Tsâ ra khoe-i di ǁguiǁnâs
ǁNaeǃnans ǂgaeǂgui-aob ǃoa: Jedutunni ǃoa.
Davidi Psalms
1 Tita ge ge mî: “Ti daoga ǃûi;
tsî ta ge ti namsa ǁoreba xu nî ū-oa;
ti amsa ta ge ǂkhabab ǁaegu ta hâs kōse
tomsa nî ǂgā-amǃnâ.”
2 ǃGome tsî ta ge ge ǃnō;
ǃgâi xū-i tsîna ta ǃhoa tidese
xaweb ge ti tsûba ge ǀarosen.
3 Ti ǂgaob ge ge ǀgam
tsî ǂâiǂâisen ta rases ge ǀaesa gere ǂhubi
o ta ge ti nammi ǀkha ge gowa:
4 “ǃKhūtse, ti ûib di ǀams,
tsî mâtikōdi a ti ûitsēde ǃkhaisa ǁgau te re;
ǂan kai te re mâtib ti ûiba ra ǃgû-īsa.”
5 Sats ge ti tsēde ǃommi ǂhabab kōse ge mâi
tsî gu ge ti kuriga sats aiǃâ a ǁau.
Khoen hoan ge sa aiǃâ ǀommi khami ī.
6 Khoe-i ge som-i khami ra ǃgûma
tsîn ge xū-i ama tama ra ǀhupu.
ǃKhūsiban ge ra ǀhaoǀhao, tari-i nî ū ǃkhais tsîna ǀūse.
7 O tare-e ǁnâi nēsisa ǃKhūtse, ǁî-e ta ra ôa-e?
Ti ǃâubasens ge sats ǃnâ hâ.
8 Ti ǃûǂamdi hoade xu sâu te re;
î tā gân di ǃhōxūse dī te.
9 ǃGome ta go; ti amsa ta ge khoba tide
sats go nēsa ti ai hā-ū amaga.
10 Sa tsûtsû-aide tita xu ūbē re;
sa ǃommi di ǁaixasib xa ta ge toa hâ.
11 Sats ge khoesiba ǁoren ǃaroma ra ǁkhara;
ǃkhūsib ǁîn dibats ge ǁgurib khami ra hapu;
amaseb ge khoesib hoaba sa aiǃâ ǀommi khami ī.
12 Ti ǀgoresa ǁnâu re ǃKhūtse,
ti ās huib ǃaroma hâsa ǃgâ re;
tā sa ǂgaesa ǂgan re ti āsa xu.
Sats ǀkha ta ǃhaokhoe-i khami ra ǁan
ǃhaokhoese, ti aboxagu hoagu khami.
13 Tita xu kōbē re
kā ta nîs aiǃâ ta nî ǃgâiaǂgao ǁkhāse.
© Khoekhoegowab Elobmîs © Bible Society in Namibia, 2020.
