Samueli ge ǁaesa ra gowaǀî
1 Ob ge Samuela Israelǁîn hoan ǃoa ge mî: “Tita ge sadu ge ǂgan khami ge dī. Gao-aoba ta ge ge mâiba du sadu ǂamab nî gaose, ǂgan du ge khami. 2 Kō, nēsi du ge gao-aoba ūhâ sadob nî ǂgaeǂguise. Tita xasa, tita ge kaira tsî go ǀhaiadana tsî ti ôakha ge sadu ǀkha hâ. Tita ge sado ti ǂkhamsisa xu nēsis kōse goro ǂgaeǂgui. 3 Nē ta ge a xuige ǃKhūb tsî ǁîb ge ǁhûiǂui gao-aob tsîkha aiǃâ ti ǃoagu ǀhûǀguitimî re. Tari-e xu ta goma-e ge ū? Tari-e xu ta dâuki-e ge ū? Tari-e ta ge gāxaǃnâ tamas ka io ǁgâiǀā? Tari-e xu ta ǀhôagao ǀgaub ai ǀkhaexū-e ge ū, tsūdība ta nî mûǃkharuǀkhāga? Ti iga ī, o ta ge nî mādawa-am.”
4 On ge ge ǃeream: “Sats ge gāxaǃnâ tsî ǁkhāti ǁgâiǀā da tama ge hâ i. Sats ge khoe-i xare-e xu xū-e ū tama hâ.”
5 ǃAruǀîb ge Samuela ge mî: “ǃKhūb ge ǃkhō-amao sadu ǃoagu tsî ǁîb ge ǁhûiǂui gao-aob ge nētsē a ǃkhō-amao, xū-i xare-e du ti ǃoagu hō tamasa.”
On ge “Ā, ǃKhūb ge a ǃkhō-amao” ti ge mî.
6 Tsî Samueli ge ǁaes ǃoa ge mî: “ǁNā ǃKhūb ge Moseb tsî Aronni tsîkha ge ǁhûiǂui tsî sadu îna ge Egipteba xu a ǂgaeǂguiǂuiba. 7 Nēsi ǁnâi mâ, î ta ǃKhūb aiǃâ sadu ǃoagu ǃhoa, hoa ǀgaisa dīgu ǃKhūb digu, sadu tsî sadu înab ge huiǂui-ūgu xa ǂâiǂâiǃnâ dus ǀkha. 8 Jakob tsî ǁîb di surib ge Egipteb ǃnâ sīs khaoǃgân ge Egipteǁîn xan ge ǁgâiǀāheo ǃKhūb ǃoa ge ǀgore. Ob ge ǃKhūba, Moseb tsî Aronni tsîkha ge sî tsî ǁîkha ge ǁîna Egipteba xu ǂgaeǂguiǂui tsî nē ǃhūb ǃnâ ge ǁan kai. 9 Xawen ge Israelǁîna ǃKhūb, ǁîn di Eloba ge ǁnāǃgâ; ob ge ǁîba Hasors toroǂnubis di ǃkhōdana-aob Siserab tsî Filisteǁîn tsî Moab gao-aob tsîn ǁîn ǃoagu torodī tsî ǁîna nî dan ǃkhaisa ge mā-am. 10 ǃNubain ge ǃKhūb ǃoa ǀgore tsî gere ǁguiǁnâ: ‘ǁOre da ge ge, ǃKhūba ǁnāxū tsî da ge Baali tsî Astartes tsîra di īga ǀgoreǀî xui-ao. Sida khākhoen ǀgaiba xu huiǂui da re, o da ge satsa nî ǀgoreǀî.’ 11 Ob ge ǃKhūba Jerubali, Baraki, Jeftab tsî Samueli tsîga sî tsî sadu khākhoen sadu ǂnamipe hân di ǀgaiba xu ge huiǂui du, sâsase du nî ǁanse. 12 Tsî Nahasi, Amonǁîn di gao-aob sadu ǃoagub nî torodīse ra hā ǃkhaisa du ge mû, xawe du ge, ‘a-i gao-ao-e sida ǂama gao,’ ti ge mî, ǃKhūb sadu Elob a sadu gao-ao hîa.
13 “Nēb ge sadu gao-aob ǁhûiǂuibasen du geb, ǂganbasen du geba. ǃKhūb ge ǁîba gao-aose sadu ǂama go mâi. 14 Sadu tsî sadu gao-aob on ga ǃKhūba ǃgôa, ǁîba ǃoaba, ǁîba ǃgâ tsî ǃKhūb di mîmāde ǁnâuǀnamo, ob ge ǃKhūba sadu ǀkha nî hâ. 15 Xawe ǃKhūba du ga ǃgâ tama i tsî mîmādi âba ǁnâuǀnam tama i, ob ge ǃKhūba sadu ǃoagu nî hâ sadu aboxagu ǃoagub ge hâ i khami. 16 Nēsi ǁnâi mâǀgara, î du mû nē kai xū-i ǃKhūb sadu ais ai nî dī-e. 17 Nēb kom ǀapiǁae tamabao? Xawe ta ge tita ǃKhūb ǃoa nî ǀgore, ob ge ǁîba ǃgurub tsî ǀapib tsîkha nî sî. ǁNâi kō î du mûǂan, gao-ao-e ǂganbasens ǀkha du go ǃKhūb mûǁae kaise tsūse dī ǃkhaisa.”
18 Samueli ge ǃKhūba ge ǂgaiǀî, ob ge ǃKhūba ǁnā tsēs ǁkhās ai ǃgurub tsî ǀnanub tsîkha ge sî, tsîs ge ǁaes hoasa kaise ǃKhūb tsî Samueli tsîkha hoakha ge ǃao. 19 On ge hoana Samuela ǃoa ge mî: “ǃKhūb sa Elob ǃoa toxopa ǀgoreba da re, î da tā ǁō. Sida ǁoregu hoagu tawa da ge noxopa ǀnî tsūdī-e go ǀaro, gao-ao-e da go ǂganbasens ǀkha.”
20 Ob ge Samuela ǁaes ǃoa ge mî: “Tā ǃao, î nēti ī tsū xū-e du ga dī, xawe tā ǃKhūba xu ǁnāǁgôa, î du sadu ǂgaob hoab ǀkha ǃKhūba ǃoaba. 21 Tā dabasen tsî xū-e harebe tama elogu, ore ǁoa, huiǂui ǁoa ti iga sao, ǁîgu a ǁau xuige. 22 ǃKhūb ge ǁaes âba ǁnāxū tide, ǁîb di kai ǀons di ǃgôasib ǃaroma, ǃKhūb ge sadob ǁîb ǁaese nî dī ǃkhaisa mîǀgui amaga. 23 Tita xasa, tita ge ǃKhūb ǃoagu sado ǀgorebaǀûs ǀkha ǁore tide. Tita ge sado ǃgâi tsî ǂhanu daoba nî ǁkhāǁkhā. 24 ǃKhūb ǀguiba ǁnâuǀnam, î du ǁîba ǂgomǂgomsase ǃoaba sadu ǂgaob hoab ǀkha. ǂÂis ǃnâ ūhâ, mâtikō kai xūnab ge dība du ǃkhaisa. 25 Xawe ǃaruǀî du ga tsūdīo, o du ge sadu tsî sadu gao-aob ona nî hîkākāhe.”
© Khoekhoegowab Elobmîs © Bible Society in Namibia, 2020.
