Hamanni ge Jodeǁîna hîkākāsa ra ǀapeǀape
1 [1] Nēn hoan khaoǃgâb ge gao-aob Artaxerxeba, Hamedatab ôab Hamanni, Bougaiǁîba, gao-aob di ǀhōsagu naugu ǂamai ǃgôasib ǃoa ǂgaeǂgui-aose ge ǀgapiǀgapi. 2 [2] Gao-aob ge ǁîb ǃoabas ǃnâ mâ ǂammâisagu hoaga Hamanni aiǃâ gu ǃgôasiba nî ǁgause nî ǃhon ǃkhaisa ge mîmā. ǁÎgu ge Mordekaib, Hamanni aiǃâb nî ǃhon ǃkhaisa ge ǂkhāb ǀguib ose, hoatsama ǁnāti gere dī. 3 [3] Nau ǂamkhoegu gao-aob ǃoabas ǃnâ ge mâ igu ge tare-i ǃaromab gao-aob mîmāsa ra ǁnâuǀnamoǃnâ ǃkhaisa ge dî bi. 4 [4] Tsēsa xu tsēs ǁga gu ǁîb mîdeb nî ǂgae-oaga ǁîba gere ǃhoa-ū, xaweb ge ǁîga ge ǃgâ tama hâ i. “Tita ge a Jodeǁî tsî ta ge Hamanni aiǃâ ǃhon ǁoa” tib ge ge ǃeream. ǁNā-amaga gu ge Hamanna, mâtib ge Mordekaiba gao-aob mîmāsa ǁnâuǀnamoǃnâ ǃkhaisa ge mîba. 5 [5] Mordekaib, ǁîb aiǃâ ǃhon tama ǃkhaisab ge mû, ob ge Hamanna kaise ge ǁaixa 6 [6] tsîb ge hoaraga gaosib Artaxerxeb dib ǃnâb Jodeǁîn hoana nî ǃgam ǃkhaisa ge ǀapeǀape.
7 [7] Disiǀgamǀaǁî kurib gao-aob Artaxerxeb ǂgaeǂguis dib ǃnâb ge Hamanna ǀkhūs nî aohe ǃkhaisa ge mîmā, ǂhanu tsēs tsî ǁkhâb, ǁîs aib Jodeǁîna ǀgui tsēs ǃnâ nî hîkākāsab nî ǂanǂuise. ǀKhūs ge disihakaǀaǁî tsēs, Adarǁkhâb disa, ǂhanu tsēs ase ge ǁgauǂui.
8 [8] Hamanni ge gao-aoba ge mîba: “ǂAnǂansa ǁaes di khoen ge hoa ǀkharigu sa gaosib hoab digu ǃnâ nau ǃhaodi ǁaegu ǀgarusase hâ. ǁÎn ǂhanugu ge nau khoen diga xu a ǀkhara. ǁNās ǀgui tamas, ǁîn ge gaosib ǂhanugu tsîna ǁnâuǀnam tama hâ tsî sats ge ǁnāsa mā-am tide. 9 [9] ǃGôahesatse, satsa iga ǃgâibao, mîmā-e māǂui în ǃgamhe. Nēsats ga dī, o ta ge disiǀoadisi ǀhaiǀuri marina ta gaosi ǁuiǂgaes ǃnâ nî ǂgā ǃkhaisa ra mîmâi.”
10 [10] Gao-aob ge ǁîb ǀkhunuǂnûidas, ǂhanusi mîmādi nî ǁgâi-ai-ūhegas tsîna gere sîsenūhesa ūǁnâ tsî Hamanna Jodeǁîn ǃoagu xoasa mîmāsab nî ǁgâi-aise ge mā. 11 [11] Ob ge gao-aoba “ǁNā mari-e ūhâ, îts ǂgaots ra xū-i hoa-e ǁnā ǁaes khoen ǀkha dī” ti ge mî.
12 [12] Disiǃnonaǀaǁî tsēs ǂguro ǁkhâb dis aib ge Hamanna gao-aob xoa-aoga ǂgaiǀhao tsî mîmāsa gaosib ǃnâ ǂanhe gowa-i hoa-i ǃnâ nî ǂnûiǃkhunihese khomaiba tsî toroǂnubis ǂgaeǂgui-aogu tsî gowoniagu ǃoa ge sîǂui. Nēs ge gao-aob Artaxerxeb ǀons ǃnâ māǂuihe tsî ǀguikaidisi tsî ǀgamdisihûǀa ǀkharigu, Indiaba xu Etiopiab kōse ǁgoegu ǃoa ge sîhe. 13 [13] Sîǂkhanitani-aogu ge mâ ǀkharib gaosib dib hoab ǃoa nē mîmāsa ge ǃgû-ū. Nē ǂanǂandi ge mîǁguisa tsēs, disiǀgamǀaǁî ǁkhâb, Adari dis ain nî hoaraga Jodeǁîna ǃgamhe tsî ǁîn ūhâ xūna ūxūhe ǃkhaisa ge ǃkhōǂgā hâ i.
B
Gao-aob Artaxerxeb sîǂkhanis Jodeǁîn ǃoagu hâs
14 [1] Nēb ge sîǂkhanis di ǁgâiǁnâba: “Kai gao-aob Artaxerxeb ge sao ra xoaǁguiba gowoniagu ǁîb ǀguikaidisi tsî ǀgamdisihûǀa ǀkharigu, Indiaba xu Etiopiab kōse ǁgoegu tsî ǁîgu ǃnaka hâ ǂamkhoegu ǃoa ge sîǂui.
15 [2] “ǂGui ǁaedi di ǂgaeǂgui-ao tsî ta ge hoaraga ǃhūbaib di ǀhonkhoe kais khaoǃgâ ta ge ti ǃnaka hâ khoen nî ǂkhîb ǃnâ ûi ǃkhaisa ge ǂâibasen. Tita ge nēna ti ǁkhāsiba ǁgauǂuis ǃaroma dī tama hâ, xawe ta ge ti ǂhanub hugaǀgui ta ǂhanu-ai tsî tsamtsiǃnâse ti khoena ra ǂgaeǂgui xui-ao ge dī. Tita ge khoe-i hoa-e ta ǁkhore i hâ ǂkhîba nî ǀasaǀasaba ǃkhais, tsî ǃgâise omkhâihe hâ gaosib ǃaroma ta ǂhâbasana nî dī ǃkhais, tsî khoen ǃnorasase nē ǃhūǀgorasa xu naus ǃoa nî ǃgû ǃkhais tsîna ge mîǁgui.
16 [3] “Tita ge ti ǀapemā-aoga mâti gu nî nē ǃkhais ǃnâ dīǀoaǀoa ǃkhaisa ge dî, tsîb ge Hamanna aoǁgui-e ge dī. ǁÎb ge sige ǁaegu, kai gā-aisiba ūhâ khoeb ase ra mûhe tsîb ge hoaǁae gaosib aiǃgûs ǃaroma gere ǂâiǂhansen. ǁÎb di ǂgomǂgomsa îǂhôasib ǃaromab ge ǀgamǁî ǀgapi ǃharosa gaosib ǃnâ ge hō. 17 [4] ǁAero-i ǃkharu hâseb ge Hamanna sige ǂanǂansa khākhoen, nau khoen ǁaegu gaosib ǃnâ hân xa ge mîba. ǁÎb ge sige nē khoen, ǁîn ǂhunuma ǂhanugu nau hoaraga khoen diga xu a ǀkharaga ūhâ tsî gaosib di mîmāde ra ǂhara ǃkhaisa ge mîǃgāǃgāba. ǁÎn di tanisenǀgaub xa ǃaromahe hâse ta ge ǀguiǃnâxa ǂhanub hîa ge gaosib ǃaroma ra ǂâiǃnâǁguiba dī ǁkhā tide.
18 [5] “Nē khoen ge sada ǂhanub ǃoagu khākhoexa tsî ǁgaisi, tsū xūn hîa gaosib di ǂgaeǂguisa ra ǁgoaǂuina ra dī. ǁÎn ge ǃhao ǁnaetigu tsî ǂhanuga sao tsî xūna nau khoena xu ǀkharase dī tsî ǁîn di hâhâ ra mâǃoas ǃnâ hoaraga khoesib ǃoagu ǀguri ra mâ. 19 [6] Nēn hoan mûǁae da ge Hamanni, sida ǂgaeǂgui-aob ge xoadi ǃnâ ǁgauǂui hâ i khoen nî ǃgamhe ǃkhaisa ge mîmā. Hoan ge tarekhoedi tsî ǀgôan tsîna ǁaraǂui tamase nî ǃgamǂuihe tsîb ge ǀgui-i di ûib tsîna sâuhe tide. ǁÎn ge a sada khākhoe tsî da ge ǁîna ǀkhom tide. Nē mîmās ge nē kurib di disihakaǀaǁî tsēs, disiǀgamǀaǁî ǁkhâb, Adari dis ai nî sîsenǂuihe. 20 [7] Nē khoen nētikō ǃgomsiba ge nētikō gaxu ǁaeba ǃaroman ge hoatsama ǀgui tsēs ai ǁkhōǁkhōsa ǁōba nî ǁō. ǁNās khaoǃgâ ǀgui ta ge gaosiba ǂkhîb tsî ǃnōsasib ǃnâ a ǂgaeǂgui ǁkhā.”
3
21 [14] ǃKhōǂgāb ǂanǂans dib ge mâ ǀkharib hoab ǃnâ ge ǂanǂanhe tsî i ge mâ khoe-i hoa-e, ǁnā tsēs ǃaroma ǂhomisensa ge mîmāhe.
22 [15] Nē mîmās ge ǁkhāti ǃhaese kaiǃās Susas ǃnâ ge ǂanǂanhe. Gao-aob tsî Hamanni tsîkha ra ǀhoro hîas ge kaiǃās Susasa ǀhomaxasib ǃnâ ge hâ i.
© Khoekhoegowab Elobmîs © Bible Society in Namibia, 2020.
