Leviǁîb tsî ǁîb di xōǀkhātaras
1 Israeli ge noxopa gao-ao-e ūhâ tama hâ i ǁaeb ǃnâb ge Leviǁîba ǃnūse Efraimmi di ǃnâuxa ǃhūb ǃnâ ge ǁan hâ i. ǁÎb ge Betlehems Judab disa xu xōǀkhātarasa ge ūbasen, 2 xawes ge ǁîsa ǁîb ǀkha ǁaixa tsî Betlehems ǃoa ǁîs îb di oms ǁga oa tsî haka ǁkhâga sī ǁnāpa ge hâ. 3 Ob ge aob âsa ge mîǁgui ǁîs ǁga ǃgû tsî ǁîsa sī nî ǃhoa-ūsa, îs ǁîb ǁga oaǀkhī. ǁÎb ge ǁîb di ǃgāb tsî ǀgam dâukikha tsîna ge ūsao. ǁÎs îb di oms ǃnâs ge ǂgâ-ū bi tsîb ge ǁgûba mû bio, ob ge khoexaǃnâse ge ǁkhoreǁhare bi. 4 ǁÎb di ǀuiǁgûb ge hâb nîsa ge ǂgaoǀkhā bi, tsîb ge ǃnona tsēde ǁnāpa ge hâ. ǁÎra ge ǂû, ā tsî tsuxuba ǁnāpa ge hâ. 5 Hakaǁî tsēs ai ra ge ǃnauǁgoaga khâimâ tsî ǃgû ra nîse ge ǂhomisen. Xaweb ge khoes di dadaba Leviǁîb ǃoa ge mî: “Aibe xūro-e ǂû re, daob ǃaroma; ǁnās khaoǃgâts ge a ǃgû ǁkhā.”
6 ǁÎ ǀgamkha ge ǀguipa ǂnû tsî ǂû tsî ge ā. Ob ge khoes di dadaba ge mî: “Nē tsuxub tsîna nēpa hâ, î ǃgâiaǂgao re.”
7 Leviǁîb ge ǃgûb nîseb ge khâimâ, xawe ǀuiǁgûb âb ge hâb nîsa a ǂgaoǀkhā bi, o ǁkhawa ǀnî tsuxuba ǁnāpa ge hâ. 8 Koroǁî tsēs aib ge ǃnauǁgoaga ǃgûb nîse a ǂhomisen, xaweb ge khoes di dadaba ge mî: “Aibe xūro-e ǂû re, daob ǃaroma, î ega ǀgui ǃgû.” Tsî kha ge ge ǂûǀhao.
9 Khoeb, ǁîb di xōǀkhātaras tsî ǁîb di ǃgāb tsîn ǃgûn nîse ra ǂhomisen, hîab ge ǁgûba ge mî: “Kō re, sores ge ǀnai ra ǂgâ tsî i ge ra ǃuiǁga, xuige tsuxuba nēpa hâǁgoa re. ǁAri du ge ǃnauǁgoaga daob ǃaroma ǂhomisen tsî oms ǁga a ǁaru ǁkhā.”
10-11 Xaweb ge khoeba noxopa ǀnî tsuxuba ǁnāpa hâǁgoa ǂgao tama ge i, tsî ra ge ǁîb tsî ǁîb xōǀkhātaras tsîra, ǁîra di ǃgāb tsî ǃgaeǃgâsa dâukikha tsîn ǀkha ge ǃgû. ǁÎn ge Jebus (ǁnās ge Jerusalemsa) ǀgūse ǀnai i ra ǃuiǁga hîa ge sī, ob ge ǃgāba ǀhonkhoeb âb ǃoa ge mî: “Tare-i ǃaroma da nēpa hâ tsî nē ǃās Jebusǁîn dis ǃnâ ǁomǂkhai tama?”
12-13 Ob ge ǀhonkhoeb âba ǁîb ǃoa ge mî: “Sada ge nē ǃhao ǃās, ǁîs di ǁanǂgāsaben Israelǁî tamas ǃnâ a hâ ǁoa. A da ǃkharu tsî Gibeas tamas ka io Ramas ǃnâ sī ǁom.” 14 On ge Jebusa ǃkharu tsî aiǃâ ge ǃgû; tsîn ge sores ra ǂgâ hîa Gibeas, Benjaminni ǃhaos di ǀkharib ǃnâ ǂnôas tawa ge sī. 15 On ge ǁnāpan sī nî ǁomǂkhaise ǃās ǃnâ ge ǂgâ. Tsî ǃās di ǂgāb tawan ge sī a ǂnû, xawe i ge ǀgui khoe-i tsîna ǁîna oms â-i ǁga, ǁnāpan sī nî ǁomse ǁkhau tama ge i.
16 ǁNāpan hâ hîab ge kaira aoba ǁnā ǃoe ǃhanab aib gere dī sîsenna xu ge hā. ǁÎb ge ǂguro Efraimmi di ǃnâuxa ǃhūb tawa gere hâ, xawe nēsi Gibeas ǃnâ ge ǁan hâ i. (Nau khoen ǃās din ge ge Benjaminni ǃhaos di i.) 17 Kaira aob ge ǃās di ǂgāb aib ge ǃgûkhoeba a mûo, ǁîba ge dî: “Mâpa xuts ra hā? Mâǀîts ra ǃgû?”
18 Ob ge Leviǁîba ge ǃeream: “Sida ge Judab ǃnâ ǂnôa ǃās Betlehems ǁga ge ǃgû hâ i, tsî da ge nēsi ǁnāpa xu sida oms ǁga ǃnūse Efraimmi di ǃnâuxa ǃhūb ǁga ra oa. Xawe i ge ǀgui khoe-i tsîna oms â-i ǁga ǁkhau da tama hâ. 19 Sida ge ǂâu hâ ǂûxūn tsî ǃhoroǀgân tsîna dâukin ǃaroma ūhâ, tsî ǁkhāti ǂauxûi-i tsî pere-i tsîna tita, ti xōǀkhātaras tsî ti ǃgāb tsîda ǃaroma. ǂHâbasa xūn hoana da ge ūhâ.”
20 Ob ge kaira aoba ge mî: “Ti oms ǃnâts ge hā a hâ ǁkhā, tita ge nî ǃkhōǂhomi tsi. ǃĀs di ǂgāb aits nî hâǂkhai ǃkhais ge ǂhâbasa tide.” 21 Tsîb ge ǁîna oms âb tawa sī-ū tsî ǁîn di dâukikha ge ǂûmā. Khoen ge ǂaidi âna ǁā, tsî ǁnās khaoǃgâ ǂû tsî ge ā.
22 ǁNātin ra ǃgâiaǂgao hîa gu ge ǀnî ǂūǁoa khoegu ǃās diga ǃnapetamase omsa hā mâǂnami tsî dao-ams ai ge ǃgubutsoatsoa. ǁÎgu ge kaira aob ǃoa ge mî: “ǁNā khoeb sa oms ǃnâ go hāba ǂoaxa-ū. Sige ge ǁîba ra ǁgoe-ū ǂgao.”
23 Xaweb ge kaira aoba ǁîga ǃoa ǂoa tsî ge mî: “Hî-î, ti khoego. Tā toxopa ǁnāti i tsū, taotaosa xū-e dī re. Nē aob ge a ti ǃhaokhoe. 24 Kō, nēpa ra ge ti ôas hîa a oaxaes tsî ǁîb di xōǀkhātaras tsîra hâ. Tita ge ǁîra sago nî ǂoaxa-ūba. ǁÎra ǀkha sago ra ǂgao khami dī, xawe nē aoba tā nēti i ǁgaisi xū-e dī-ū re.” 25 Xawe gu ge nē khoega ǁîba ǃgâ ǂgao tama ge i. Ob ge Leviǁîba xōǀkhātaras âba ǃkhō tsî ǁîga ǃoa ge ǂhāǂui. O gu ge ǁîsa ǀgaiǃkhō tsî hoaraga tsuxuba ǁgoas kōse ge ǁore.
26 ǃNauǁgoagas ge nē khoesa, kaira aob di oms, ǁîs ǃnâb ge aob âsa hâ is di dao-ams tawa hā ge ǁnāǁgoe. ǁÎs ge ǃnâǃā i ges kōse ǁnāpa ge ǁgoe i. 27 ǁÎs aob ge ǁgoagab ge khâimâ tsî aiǃâb nî ǃgûga dao-amsa a ǁkhowa-amo, ǁîb xōǀkhātarasa oms ais ais, dao-ams ǃnaob ai ǃkhōbasen hâse ǁgoese ge hō. 28 “Khâima, î da ǃgû” tib ge ǁîs ǃoa a mî, xawe i ge ǃeream-e ǀkhī tama ge i. Ob ge ǁîs di sorosa dâukib ai ǃnao tsî oms âb ǁga ge ǃgû. 29 ǁÎb oms tawab ge sī, ob ge gôasa ū tsî xōǀkhātaras âb di sorosa disiǀgamǀa ǃâdi ǃnâ ǃgaoǃā tsî ǀgui ǃâsa, mâs Israelǁîn di disiǀgamǀa ǃhaodi dis hoasa ge sîba. 30 O i ge ǁnāsa ge mû khoe-i hoa-i gere mî: “Nēti i xū-e da ge noxopa mû tama hâ. Israelǁîn ge Egipteba xu a doeǂoasa xu i ge nēti i xū-e noxopa ī tama hâ. Nē ǃkhais ǂama da ge xū-e nî dī. Tare-e da nî dī?”
© Khoekhoegowab Elobmîs © Bible Society in Namibia, 2020.
