Moseb ge Israelǁî ǁaede ra ǀkhae
1 Moseb, Elob di aob ge ǁōb nîs aiǃâ sao ra mîdi ǀkha Israelǁîna ge ǀkhae:
2 ǃKhūb ge Sinaiǃhomma xu,
tsî ǁhaisores khami Edomma xu ǃnâ
tsî Paranǃhomma xu ǁîb khoena ra ǃnâǃnâǂam.
Disiǀoadisi ǀhomǃgān ge ǁîb ǀkha ge hâ i
tsîs ge ǀaesa ǁîb amǀkhāb ǃomma xu gere ǁhabu.
3 ǃKhūb ge ǁîb ǁaesa a ǀnam,
ǁîb di ǃanun hoan ge ǃommi âb ǃnâ hâ.
ǁÎn ge sa ǂaidi tawa ǂnû tsî
sa mîsa ǁnâuǀnamxasib ǀkha ra ǃgâ.
4 Tita ge Elob di ǂhanuba ge mā du,
ǁuiba sada ǃhaos di ǀumis ase.
5 ǃKhūb ge ge Israelǁîn di gao-ao kai,
Israelǁîn ǁaedi tsî ǂgaeǂgui-aogu tsîgu ga ǀhao-o.
6 Moseb ge Rubenni surib xa ge mî:
“Ab Rubenna ûi tsî tā ǁō,
ǁîb di khoen ga ǀoro xawe.”
7 Judab surib xab ge ge mî:
“ǃKhūtse, Judab di ādomma ǁnâu re;
î ǁîna ǁkhawa nau ǁaedi ǀkha ǀhaoǀhao re.
ǁÎn di ǃomga ǀgaiǀgai,
î khākhoen ân ǃoagu ǁîna hui.”
8 Levib surib xab ge Moseba ge mî:
“Sadu Tumimn tsî Urimn tsîn ge sadu ǃgāba ge ǂgomǃgâhe,
ǁîn di ǁkhāsibats ge Masab tawa ge ǁgoaǂui;
tsî Meribas ǁgammi tawa ǁîn di amasiba ge ǃâi.
9 ǁÎn ge ǁîn di în, ǃgâsan tamas ka io ǀgôan xa
ǃnāsa ǃgôasiba satsa ge mā.
ǁÎn ge hoaǁae sa mîmāde ǁnâuǀnam,
tsî sa ǃgaeǀhaosa ǂgomǂgomsase gere ǃkhōǀgaipe.
10 Leviǁîn ge sa ǁaesa ǂhanuba nî ǁkhāǁkhā;
ǁîn ge ǃgâihamǁguibas tsî khauǁguibas tsîra sa altars ai nî ǁguiba.
11 ǃKhūtse ǁîn di aiǃgûsa ǀkhae re,
î ǁîn ǃomgu di sîsenna ūǃoa re;
ǁîn khākhoen di ǀgaiba khôa,
în tātsēs tsîna tā ǁkhawa khâimâ.”
12 Benjaminni di surib xab ge ge mî:
“ǁÎn ge ǃKhūb xa ǀnamhe tsî ra ǁkhaubahe;
ǁîb ge hoaǁae ǁîna ra ǃûi,
tsî ǁîn ǁaegu ǁan hâ.”
13 Josefi surib xab ge ge mî:
“Ab ǃKhūba ǁîn di ǃhūba ǀhomsi ǀnanub
tsî ǃhūb ai hâ ǀaub
tsî ǃhūb ǃnakaba xū ǁgam-i tsîn ǀkha ǀkhae.
14 Ab ǁîn di ǃhūba soresa xu ra ǁan ǂûn
tsî kurikamab hoaba ra ǁan ǂoaǂamsa ǂûn ǀkha ǀkhae.
15 Ab ǁîn di ǃhūba ǀhai ǃhomgu
tsî kaira ǃnâugu di ǂoaǂamsa ǂûn tsîn ǀkha ǃgū-aihe.
16 Ab sadu ǃhūba ǂoaǂamsa ǃgâi xūn hoan ǀkha ǀkhaehe,
ǁnā ǃKhūb ǂhubi gere ǁkhūhaisa xu ge ǂhaib ǃgôasib ǀkha.
Ab nē ǀkhaeb hoaba Josefi surib ai ǁhōǂuihe,
ǁîb ǃgâsagu ǂamab ge ǂgaeǂgui-aose mâǂoa hâ i xui-ao.
17 Josefi ge ǂguroǃnaesab ǁgōb khami a ǁkhā,
tsî ǃgarogomab khami a ǀgaisa.
ǁÎb ǁnâkha ge Manaseb di ǀoadisiga
tsî nauba Efraimmi di disiǀoadisiga.
ǁÎkha ǀkhab ge ǃhaodi hoade
ǃhūbaib di ǀkhâuǀamdi hoadi kōse nî saurusī.”
18 Sebulonni tsî Isaskar hâkha surikha xab ge ge mî:
“Ab Sebulonna hurib aib ga ǂoa ǁaeb ai ǃgâiǃgâxa,
ab Isaskari ǃkhūsiba oms âb tawa aiǃgû.
19 ǁÎkha ge nau ǃhaode ǃhommi ǁga ǁkhauǂui
tsî mîǁguisa ǁguibade nî ǁguiba.
ǁÎkha ge hurib di ǁuib
tsî ǃhūb di ǃkhūsib tsîkha nî ǀama.”
20 Gadi surib xab ge ge mî:
“Ab ǃKhūba karehe ǁîn ǃhūba ge khoraǂuiba.
ǁÎb ge xammi khami ǃâuǁgoe,
ǁôab tamas ka io danakhōbab nî ǀkhauǁnâse.
21 ǁÎn ge ǂoaǂamsa ǃhūǃâsa ge ūbasen;
ǂgaeǂgui-ao-i di ǃâsan ge ge māhe.
Israelǁîn ǂgaeǂgui-aogu ge ǀhao,
o gu ge ǃKhūb mîmās tsî ǂhanub tsîna ge ǁnâuǀnam.”
22 Danni surib xab ge ge mî:
“Danni surib ge ǂkham xamrob khami ī;
tsî ǁîn khākhoena Basanna xu ra ǁnāǂam.”
23 Naftalib surib xab ge ge mî:
“Naftalib surib ge ǃkhōǂuihe tsî ǃKhūb xa ǃkhū hâse ge ǀkhaehe;
tsîn ge ǁîna Galileahuriroba xū ǃkhawagasǀkhāb kōse ǁgoe ǃhūba ūhâ.”
24 Aseri surib xab ge ge mî:
“Aseri surib ge nau ǁaedi ǂamai ǀkhaehe hâ.
Ab ǁîb ǃgâsagu ǂamai ǃkhōǂuihe,
tsî ab ǁîb ǃhūba ǃnāǂamsase ǂûtanixa ǀkhera-olihaide ūhâ.
25 A di ǁîb ǃāde ǀuridaodi ǀkha ǂganamhe,
an ǁîna ǃnorasasib ǃnâ ûi.”
26 Israelǁîdo, Elob khami ī khoe-i ge a ǀkhai,
ǁîb ge ǀhommi ǃnâ-u sadu huib ǃaroma,
ǁîb di ǁkhāsib ǃnâ ǃâudi ai ra ǃgapi.
27 ǀAmo Elob ge a sadu di ǁhaiǁhâǃkhai;
ǁîb ǁôakha ge hoaǁae ǃnamiǂgā du hâ.
Khākhoenab ge sadu aiǃâba xu ra saurubē,
tsî “ǁÎna hîkākā!” ti ra mîmā du.
28 ǁNā-amagab ge Israela ǂkhîb ǃnâ ǁan hâ,
ǃhorob tsî ǀasa ǂauxûi-i ǃhūb ǃnâb ge Jakob suriba a ǃnorasa,
ǀhommi di ǀnanub ǃhūba ǀaub ǀkha ra ǀâǀâpa.
29 Israelǁîdo, sadu ge a ǃgâiǃgâxa!
Sadu khami ī-i ge a ǀkhai,
ǃKhūb xa orehe hâ khoedo.
ǁÎb ge sadu di ǁkhaukhō tsî a sadu di gôaba,
sadob nî ǁkhauba tsî danaose dīse.
Sadu khākhoen ga ǀkhoma rase sadu tawa hā,
xawe du ge ǁîna nî dāǃgâ.
© Khoekhoegowab Elobmîs © Bible Society in Namibia, 2020.
