Jehub ge ra Israeli di gao-ao ra ǀnauǂgāhe
1 Kēbo-aob Elisab ge ǂkham kēbo-aogu di ǀguiba ǂgai tsî ǁîb ǃoa ge mî: “ǂHomisen, îts nē xaparob oli-e ū tsî Ramots, Gilead ǃnâ ǂnôas ǁga ǃgû. 2 ǁNāpats ga sī, o Josafati ôab, Nimsib ǁnurib Jehuba ôa, î ǁîba horesagu âba xu ū tsî ǀguri ǃnā-oms ǃnâ ǂgâ-ū 3 tsî oli-e ǁîb danas ai ǂnâǂui tsî ǁîb ǃoa mî: ‘ǃKhūb ge Israeli ǂamab gao-aose ra ǀnau tsi ti ra mî.’ ǁNās khaoǃgâ ǃhaese ǁnāpa xu ūbesen.”
4 Ob ge ǂkham kēbo-aoba Ramots ǁga ge ǃgû. 5 ǁNāpab ge sī, o gu ge toroǃnans ǃkhōdana-aoga ǂnûsa ge ūhâ i. Ob ge ǁîba “Haisi-am-e ta ge ūba tsi hâ, ǃgôahesatse” ti ge mî.
Jehub ge “Tarib sige dib ǀkhats ra ǃhoa” ti ge dî bi.
Ob ge ǁîba “Sats ǀkha, ǃgôahesatse” ti ge ǃeream. 6 ǁÎkha ge ǃnā-oms ǃnâ a ǂgâ, ob ge kēbo-aoba oli-e Jehub danas ai ǂnâǂui tsî ǁîb ǃoa ge mî: “Nētib ge ǃKhūb, Israeli di Eloba ra mî: ‘Tita ge ti ǁaes Israels ǂama gao-aose ra ǀnau tsi. 7 Sats ge Axab ôab, sa ǀhonkhoeb gao-aoba nî ǃgam. ǁNāti ta ge Isabelsa nî ǁkhara, ti kēbo-aogu tsî nau ǃgāgu tigu hîas ge ǃgamgu ǃaroma. 8 Axab surib hoaragab ge nî ǁō. Tita ge mâ aoreb ǁîb surib dib hoaba, ǀguib tsîna ǁnāxūǂui tamase nî hîkākā. 9 Tita ge ǁîb di surib ǀkha, Israeli gao-aob Jerobeammi tsî Israeli gao-aob Baasab tsîkha di surib ǀkha ta ge dī khami nî dī. 10 Isabels ge ǁkhōhe tidesa; ǁîs di soros ge arin xa Jesreels ǀkharib ǃnâ nî ōhe.’ ” Nēnab ge mîtoa, ob ge ǂkham kēbo-aoba omsa xu ǂoa tsî ge ǃhū. 11 Jehub ge ǁkhawa nau ǂamkhoegu tawa a ǂoaxa, o gu ge ǁîga ge dî bi: “Hoa xūna a ǂhanu? Tare-eb nē ǃkhausaba sats tawa ôaǀkhī?”
Ob ge Jehuba ge ǃeream: “Sago ge nē khoeb tsî ǁîb di ǃhoa-ain tsîna a ǂan.”
12 O gu ge ǁîga ge mî: “Gāts ra; mîba gere tare-eb go mîsa.”
Ob ge ge mî: “Nētib ge ǃKhūba ra mî tib ge ǁîba tita ǃoa go mî: ‘Tita ge Israeli ǂama gao-aose ra ǀnau tsi.’ ”
13 Ob ge ǁnātimîsi mâb hoaba saran âba ū tsî dā-aiǃharodi ai Jehuba ǀgâiǁguiba tsî xâiǁnâsa xâi tsî ge ǂgaiǂui: “Jehub ge a gao-ao.”
Israeli gao-aob Jorammi di ǃgamhes
14-15 Jehub ge gao-aob Jorammi ǃoagu ge ǀapeǀhao. Jorammi ge noxopa Siriab gao-aob Hasaeli ǃoagub ge ǃkham torob ǃnâb ge Ramots ǃnâ a tsuihe ǀhapide xub nî ǂgauseb ge Jesreels ǃnâ a sī, o ǁnāpa ge hâ i. Ob ge Jehuba ge mî: “Tita ǀkha go nî ǀguis kao, kōǃgâ, î-i tā khoe-e Ramotsa xu ǂoa tsî Jesreels khoena sī nē ǂhôa-e mîba.” 16 ǁNās khaoǃgâb ge kunis âb ai ǂoa tsî Jesreels ǁga ge ǃnari. Jorammi ge noxopa ge ǀaeǁgoe hâ i tsî Judab gao-aob Ahasiab ge ǁîba ge sari hâ i.
17 Jesreels ǃnâ ge ǂgō-ommi ai mâ i ǃûi-aob ge Jehub tsî ǁîb khoegu tsîna ge mûǃgoaxa. ǁÎb ge “ǂGui khoega ta ge ra mûǃgoaxa” ti ge mî.
Ob ge Joramma ge ǃeream: “ǃGapi-aoba sî, îb ǁîga ǃgapiǃoa tsî ǂkhîb ǃnâ gu ra hāsa dî.”
18 Sîsabeb ge Jehuba ǃoa ǃgapiǂoa tsî ǁîb ǁga ge mî: “Gao-aob ge ǂkhîb ǃnâts go hāsa ra dî.”
Ob ge Jehuba ge ǃeream: “Satsa tā ǂkhîb xa ǂâiǂhansen, îts dabasen tsî tita sao.”
ǂGō-ommi ai ge mâ i ǃûi-aob ge sîsabeb, khoegu kōseb go sī, xaweb oadabasen tama ǃkhaisa ge ǂanǂan. 19 Gao-aob ge ǀkhara sîsabeba ge sîǂoa tsîb ge ǁîba Jehub tawab ge sīo ǁîb ǃoa ge mî: “Gao-aob ge ǂkhîb ǃnâts go hāsa ra dî.”
Ob ge Jehuba ǁkhawa ge ǃeream: “Satsa tā ǂkhîb xa ǂâiǂhansen, îts dabasen tsî tita sao.”
20 ǁKhawab ge ǃûi-aoba ge mî: “Sîsabeb ge khoegu kōseb go sī, xawe oadabasen tama hâ. Tsî kunisa ǃnari hâb ge ǃkhau hâ khoe-i khami ra ǃnari, Jehub ǂûb khami.”
21 “Kunisa ǂgāǃaoba te” tib ge gao-aob Joramma ge mîmā. ǂGāǃaobaheb ge ob ge kunis ai ge ǂoa. Gao-aob Ahasiab tsîn ge ǁîb kunis ai ge ǂoa tsî kha ge hoakha Jehuba kha nî ǀhao-ūga ge ǃnariǂoa. ǁÎkha ge Jehuba Naboti ǃhūǃâs tawa Jesreels ǃnâ ge ǀhao-ū. 22 Joramma ge ǁîba ge dî: “ǂKhîb ǃnâts go hā?”
Ob ge ǁîba ge ǃeream: “Mâ ǂkhî-e nî hâ, sa îs ge tsoatsoa ǃgaidīb tsî ǁgôa-eloǃoabas noxopa sida ǃnâ hâs kōse?”
23 Ob ge Joramma “Gāxaǃnâsib ge nēba, Ahasiatse” ti mî tsî kunis âba ǁnumi tsî ge ǁhâ. 24 Jehub ge khās âba ǀgaisase ǂgaeǃnâ tsî Joramma ǁâb ǃnâ ge ǁkhâu tsîb ge ǂāba ǂgaob âba ge ǃkhāǃganu tsîb ge kunis âb ǃnâ ge ǁnā. 25 Ob ge Jehuba ǁîb ǂamkhoeb Bidkara ge mîmā: “Soros âba ūkhâi, î ǁîsa Naboti ǃhūǃâs ai aoǁgui. ǂÂi re, mâtib ge ǃKhūba sakhom, ǁîb îb Axab khaoǃgâ ǀguipa ra ǃgapi hîa nē ǀgoraǃgâsa ǁîb ǃoagu gowaǂuisa: 26 ‘Tita ge ǁari Naboti tsî ǁîb ôagu di ǃgamhesa go mû. Tsî ta ge go mîmâi nēpa ta ǁkhā ǃhūǃâs ǁkhās ai nî ǁkhara tsisa.’ ǁNā-amaga soros âba ū, î ǁîsa nē ǃhūǃâs ai aoǁgui, ǃKhūb ge mî hâ i khami.”
Judab gao-aob Ahasiab di ǃgamhes
27 Gao-aob Ahasiab ge ī gonab ge mû, o Bet-Hagans ǀkhāb ǁga ge ǁhâ. Ob ge Jehuba ǁîba ǃgôaǃgon tsî “ǁÎb tsîna ǁkhâu” ti ge mî. O gu ge Gurs, Ibleams ǀgūse ǂnôas ǁga garu daob ai, kunis âb ǃnâ ge ǁkhâu bi; xaweb ge Megidos kōse ǁhâ tsî ǁnāpa sī ge ǁō. 28 ǁÎb ǂamkhoegu ge soros âba kunis ǀkha Jerusalems ǁga ǃnari-ū tsî ǁîb ǀaokhoen ǀhobas ǃnâ, Davidi ǃĀs ǃnâ ge ǁkhō bi.
29 Disiǀguiǀaǁî kurib Axab ôab, Israeli gao-aob Jorammi di ǂgaeǂguis dib ǃnâb ge Ahasiaba ge Judab gao-ao kai.
Gao-aos Isabels di ǃgamhes
30 Isabels ge Jehub ge Jesreels ǃnâ hā ǃkhaisas ge ǁnâu, o mûra âsa boro, ǀûn âsa anu-anu tsî mûǂuidaos ǃnâ mâ gere kō. 31 Tsîs ge Jehub ǃās di dao-ams ǃnâ ra ǂgâxa hîa ge ǃhao: “ǂKhîb ǃnâts go hā Simritse , sats gao-aoǃgamaotse.”
32 Ob ge Jehuba kōkhâi tsî “Tari-e ti ǀkhāb ai hâ?” ti ge dî. O gu ge ǀgam tamas ka io ǃnona gao-ommi ǂamkhoega ǁîb ǁga ge kōǁgôa. 33 Ob ge Jehuba “Aoǁnâ si” ti ǁîga ge mîmā. ǁÎgu ge ge aoǁnâ si tsîb ge ǁîs ǀaoba ǂnubiǂgoab tsî hān tsîn ai ge ǀaisen. Tsîb ge Jehuba ǁîb hān tsî kunis ǀkha ge dāǂkhū si. 34 ǁÎb ge gao-ommi ǃnâ ǂgâ tsî sī ǂû tsî ge ā. ǁNās khaoǃgâ ǀguib ge ge mî: “ǁNā ǀâxarexūsa khoesa ūkhâi î ǁkhō, gao-aob ôas a xuige.” 35 Xawe ǁîsa gu nî ǁkhōse gu ge ǂoa, o gu ge ǁîs di danaǂkhōs tsî ǃomkha tsî ǂaira tsîn ǀguina ge hō. 36 Nē ǃkhaisa gu ge ǂanǂan bi, ob ge Jehuba ge mî: “ǁNās ge ǃKhūb ge ǁîb di ǃgāb Eliab ǃnâ-u mî hâ i ǃkhaisa: ‘Arin ge Isabels sorosa Jesreels ǀkharib ǃnâ nî ō. 37 Tsî ǁîs di soros ge ǀarub khami tsoroxūsase nî ǁgoe. Khoe-i xare-i ge Isabels a ǃkhais xawesa ǂan tide.’ ”
© Khoekhoegowab Elobmîs © Bible Society in Namibia, 2020.
