Elob ra Moseba ǂgai
1 ǀGuitsēb ge Moseba ǁîb ǀuiǁgûb, Jetrob, Midianǃhūb pristeri di ǀgoanab ra ǃûsise ǃgaroǃhūb ǃnâ-u ǃkharu tsî Elob di ǃhommi, Sinaib tawa ge sī. 2 ǁNāpab ge ǃKhūb ǀhomǃgāba ǀaes di ǁhabub ase ǀgom ǁkhūhai-i di ǁaeguba xu Moseba ge ǂhai. Tsî ǁîb ge buru hâse kō tsî ge mû, hais ǂhubis ra xawe ǂhubiǂui tama ǃkhaisa. 3 Ob ge Moseba “Nē ǃkhais ge amase a ǃhao! Tare-i ǃaromas nē ǀgom ǁkhūhaisa a ǂhubiǂui ǁoa? ǀGūse sī tsî ta ge nē buruxa ǃkhaisa nî kō” ti ǁîb ǂûb ǃnâ ge mî.
4 ǃKhūb ge Moseb ge ǀgūse hā ǃkhaisab ge mûo, ǁîba ǀgom ǁkhūhais di ǁaeguba xu ǂgai tsî ge mî: “Mosetse, Mosetse!”
Ob ge Moseba “Ā, nē ta ge a” ti ge ǃeream.
5 Ob ge Eloba ge mî: “Tā ǃaruǀî ǀgūse hā. Sa ǀkhapura ǂgaeǂui, mâ-aits hâ ǃkhais a ǃanu xuige. 6 Tita ge Elota, sa aboxagu Abrahammi, Isaki tsî Jakob hâgu gere ǀgoreǀî ta.” Moseb ge Eloba kōsa ǃao tsî ǁîb di aisa ge ǃgū-ai.
7 Ob ge ǃKhūba ge mî: “Tita ge mâtin ti khoena Egipteb ǃnâ ǁkhōǁkhōsase ra ûi-ūhe ǃkhaisa ge mû. ǁÎn ǃauǂgais, ǁîn ǁgâiǀā-aoga xu ǃnoraǃnorahes disa ǁnâu tsî ta ge ǁkhāti ǁîn ǁgâiǀāb hoaba a ǂan. 8 ǁNā-amaga ta ge ǁîna ta Egipteǁîn di khobosisa xu nî ǃnoraǃnorase go ǁgôaxa, î ta ǁîna Egipteba xu kai ǃhūb, ǃkhū hâ tsî ǂûtanixab, nēsin Kanaanǁîn, Hetǁîn, Amorǁîn, Perisǁîn, Hivǁîn tsî Jebusǁîn tsîna ǁanǃnâ hâb ǁga ǂgaeǂguiǂui. 9 Amabes ǃnâ ta ge Israelǁîn di tsâb xa ǁnâu tsî mâtin Egipteǁîn xa ra ǁgâiǀāhe ǃkhaisa ra mû. 10 ǁNā-amaga hā re, tita ge satsa Egipteb di gao-aob ǁga ra sî, ti khoen, Israeli ôanats sī Egipteba xu nî ǂgaeǂguiǂuise.”
11 Ob ge Moseba “Tarita tita, o ta Faraob ǁga Israeli ôana Egipteba xu sī nî ǂgaeǂguiǂuise nî ǃgû?” ti Eloba ge dî.
12 Ob ge Eloba ge ǃeream: “Tita ge sa ǀkha nî hâ tsî ti khoenats ga Egipteba xu a ǂoaxa-ū, o du ge nē ǃhommi ai nî ǀgoreǀî te. Tsîs ge nēsa tita xats ge sîhe ǃkhais di saos ase nî ī.”
13 Tsîb ge Moseba Eloba ge dî: “Israeli khoen tawa ta ga sī tsî ǁîn ǃoa ‘Sadu aboxagu gere ǀgoreǀî Elob ge tita sadu ǁga go sî’ ti mî, tsîn ga ǁîna tita sa ǀonsa dîo, mâti ta ǁîna nî ǃeream?”
14 Ob ge Eloba Moseb ǃoa ge mî: “Tita ge a ti. Tsî nēsats ge Israeli khoen ǃoa nî mî: ‘Tita ti ǀon hâb ge sadu ǁga go sî te.’ 15 Israelǁîna nēti mîba: Tita, ǃKhūta, ǁîn aboxagu Abrahammi, Isaki tsî Jakob hâgu xa gere ǀgoreǀîhe Elota ge satsa ǁîn ǁga go sî. Nēs ge ti ǀonsa ǀamosib kōse, tsî ǃgoaxaǁaeb di surigu hoagu ge tita ǁnāti ǀgui nî ǂan. 16 ǃGû, î hoaraga ǂgaeǂgui-aogu Israeli diga ǀhaoǀhao î ǁîga mîba: ǃKhūb, ǁîn aboxagu Abrahammi, Isaki tsî Jakob hâgu xa gere ǀgoreǀîhe Elota ge satsa go ǂhai. ǁÎna mîba mâtin gere ǁkhōǁkhōsase Egipteb ǃnâ ûi-ūhe ǀgausa ta gere mûsa. 17 ǁÎna ta nî Egipteǁîn di khobosisa xu ǃkhū hâ tsî ǂûtanixa ǃhūb ǁga ǂgaeǂguiǂui ǃkhaisa ta ge ge mîmâi, ǁnā ǃhūb Kanaanǁîn, Hetǁîn, Amorǁîn, Perisǁîn, Hivǁîn tsî Jebusǁîn tsîn ǁanǃnâ hâba.
18 “ǁÎn ge sats ra mîna ǂgom tsî nîra ǁnâuǀnam. Tsîts ge Israeli ǂgaeǂgui-aoga ū tsî Egipteb gao-aob ǁga ǃgû tsî ǁîba sī nî mîba: ‘ǃKhūb, Hebreǁîn di Elob ge sige tawa ge ǂhaiǂhaisen. ǁNā-amaga ge ge ǃnona tsēde ge ǃgaroǃhūb ǃnâ ǃgû tsî ǃKhūb sida Eloba ǁguibade nî mā ǃkhaisats nî mā-am ge ǃkhaisa ra ǂgan tsi.’ 19 Xawe tita ge Egipteb di gao-aob ǁgariheb karao, o ǀgui ǃgû du nî ǃkhaisa nî mā-am dusa ǃgâise a ǂan. 20 Ti ǀgaisa ǁôab ǀkha ta ge hoaraga buruxa dīn hîa ta nî dīn ǀkha Egipteǁîna nî tsûtsû tsî ǁnās khaoǃgâ ǀguib ge Egipteb gao-aoba nî ǃgû kai du.
21 “Egipteǁîn nî ti khoena ǃgôasiba māse ta ge nî dī tsî ǁîn ga ǃgû, on ǀkhaiǃom ǃgû tidese. 22 Mâ Israelǁî tarekhoes hoas ge ǁîs di Egipteǁî ǀgūkhoes tamas ka io sîsenbas gere oms tawa sī tsî ǀhaiǀuri tsî ǃhuniǀuri anixūn tsî saran tsîna ǂgan, tsî ǁîs ôana nî mā. Nē ǀgaub ai du ge Egipteǁîn di ǃkhūsiba a tanibē ǁkhā.”
© Khoekhoegowab Elobmîs © Bible Society in Namibia, 2020.
