-aotse!
© Khoekhoegowab Elobmîs © Bible Society in Namibia, 2020.
